ନୂଆଦିଲ୍ଲୀ (ବାଘୁଆବାର୍ତ୍ତା): କେନ୍ଦ୍ର ସରକାର କେତେକ ସୋଶିଆଲ ମିଡିଆ କମ୍ପାନି ଗୁଡିକୁ କେତେକ ନିୟମ ପାଳନ କରିବା ପାଇଁ ନିର୍ଦ୍ଦେଶ ଦେଇଥିଲେ । ଏଥିପାଇଁ ଏହି କମ୍ପାନୀ ଗୁଡିକୁ ସରକାର ତିନି ମାସର ସମୟ ଦେଇଥିଲେ । ଯାହାର ଅବଧି ମେ ୨୬ ରେ ଶେଷ ହେବାକୁ ଯାଉଛି । ଏହି ସୋଶିଆଲ ମିଡିଆ କମ୍ପାନୀ ଗୁଡିକ ଏ ପର୍ଯ୍ୟନ୍ତ ସରକାରଙ୍କ ନିୟମ ପାଳନ କରିନାହାଁନ୍ତି । ଏହି କାରଣ ପାଇଁ ଆସନ୍ତା ଦୁଇ ଦିନ ମଧ୍ୟରେ ଫେସବୁକ, ଟ୍ୱିଟର ଏବଂ ଇନଷ୍ଟ୍ରାଗ୍ରାମ ଆଦିର ସେବା ବନ୍ଦ ହୋଇପାରେ ବୋଲି ଚର୍ଚ୍ଚା ହେଉଛି । କେନ୍ଦ୍ର ସରକାରଙ୍କ ଆଇଟି ମନ୍ତ୍ରାଳୟ ତରଫରୁ ଡିଜିଟାଲ କଣ୍ଟେଣ୍ଟକୁ ନିୟନ୍ତ୍ରଣ କରିବା ପାଇଁ କମ୍ପେ୍ଳନ୍ସ ଅଫିସର, ନୋଡାଲ ଅଫିସର ଇତ୍ୟାଦି ନିଯୁକ୍ତ କରିବାକୁ କୁହାଯାଇଥିଲା । ଏହି ସମସ୍ତ ଅଧିକାରୀ ଭାରତୀୟ ହୋଇଥିବେ ବୋଲି ସରକାର କହିଥିଲେ । ହେଲେ ଏହି ସୋଶିଆଲ ମିଡିଆ କମ୍ପାନୀମାନେ କିନ୍ତୁ ଏପର୍ଯ୍ୟନ୍ତ ଏହି ନିୟମ କାର୍ଯ୍ୟକାରୀ କରିନାହାନ୍ତି । ତେଣୁ କୁହାଯାଉଛି କମ୍ପାନୀ ଯଦି ଏହି ନିୟମ ପାଳନ କରିବାରେ ବିଫଳ ହୁଏ, ତେବେ ଦେଶରେ ଏହି ସୋଶିଆଲ ମିଡିଆ କମ୍ପାନୀରେ ସରକାର ତାଲା ଲଗାଇ ଦେଇପାରନ୍ତି । ଏଥିସହ ସେମାନଙ୍କ ବିରୋଧରେ ଅପରାଧିକ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇପାରେ । ଫେସବୁକ ଓ ଟ୍ୱିଟରରେ ଅନେକ ସମୟରେ ହିଂସାକୁ ଉସକାଉଛି । କିଛି ୟୁଜର ମାନେ ଫେସବୁକ, ଟ୍ୱିଟର ଜରିଆରେ ଏହି ହିଂସାକୁ ଉସକାଉଛନ୍ତି । ତେଣୁ ଏହା ଉପରେ ରୋକ ଲାଗିବା ଦରକାର ବୋଲି କେନ୍ଦ୍ର ସରକାର କହିଛନ୍ତି । ଏ ନେଇ ରାଜ୍ୟ ସଭାରେ କେନ୍ଦ୍ର ଆଇଟି ମନ୍ତ୍ରୀ ରବିଶଙ୍କର ପ୍ରସାଦ କହିଥିଲେ, ବାକ ସ୍ୱାଧୀନତା ରହିଛି କିନ୍ତୁ ସମ୍ବିଧାନର ଧାରା ୧୯ରେ କିଛି କ୍ଷେତ୍ରରେ କଟକଣା ମଧ୍ୟ ଲାଗୁ କରାଯାଇଛି । ସୋଶିଆଲ ମିଡିଆ ପ୍ଲାଟଫର୍ମରେ ଫେକ ନ୍ୟୁଜ କିମ୍ବା ହିଂସା ସୃଷ୍ଟି କରିବା ଭଳି ପୋଷ୍ଟ ଶେୟାର କଲେ ସଂପୃକ୍ତ ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଭାରତୀୟ ଆଇନକୁ ଯିଏ ବି ଉଲ୍ଲଘନନ କରିବ, ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଫବୃଆରୀ ୧୧ରେ ରାଜ୍ୟ ସଭାରେ କହିଥିଲେ କେନ୍ଦ୍ର ଆଇଟି ମନ୍ତ୍ରୀ ରବି ଶଙ୍କର ପ୍ରସାଦ । ଏହାପରେ ଫେବୃଆରୀ ୨୫ରେ ଭାରତ ସରକାର ଏଭ ବିଜ୍ଞପ୍ତି ପ୍ରକାଶ କରି ସୋଶିଆଲ ମିଡିଆ କମ୍ପାନୀମାନଙ୍କୁ ଏକ ଗାଇଡ ଲାଇନ ଦେଇଥିଲେ । ଆଉ ସରକାରଙ୍କ ନିୟମ ଅନୁଯାୟୀ ସୋଶିଆଲ ମିଡିଆ କମ୍ପାନୀ ଭାରତରେ କାମ କରିବା ଦରକାର ବୋଲି କହିଥିଲେ ।
