ଜେପି ନଡ୍ଡା, ସ୍ମୃତି ଇରାନୀ ଓ ସମ୍ବିତ ପାତ୍ରଙ୍କ ନାଁରେ ଏଫଆଇଆର

ନୂଆଦିଲ୍ଲୀ (ବାଘୁଆବାର୍ତ୍ତା): କୋଭିଡ ଟୁଲକିଟ ଘଟଣାରେ ବଢ଼ିଛି ବିଜେପିର ଅଡୁଆ । କଂଗ୍ରେସ ପକ୍ଷରୁ ଏହି ଘଟଣାରେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, କେନ୍ଦ୍ରମନ୍ତ୍ରୀ ସ୍ମୃତି ଇରାନୀ, ସାଧାରଣ ସମ୍ପାଦକ ବିଏଲ ସନ୍ତୋଷ ଓ ମୁଖପାତ୍ର ସମ୍ବିତ ପାତ୍ରଙ୍କ ବିରୋଧରେ ଏଫଆଇଆର କରାଯାଇଛି । ରାଜସ୍ଥାନ କଂଗ୍ରେସ ସମ୍ପାଦକ ଯଶବନ୍ତ ଗୁରଜର ଜୟପୁରର ବାଜାଜ ନଗର ପୁଲିସ ଷ୍ଟେସନରେ ଏହି ଏଫଆଇଆର ଦେଇଛନ୍ତି । ବିଜେପି ମିଛ ଓ ଛଳନାର ରାଜନୀତି କରୁଥିବା କଂଗ୍ରେସ ଅଭିଯୋଗ କରିଛି ନିକଟରେ ବିଜେପି ପକ୍ଷରୁ ଗୋଯିଏ ଟୁଲକିଟ ଜାରି କରାଯାଇଥିଲା । ଏହି ଟୁଲକିଟକୁ କଂଗ୍ରେସ ମହାମାରୀ ସମୟରେ ପ୍ରସ୍ତୁତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ କେନ୍ଦ୍ର ସରକାରଙ୍କ ଛବିକୁ ଖରାପ କରିବାକୁ ଚାହୁଁଥିବା ଦଳ ଦାବି କରିଥିଲା । ତେବେ କଂଗ୍ରେସ ଏହାକୁ ମିଛ ଓ ଦଳ ପକ୍ଷରୁ ସେମିତି କୌଣସି ଟୁଲକିଟ ପ୍ରସ୍ତୁତ କରାଯାଇନଥିବା କୁହାଯାଇଛି । ବିଜେପି ନେତାମାନଙ୍କ ମଧ୍ୟରୁ ପ୍ରଥମେ ଜେପି ନଡ୍ଡା ଏହି ତଥାକଥିତ ଟୁଲକିଟକୁ ଟ୍ୱିଟ କରିଥିଲେ । ଏହାପରେ ଏହାକୁ ସମ୍ବିତ ପାତ୍ର, ସ୍ମୃତି ଇରାନୀ ଓ ବିଏଲ ସନ୍ତୋଷ ଆଗକୁ ନେଇ ଭାଇରାଲ କରିଥିଲେ । ଟୁଲକିଟଟି କଂଗ୍ରେସର ଲେଟରହେଡ୍ରେ ରହିଥିବା ବେଳେ ଏହାକୁ ଏଆଇସିସି ରିସର୍ଚ୍ଚ ବିଭାଗ ପ୍ରସ୍ତୁତ କରିଥିବା କୁହାଯାଇଥିଲା । ଏହାକୁ ନେଇ ବିଜେପିର ଅଡୁଆ ବଢ଼ିଛି ।