ବରଗଡ଼ (ବାଘୁଆବାର୍ତ୍ତା): ରାଜ୍ୟରେ କରୋନା ସଂକ୍ରମଣ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ରାଜ୍ୟରେ ଥିବା ଜେଲ ଗୁଡ଼ିକରେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି । ବରଗଡ଼ ଜିଲ୍ଲା ପଦ୍ମପୁର ସବଜେଲରୁ ୮୩ କଏଦୀ କରୋନା ପଜିଟିଭ ଚିହ୍ନଟ ହୋଇଛନ୍ତି । ପଦ୍ମପୁର ଉପଖଣ୍ଡ ଚିକିତ୍ସା ଅଧିକାରୀ ଡାକ୍ତର ତହସିଲ କୁମାର ସାହୁ ଏହି ସୂଚନା ଦେଇଛନ୍ତି । ପଦ୍ମପୁର ସବଜେଲର ୧୨୪ ଜଣ କଏଦୀ ଏବଂ ୮ଜଣ ଜେଲ କର୍ମଚାରୀଙ୍କ ସ୍ୱାବ ଟେଷ୍ଟ କରାଯାଇଥିଲା । ସେମାନଙ୍କ ମଧ୍ୟରୁ ୮୩ ଜଣ କଏଦୀଙ୍କ ରିପୋର୍ଟ ପଜିଟିଭ ଆସିଥିଲା । କରୋନା ଅକ୍ରାନ୍ତ ଏହି କଏଦୀଙ୍କ ମଧ୍ୟରୁ ୫ ଜଣଙ୍କୁ କୋଭିଡ କେୟାର ସେଣ୍ଟରରେ ରଖାଯାଇଛି । ସେମାନଙ୍କ ମଧ୍ୟରୁ ଜଣଙ୍କୁ ଅକ୍ସିଜେନ ଦିଆଯାଇଥିଲା । ତେବେ ଏବେ ତାଙ୍କ ଅବସ୍ଥା ସ୍ଥିର ରହିଛି । ରାଜ୍ୟର ଆଉ କିଛି ଜେଲରେ ଥିବା କଏଦୀମାନେ ମଧ୍ୟ କରୋନାରେ ଆକ୍ରାନ୍ତ ହୋଇଛନ୍ତି । ରାଜଧାନୀ ଭୁବନେଶ୍ୱରରେ ଥିବା ଝାରପଡା ଜେଲରେ କଏଦୀ ଓ ଷ୍ଟାଫଙ୍କୁ ମିଶାଇ ମୋଟ ୯୬ ଜଣ କରୋନାରେ ଅକ୍ରାନ୍ତ ହୋଇଥିବା ନେଇ ଗତକାଲି ସୂଚନା ମିଳିଥିଲା । ମୋଟ ୧୯୫ ଜଣଙ୍କର ନମୂନା ପରୀକ୍ଷା କରାଯାଇଥିବା ବେଳେ ୯୬ ଜଣଙ୍କ ରିପୋର୍ଟ ପଜିଟିଭ ଆସିଥିଲା । ସେମାନଙ୍କ ମଧ୍ୟରେ ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଓ ତାଙ୍କ ଭାବି ସମୁଦି ତଥା ପୂର୍ବତନ ଆଇଏଫଏସ ଅଭୟକାନ୍ତ ପାଠକ ମଧ୍ୟ ଅଛନ୍ତି । ମୟୁରଭଞ୍ଜ ଜିଲ୍ଲା ଉଦଳା ସବଜେଲରୁ ମଧ୍ୟ କରୋନା ଅକ୍ରାନ୍ତ ଚିହ୍ନଟ ହୋଇଥିଲେ ଓ ସେମାନଙ୍କୁ ଆଇସୋଲେସନରେ ରଖି ଚିକିତ୍ସା କରାଯାଉଛି ।
