କାଉ ଖାଉଛି ଦଶାହ ପିଣ୍ଡ, ମାଲିକ କରୁଛି ରୋଜଗାର, ଠକେଇର ନୂଆ ତରିକା

ନୂଆଦିଲ୍ଲୀ (ବାଘୁଆବାର୍ତ୍ତା): କରୋନା କାଳରେ ଦେଶରେ ତାଲା ବନ୍ଦ ଲାଗି ଜୀବନ ଯାତ୍ରା ଠପ ହୋଇଥିବା ବେଳେ କିଛି ଠକ ରେଜଗାରର ନୂଆ ତରିକା ଅବଲମ୍ବନ କରିଛନ୍ତି । ସାଇବର ଠକେଇଠୁ ଆରମ୍ଭ କରି ଛୋଟମୋଟ ଚୋରି ଡକାୟତି ମଧ୍ୟ ବୃଦ୍ଧି ପାଇଛି । ତାଲାବନ୍ଦ ପାଇଁ ଜୀବିକାରେ ପଡିଯାଇଛି ତାଲା । ହେଲେ କିଛି ଲୋକ ଅଛନ୍ତି ଏହି ତାଲାବନ୍ଦ ରେ ରୋଜଗାରର ନୂଆ ନୂଆ ତରିକା ଆପଣାଇବାରେ ଲାଗିଛନ୍ତି । ଏପରିକି କିଛି ଲୋକ ଅନ୍ଧବିଶ୍ୱାସର ବଶବର୍ତ୍ତୀ ବି ହେଉଛନ୍ତି । ଦଶାହ କର୍ମରେ କାଉଙ୍କୁ ଖାଇବାକୁ ଦେବାର ରୀତିନୀତି ଥିବାରୁ ଲୋକ ଅଜବ ତରିକା ଅପଣାଇଛନ୍ତି । ରାଜଧାନୀରେ ଦିଲ୍ଲୀରେ ଜଣେ ବ୍ୟକ୍ତି ଗୋଟିଏ କାଉର ସାହାଯ୍ୟ ନେଇ ଦୈନିକ ରୋଜଗାର କରୁଛନ୍ତି ପୂଳା ପୂଳା ଟଙ୍କା । ଅର୍ଥାତ ଆମ ହିନ୍ଦୁ ପ୍ରଥା ଅନୁସାରେ ଦଶାହ କାର୍ଯ୍ୟରେ ପିଣ୍ଡ ଦାନ କରାଯାଏ । କିନ୍ତୁ ଆଜିକାଲି କରୋନା ପାଇଁ ସବୁକିଛି ବନ୍ଦ ହୋଇପଡିଛି । ମରିଥିବା ଲୋକର ପିଣ୍ଡଦାନ ହେଉଛି ସତ କିନ୍ତୁ ପିତୃପୁରୁଷଙ୍କ ଆତ୍ମାର ତୃପ୍ତି ପାଇଁ କାଉମାନଙ୍କୁ ଦିଆଯାଇପାରୁନି ଖାଦ୍ୟ । ଫଳରେ ଜଣେ ବ୍ୟକ୍ତି ମସାଣିକୁ କାଉଟିଏ ଆଣି ଭଡା ସୂତ୍ରରେ ପିଣ୍ଡଦାନରେ ନିୟୋଜିତ କରିଛନ୍ତି । କାଉ ଥରୁଟିଏ ଖୁଣ୍ଟିଦେଲେ ଲୋକେ ଭାବୁଛନ୍ତି ପିତୃପୁରୁଷଙ୍କ ମୋକ୍ଷପ୍ରାପ୍ତି ହୋଇଯାଉଛି । ସେପଟେ କାଉ ଥରେ ଖାଇଲେ ପଇସା ବି ବଢ଼ିଆ ମିଳୁଛି । ଏଭଳି ସୁଯୋଗ ଛାଡିବ ବା କିଏ । ଏହାରି ଫାଇଦା କାଉ ରଖିଥିବା ମାଲିକ ବି ବସି ବସି ବେଶ ଦୁଇ ପଇସା ଲାଭ କରୁଛି । ସୋସିଆଲ ମିଡିଆରେ ଭାଇରାଲ ହେଉଛି ରାଜଧାନୀ ଦିଲ୍ଲୀର ଏହି ଭିଡିଓ ।