ଅବହେଳାର କାରଣ କ’ଣ ?
ନୟାଗଡ଼,(ବାଘୁଆବାର୍ତ୍ତା): ସାରା ରାଜ୍ୟରେ କରୋନା ବହୁ ଆକ୍ରାନ୍ତ ଚିହ୍ନଟ ହେବା ଜିଲ୍ଲା ଗୁଡ଼ିକ ମଧ୍ୟରେ ସ୍ଥାନ ପାଇଛି ଖୋର୍ଦ୍ଧା ଜିଲ୍ଲା । ଖୋର୍ଦ୍ଧା ଜିଲ୍ଲାରେ ଲକଡାଉନ କଟକଣାକୁ କଡ଼ାକଡ଼ି କରାଯାଇଛି । ଗତକାଲି ଖୋର୍ଦ୍ଧା ପ୍ରଶାସନ ଅମାନିଆଙ୍କ ଉପରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଖୋର୍ଦ୍ଧା ପୁଲିସ ଏବଂ ପ୍ରଶାସନ ମୋଟ ୭୭ଟି ଗାଡ଼ି ଏବଂ ୪ଟି ଦୋକାନ ସିଲ କରିଛି । ଖୋର୍ଦ୍ଧା ନୂଆ ବସଷ୍ଟାଣ୍ଡଠାରୁ ୪୭ଟି ଗାଡ଼ି, ମୁକୁନ୍ଦପ୍ରସାଦଠାରୁ ୧୬ ଏବଂ ଚଣ୍ଡିଚୁଆ ଛକଠାରୁ ୧୪ ଗାଡ଼ି ଜବତ କରାଯାଇଛି । ମାତ୍ର ନୟାଗଡ଼ ଜିଲ୍ଲାରେ ପୁଲିସ ଏବଂ ପ୍ରଶାସନ ଆଜି ପର୍ଯ୍ୟନ୍ତ ଜୋରିମାନା ଆଦାୟରେ କଟକଣାକୁ ସୀମିତ ରଖିଛି । ଜିଲ୍ଲା ଆରକ୍ଷୀ ଅଧିକ୍ଷକଙ୍କ ଟ୍ୟୁଟରୁ ମିଳିଥିବା ସୂଚନାନୁସାରେ, ଗତକାଲି ଅର୍ଥାତ ୧୯ ତାରିଖରେ ୧୧୧ ଜଣ ବିନା ମାସ୍କ ଧାରୀଙ୍କଠାରୁ ୨୭ ହଜାର ୯ ଶହ ଟଙ୍କା ଜୋରିମାନା ଆଦାୟ କରାଯାଇଛି । ସାମାଜିକ ଦୂରତା ଅବଲମ୍ବନ କରୁନଥିବାରୁ ୪ ହଜାର ୯ ଶହ ଏବଂ ନିୟମ ଭାଙ୍ଗି ବାହାଘର କରୁଥିବା କାରଣରୁ ଏକ ହଜାର ଟଙ୍କା ଜୋରିମାନା ଆଦାୟ କରାଯାଇଛି । ଏଠାରେ ପ୍ରଶ୍ନ ଉଠୁଛି, ଏହି ଅମାନିଆଙ୍କ ବିରୁଦ୍ଧରେ କରୋନା ନିୟମଅନୁସାରେ, କାହିଁକି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ । ନୟାଗଡ଼ ପୁଲିସ ଆଜି ପର୍ଯ୍ୟନ୍ତ କେତେଜଣ ବାଇକ ଧରି ବୁଲୁଥିବା ଅମାନିଆଙ୍କଠାରୁ ବାଇକ ଜବତ କରିଛି । ପ୍ରଶାସନ କରୋନା ମୁକାବିଲାକୁ କେବଳ କଣ୍ଟେନମେଣ୍ଟରେ ସୀମିତ ରଖିଛି ନା ଅମାନିଆଙ୍କୁ ସାବାଡ଼ କରିବା ଉପରେ ଗୁରୁତ୍ୱ ଦେଉଛି । ନୟାଗଡ଼ ଜିଲ୍ଲା ପ୍ରଶାସନ ଖୋର୍ଦ୍ଧାରୁ ଶିଖିବାର ଆବଶ୍ୟକତା ରହିଛି । ସହରରେ ମାଳ ମାଳ କରୋନା ଆକ୍ରାନ୍ତ ବ୍ୟକ୍ତି ଖୋଲା ମେଲାରେ ବୁଲୁଥିବା କିଛି ପୁଲିସ କର୍ମଚାରୀ କହୁଛନ୍ତି । ଗୃହ ସଂଗରୋଧ ନିୟମକୁ ଏଡ଼ାଇ ଖାଲି ସହର ବଜାର ନୁହେଁ ଗ୍ରାମାଞ୍ଚଳରେ ମଧ୍ୟ ବେପରୁଆ ନୀତି ଅବଲମ୍ବନ କରାଯାଉଛି । ପ୍ରଶାସନ ଅଭିମୁଖ୍ୟକୁ କଡ଼ା ନକଲେ ଆକ୍ରାନ୍ତ ସଂଖ୍ୟା ଖୁବଶୀଘ୍ର ୫ ଶହ ଅତିକ୍ରମ କରିବାର ସମ୍ଭାବନା ଜଳ ଜଳ ଦେଖା ଯାଉଛି । ଭିସି ମାଧ୍ୟମରେ ସମୀକ୍ଷା କରି କରୋନା ମୁକାବିଲା ଚାଲିଥିବା ବେଳେ ବାସ୍ତବ ସ୍ଥିତି ବିଗିଡ଼ି ଯାଉଥିବା ଆଲୋଚନା ହେଉଛି । ଯେଉଁଥି ପାଇଁ ଆଜି କରୋନା ସର୍ବକାଳୀନ ରେକର୍ଡ଼ ଭଙ୍ଗ କରିଛି । ଜିଲ୍ଲାରେ ଆଜି ସର୍ବାଧିକ ୩୮୨ ଆକ୍ରାନ୍ତ ଚିହ୍ନଟ ହୋଇଛନ୍ତି । ପ୍ରଶାସନ ଏଦିଗରେ ଦୃଷ୍ଟି ଦେଇ ଆଭିମୁଖ୍ୟକୁ କଡ଼ା କରିବା ସହ କଟକଣା କଡ଼ା କଡ଼ି କରିବାର ଆବଶ୍ୟକତା ରହିଥିବା ମତପ୍ରକାଶ ପାଇଛି ।
