ବିବାହ ବଦଳରେ ଶ୍ମଶାନରେ ଜଳିଲା ଜୁଇ, ବିଷ ପିଇ ଆତ୍ମହତ୍ୟା କଲେ ମଙ୍ଗୁଳା କନ୍ୟା

ଗଞ୍ଜାମ (ବାଘୁଆବାର୍ତ୍ତା): ସରିଥିଲା ସମସ୍ତ ପ୍ରସ୍ତୁତି, ହୋଇଥାନ୍ତା ଯୁବତୀଙ୍କ ବାହାଘର । ବର ଆସି ଥାଆନ୍ତା ଆଉ ବାହାଘର ହୋଇଥାନ୍ତା । ବିବାହ ପୂର୍ବରୁ ବିଷକ୍ରିୟାରେ କନ୍ୟାର ମୃତ୍ୟୁ ହୋଇଛି । ବାହା ବେଦିରେ ଅଗ୍ନିକୁ ସାକ୍ଷୀ ରଖି ବିବାହ କରିବା ବଦଳରେ ଶ୍ମଶାନରେ ଜଳିଲା ଜୁଇ । ଏଭଳି ଏକ ଦୁଃଖଦ ହୃଦୟ ବିଦାରକ ଘଟଣା ଭଞ୍ଜନଗର ଥାନା ଅନ୍ତର୍ଗତ ତୁରୁମୁ ଗ୍ରାମରେ ଘଟିଛି । ଥାନା ସୂତ୍ରରୁ ମଳିଥିବା ସୂଚନା ପ୍ରକାର ତୁରୁମୁ ଗ୍ରାମର ବଡ଼ସାହିର ମଙ୍ଗୁଳୁ ନାୟକଙ୍କର ଝିଅ ସନ୍ତୋଷିନୀ(୨୦)ଙ୍କ ସହ ତାରାସିଂ ଥାନା ଅନ୍ତର୍ଗତ ଗାଡ଼ିଆପଡା ଗ୍ରାମର ବୃନ୍ଦାବନ ଗୌଡଙ୍କ ପୁଅ ପ୍ରଦୀପ ସହ ବୁଧବାର ବାହାଘର ହୋଇଥାନ୍ତା । ସନ୍ତୋଷିନୀ ମଙ୍ଗଳବାର ରାତିରେ ଘରର ଅନ୍ୟ ସଦସ୍ୟଙ୍କ ସହ ରାତ୍ରଭୋଜନ କରିବାପରେ ଶୋଇଯାଇଥିଲା । ବିଳମ୍ବିତ ରାତିରେ ସେ ପରିବାରର ଅନ୍ୟ ସଦସ୍ୟମାନେ ଶୋଇଯିବା ଦେଖି ବିଷ ପିଇଦେଇଥିଲା । ଭୋରରୁ ପରିବାର ଲୋକ ଛଟପଟ ହେଉଥିବା ଦେଖି ପଚାରିବାରେ ସନ୍ତୋଷିନୀ ବିଷ ପିଇ ଦେଇଥିବା କହିଛନ୍ତି । ତାଙ୍କୁ ଭଞ୍ଜନଗର ଡାକ୍ତରଖାନା ନିଆଯାଇଥିବା ବେଳେ ଡାକ୍ତର ମୃତ ଘୋଷଣା କରିଛନ୍ତି । ଭଞ୍ଜନଗର ଥାନା ଅପମୃତ୍ୟୁ ମାମଲା ରୁଜୁ କରି ଶବକୁ ବ୍ୟବଛେଦ କରାଇବାପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।