ରାୟପୁର (ବାଘୁଆବାର୍ତ୍ତା): ଛତିଶଗଡ଼ର ସୁରଜପୁର ଜିଲ୍ଲାରେ ଜଣେ ଯୁବକଙ୍କୁ ଚାପୁଡା ମାରିବା ସହ ଫୋନ ଭାଙ୍ଗିବା ଘଟଣା ଜିଲ୍ଲାପାଳଙ୍କୁ ଭାରି ପଡିଲା । ମୁଖ୍ୟମନ୍ତ୍ରୀ ଭୁପେଶ ବଘେଲ କଲେକ୍ଟର ରଣବୀର ଶର୍ମାଙ୍କୁ ତୁରନ୍ତ ଦାୟିତ୍ୱରୁ ହଟାଇ ଦେଇଛନ୍ତି । ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଛତିଶଗଡ଼ ସରକାର ଏପରି ନିଷ୍ପତ୍ତି ନେଇଛନ୍ତି । ଭାଇରାଲ ଭିଡିଓ ଅନୁସାରେ ଲକଡାଉନରେ ଔଷଧ ନେବାକୁ ଯାଉଥିବା ଯୁବକଙ୍କୁ କଲେକ୍ଟର ଚାପୁଡା ମାରିବା ସହ ତାଙ୍କ ଫୋନକୁ ଭାଙ୍ଗି ଦେଇଥିବାର ଦେଖିବାକୁ ମିଳିଥିଲା । ସୋସିଆଳ ମିଡିଆରେ ଏହି ଭିଡିଓ ଭାଇରାଲ ହେବା ପରେ ଛତିଶଗଡ଼ର ମୁଖ୍ୟମନ୍ତ୍ରୀ ଏହି ଘଟଣାରେ କାର୍ଯ୍ୟାନୁଷ୍ଠାନ ଗ୍ରହଣ କରି କଲେକ୍ଟରଙ୍କୁ ତୁରନ୍ତ ହଟାଇବାକୁ ନିର୍ଦ୍ଦେଶ ଦେଇଛନ୍ତି । ଆଇଏଏସ ଗୌରବ କୁମାର ସିଂଙ୍କୁ ସୁରଜପୁରର ନୂତନ କଲେକ୍ଟର ଭାବରେ ନିଯୁକ୍ତ କରାଯାଇଛି ।ଭୂପେଶ ବଘେଲା ଟ୍ୱିଟ କରି ଏହାର ସୂଚନା ଦେଇଛନ୍ତି । ସୁରଜପୁର କଲେକ୍ଟର ରଣବୀର ଶର୍ମା ଜଣେ ଯୁବକଙ୍କୁ ଖରାପ ବ୍ୟବହାର କରିଥିବା ଘଟଣା ସୋସିଆଲ ମିଡିଆ ଦ୍ୱାରା ଜାଣିବାକୁ ପାଇଥିଲି । ଏହା ଅତ୍ୟନ୍ତ ଦୁଃଖ ଦାୟକ ଏବଂ ନିନ୍ଦନୀୟ । ଛତିଶଗଡ଼ରେ ଏଭଳି କାର୍ଯ୍ୟକୁ ବରଦାସ୍ତ କରାଯିବ ନାହିଁ । କଲେକ୍ଟର ରଣବୀରଙ୍କୁ ତୁରନ୍ତ ହଟେଇବାର ନିର୍ଦ୍ଦେଶ ଦିଆଯାଇଛି । ଭିଡିଓ ଭାଇରାଲ ହେବା ପରେ କଲେକ୍ଟର ଏହି ଘଟଣା ପାଇଁ କ୍ଷମା ମଧ୍ୟ ମାଗିଛନ୍ତି । ସେ କହିଛନ୍ତି ଯେ ଲୋକମାନେ କରୋନା ନିୟମ ପାଳନ କରିବା ଉଚିତ । ସୁରଜପୁର ଜିଲ୍ଲା କଲେକ୍ଟର ରଣବୀର ଶର୍ମା ତାଙ୍କୁ କହିଥିଲେ ସୋସିଆଲ ମିଡିଆରେ ଏକ ଭିଡିଓ ଭାଇରଲ ହୋଇଛି, ଯେଉଁଥିରେ ମୁଁ ଲକଡାଉନ ବେଳେ ଜଣେ ଯୁବକଙ୍କୁ ଚାପୁଡା ମାରିଛି । ଆଜିର ଆଚରଣ ପାଇଁ ମୁଁ ହୃଦୟରୁ କ୍ଷମା ପ୍ରାର୍ଥନା କରୁଛି ।
