ଭୁବନେଶ୍ୱର (ବାଘୁଆବାର୍ତ୍ତା): ମ୍ୟୁକରମାଇକୋସିସ ବା ବ୍ଲାକ ଫଙ୍ଗସକୁ ମହାମାରୀ ଘୋଷଣା କରିଛନ୍ତି ରାଜ୍ୟସରକାର । କିଛି ସମୟ ପୂର୍ବରୁ ଏହି ରୋଗକୁ ମହାମାରୀ ବା ନୋଟିଫାଏବୁଲ ରୋଗ ଭାବରେ ଘୋଷଣା କରିବାକୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ଦେଇଥିଲେ କେନ୍ଦ୍ରସରକାର । କେନ୍ଦ୍ର ସ୍ୱାସ୍ଥ୍ୟମନ୍ତ୍ରଳାୟ ଯୁଗ୍ମ ସଚିବ ଲବ ଅଗରୱାଲ ଓ ଟିମ ଆଜି ସାମ୍ବାଦିକ ସମ୍ମିଳନୀରେ ଏସମ୍ପର୍କରେ ସୂଚନା ଦେଇଥିଲେ । ଏପିଡେମିକ ଡିଜିଜ ଆକ୍ଟ ୧୮୯୭ ଅଧୀନରେ ଏହି ରୋଗକୁ ଗୁରୁତର ସହ ନେବାକୁ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ନିର୍ଦ୍ଦେଶ ଦିଆଯାଇଥିଲା । ବ୍ଳାକ ଫଙ୍ଗସ ବା ମ୍ୟୁକରମାଇକୋସିସକୁ ମହାମାରୀ ଭାବେ ଘୋଷଣା କରିବା ନେଇ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଏକ ଘୋଷଣା କରିଛି । ଏନେଇ ବିଭାଗ ପକ୍ଷରୁ କରାଯାଇଥିବା ଘୋଷଣାରେ କୁହାଯାଇଛି ଯେ ପରବର୍ତ୍ତି ନିର୍ଦ୍ଦେଶ ପର୍ଯ୍ୟନ୍ତ ଏପିଡେମିକ ଡିଜିଜ ଆକ୍ଟ ୧୮୯୭ ଆଧାରରେ ମ୍ୟୁକରମାଇକୋସିସ ନୋଟିଫାଏବଲ ଡିଜିଜ ଭାବରେ ଘୋଷଣା କରାଯାଉଛି । ତେବେ ବ୍ଳାକ ଫଙ୍ଗସ ବା ମ୍ୟୁକରମାଇକୋସିସକୁ ଘୋଷଣା କରିବା ପରେ କେନ୍ଦ୍ର ସରକାରଙ୍କୁ ଆକ୍ରାନ୍ତଙ୍କ ବିଷୟରେ ସମସ୍ତ ତଥ୍ୟ ଜଣାଇବେ ରାଜ୍ୟ ସରକାର । ତା ସହିତ ଏହି ରୋଗରେ ସ୍କ୍ରିନିଂ, ଚିକିତ୍ସା ଓ ଏହାର ସମସ୍ତ ପରିଚାଳନା ପାଇଁ କେନ୍ଦ୍ର ସ୍ୱାସ୍ଥ୍ୟମନ୍ତ୍ରଳାୟର ନିର୍ଦ୍ଦେଶାବଳୀ ପାଳନ କରିବାକୁ । ସୂଚନା ଥାଉକି ମହାରାଷ୍ଟ୍ର ରାଜସ୍ଥାନ, ମଧ୍ୟପ୍ରଦେଶ, ଉତ୍ତରପ୍ରଦେଶ, ଗୁଜୁରାଟ ଭଳି ରାଜ୍ୟରେ ବ୍ଲାକ ଫଙ୍ଗସ ଅନେକ ମାମଲା ସାମ୍ନାକୁ ଆସିଥିବା ବେଳେ ଓଡିଶାରେ ପ୍ରଥମେ ମେ ୧୦ ତାରିଖରେ ଏହି ରୋଗ ଦେଖାଯାଇଥିଲା । ରାଜ୍ୟରେ ପ୍ରଥମ ବ୍ଳାକ ଫଙ୍ଗସ ରୋଗ ଓଡିଶାରେ ଚିହ୍ନଟ ହୋଇଥିବା ନେଇ ରାଜ୍ୟ ସରକାର ସୂଚନା ଦେଇଥିଲେ । ଜଣେ ୭୧ ବର୍ଷୀୟ ବ୍ୟକ୍ତି ଏହି ରୋଗରେ ଆକ୍ରାନ୍ତ ଥିବା ସ୍ୱାସ୍ଥ୍ୟ ମନ୍ତ୍ରଳାୟ ସୂଚନା ଦେଇଥିଲା ।
