ନୂଆଦିଲ୍ଲୀ (ବାଘୁଆବାର୍ତ୍ତା): ପଶ୍ଚିମବଙ୍ଗ ନିର୍ବାଚନରେ ନିଶ୍ଚୟ ଜିତିବାର ରାହା ନେଇ ଜେପରି ରଣକୌଶଳ ଆପଣାଇଥିଲା ଏଥିରେ ବିଜେପି ବିଫଳ ହେଲା । ଏଥିସହିତ ଟିଏମସିରୁ ଛାଡି ବିଜେପିରେ ସାମିଲ ହୋଇଥିବା ଅନେକ ନେତା ଏବେ ପୁଣି ଟିଏମସି ମୁହାଁ ହେବେବୋଲି ଟ୍ୱିଟ କଲେଣି । ପଶ୍ଚିମବଙ୍ଗର ପରାଜୟକୁ ବିଜେପିର ବଡ଼ ନେତାମାନେ ସହଜେ ହଜମ କରିପାରୁନାହାଁନ୍ତି । ଅନ୍ୟ ଏକ ପକ୍ଷେ ମହାମାରୀ କରୋନାର ଦ୍ୱିତୀୟ ଲହର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହ ବିଜେପି ନେତୃତ୍ୱାଧୀନ କେନ୍ଦ୍ର ସରକାରଙ୍କ ଛବିକୁ ମଳିନ କରିବାରେ ଲାଗିଛି । ସାରା ଦେଶରେ ମୋଦି ସରକାର କରୋନାକୁ ମୁକାବିଲା କରିବାରେ ବିଫଳ ହୋଇଥିବା ସ୍ୱର ଶାଣିତ ହେବାରେ ଲାଗିଛି । ଏହାକୁ କେମିତି ଦୂର କରାଯିବ ସେଥିପାଇଁ ଆରଏସଏସର ସଦସ୍ୟ ଓ ବିଜେପିର ନେତାମାନେ ବାରମ୍ବାର ବୈଠକ କରୁଛନ୍ତି । ବିଶେଷ କରି ଆସନ୍ତା ବର୍ଷ ଉତ୍ତର ପ୍ରଦେଶ ନିର୍ବାଚନ ପୂର୍ବରୁ କେମିତି ଦଳର ଛବିକୁ ସଜାଡି ଯିବ ସେଥିପାଇଁ ରବିବାର ସନ୍ଧ୍ୟାରେ ଆରଏସଏସ ଓ ବିଜେପି ନେତାମାନେ ମାନସମନ୍ଥନ କରିଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ମଧ୍ୟ ଯୋଗ ଦେଇଥିବା ବିଶେଷ ସୂତ୍ରରୁ ଜଣାପଡିଛି । ଉତ୍ତର ପ୍ରଦେଶ ବିଧାନ ସଭା ନିର୍ବାଚନ ଉପରେ ଯେମିତି କରୋନା ମହାମାରୀ ପ୍ରଭାବ ପଡିବ ନାହିଁ, ସେଥିପାଇଁ ତୃଣମୂଳ ସ୍ତରରେ କ’ଣ କରାଯିବ, ସେ ବିଷୟରେ ବୈଠକରେ ଆଲୋଚନା କରାଯାଇଛି । ଉତ୍ତର ପ୍ରଦେଶରେ ବିଜେପି ନିଜର ଛବିକୁ ସୁଧାରିବାକୁ ଏକାଧିକ କାର୍ଯ୍ୟକ୍ରମ କରିବ ବୋଲି ନିଷ୍ପତ୍ତି ହୋଇଛି । ସେହିପରି ଆଗକୁ ଯେମିତି କରୋନାର କୁପ୍ରଭାବ କେନ୍ଦ୍ର ସରକାର କିମ୍ବା ବିଜେପି ଉପରେ ନପଡିବ, ସେ ଦିଗରେ ମଧ୍ୟ ଉଭୟ ଆରଏସଏସ ଓ ବିଜେପି ନେତାମାନେ କାମ କରିବେ । ଦିଲ୍ଲୀରେ ବସିଥିବା ଏହି ବୈଠକରେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ଆରଏସଏସ ନେତା ଦତ୍ତାତ୍ରେୟ ହୋସବୋଲେ ଓ ଉତ୍ତରପ୍ରଦେଶର ସାଂଗଠିନ ଇନ ଚାର୍ଜ ସୁନୀଲ ବଂଶଲ ପ୍ରମୁଖ ଯୋଗଦେଇଥିଲେ । ଏମାନଙ୍କ ସହ ମୋଦି ଓ ଶାହ ମଧ୍ୟ ବୈଠକରେ ଉପସ୍ଥିତ ରହି ସବୁ ବିଷୟରେ ବିସ୍ତୃତ ଆଲୋଚନା କରିଥିଲେ ବୋଲି ଜଣାପଡିଛି । ବିଜେପି ଓ ଆରଏସଏସ ନେତାମାନଙ୍କ ଏପରି ବୈଠକରୁ ଗୋଟିଏ କଥା ସ୍ପଷ୍ଟ ହୋଇଛି ଯେ କେନ୍ଦ୍ର ସରକାରଙ୍କ ଛବି ମଳିନ ପଡିଥିବା ସମସ୍ତେ ଭଲ ଭାବେ ଜାଣି ସାରିଛନ୍ତି । ଏହାକୁ କେମିତି ସୁଧାରିବାକୁ ହେବ, ସେ ନେଇ ପ୍ରୟାସ ମଧ୍ୟ କରାଯାଉଛି । ଲୋକଙ୍କ ପାଖରେ ପହଞ୍ଚି ସେମାନଙ୍କ ସହ ଦଳ ରହିଛି ବୋଲି ଜଣାଇବାକୁ ବିଭିନ୍ନ କାର୍ଯ୍ୟକ୍ରମ କରାଯିବ । ‘ସେବା ହିଁ ସଂଗଠନ’ ଦଳ ଏହି ଲକ୍ଷ ନେଇ କାମ କରିବ ବୋଲି କିଛି ଦିନ ତଳେ ଜେପି ନଡ୍ଡା ବିଜେପି କର୍ମୀଙ୍କୁ ଚିଠି ଲେଖି ଜଣାଇଥିଲେ । ଏହା ଉପରେ କାର୍ଯ୍ୟ କରିବାକୁ ମଧ୍ୟ ସେ ଦଳୀୟ କର୍ମୀ ଓ ନେତାଙ୍କୁ କହିଥିଲେ ।
