ଭୁବନେଶ୍ୱର (ବାଘୁଆବାର୍ତ୍ତା): କେନ୍ଦ୍ରୀୟ ମାଧ୍ୟମିକ ଶିକ୍ଷା ବୋର୍ଡ (ସିବଏସଇ) ଦଶମ ପରୀକ୍ଷା ଫଳ ପ୍ରକାଶ ପାଇବବୋଲି ଜଣାପଡିଛି । ପୂର୍ବରୁ ଜୁନ ତୃତୀୟ ସପ୍ତାହରେ ଦଶମ ଫଳ ପ୍ରକାଶ ପାଇବ ବୋଲି ସିବିଏସଇ ପରୀକ୍ଷା ନିୟନ୍ତ୍ରକ ଡ.ସାନମ ଭରଦ୍ୱାଜ କହିଥିଲେ । ମାତ୍ର ଏବେ ସିବିଏସଇ ଦଶମ ମାର୍କ ଅପଲୋଡ ଓ ଅନ୍ୟାନ୍ୟ ପ୍ରକ୍ରିୟାରେ ପରିବର୍ତ୍ତନ କରାଯାଇଛି । ଦଶମ ମାର୍କ ଟାବୁଲେସନ ପ୍ରକ୍ରିୟା ଜୁନ ୩୦ ତାରିଖ ମଧ୍ୟରେ ସମ୍ପୂର୍ଣ୍ଣ କରିବା ପାଇଁ ସିବିଏସଇ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି । ଫଳରେ ମାର୍କିଂ ପ୍ରକ୍ରିୟା ବିଳମ୍ବ ହେବା ସହିତ ପିଲାଙ୍କ ଫଳ ମଧ୍ୟ ବିଳମ୍ବରେ ପ୍ରକାଶ ପାଇବ । ଜୁଲାଇରେ ଫଳ ପ୍ରକାଶ ପାଇପାରେ ବୋଲି ଆଶା କରାଯାଉଛି । କରୋନା ସଂକ୍ରମଣ ସ୍ଥିତି ଓ ଶିକ୍ଷକ/ଶିକ୍ଷୟିତ୍ରୀଙ୍କ ସୁରକ୍ଷାକୁ ଦୃଷ୍ଟିରେ ରଖି ବୋର୍ଡ ତାରିଖରେ ପରିବର୍ତ୍ତନ କରିଥିବା କୁହାଯାଇଛି । ବୋର୍ଡ ଦର୍ଶାଇଛି ଯେ ସ୍କୁଲ କର୍ତ୍ତୁପକ୍ଷଙ୍କ ଲାଗି ମାର୍କ ଅପଲୋଡ ପାଇଁ ପୋର୍ଟାଲ ମେ’ ୨୦ ତାରିଖରୁ ଉପଲବ୍ଧ ହେବ । ସେହିପରି ସ୍କୁଲ କର୍ତ୍ତୃପକ୍ଷ ଜୁନ ୩୦ ତାରିଖ ମଧ୍ୟରେ ଛାତ୍ରଛାତ୍ରୀଙ୍କ ମାର୍କ ଅପଲୋଡ କରିବେ । ଛାତ୍ରଛାତ୍ରୀଙ୍କ ଇଣ୍ଟରନାଲ ଆସେସମେଣ୍ଟ ମାର୍କ ଜୁନ ୩୦ ମଧ୍ୟରେ ଅପଲୋଡ କରିବା ଲାଗି ବୋର୍ଡ ସ୍କୁଲଗୁଡିକ ନିର୍ଦ୍ଦେଶ ଦେଇଛି । ଏଥିଲାଗି ନିଷ୍ପତ୍ତି ରେଜଲ୍ଟ କମିଟି ଗ୍ରହଣ କରିବ । କରୋନା ଯୋଗୁ ସିବିଏସଇ ବୋର୍ଡର ଦଶମ ଶ୍ରେଣୀ ଛାତ୍ରଛାତ୍ରୀଙ୍କ ପରୀକ୍ଷା ବାତିଲ କରାଯାଇଥିବା ବେଳେ ବିକଳ୍ପ ପଦ୍ଧତ୍ତିରେ ମୂଲ୍ୟାୟନ କରିବା ନେଇ ବୋର୍ଡ ବିଜ୍ଞପ୍ତି ଜାରି କରିଥିଲା । ଚଳିତ ମାସ ଶେଷ ସୁଦ୍ଧା ଛାତ୍ରଛାତ୍ରୀଙ୍କ ମାର୍କିଂ ପ୍ରକ୍ରିୟା ସ୍କୁଲସ୍ତରରେ ସାରିବା ପାଇଁ ବୋର୍ଡ ପୂର୍ବରୁ ନିର୍ଦ୍ଦେଶନାମା ଜାରି କରିଥିଲା । ମାତ୍ର ଦେଶରେ ବର୍ତ୍ତମାନ କରୋନାର ଉତ୍କଟ ସ୍ଥିତିରେ ଶିକ୍ଷକମାନଙ୍କ ସୁରକ୍ଷା ଲାଗି ବୋର୍ଡ ତାରିଖରେ ପରିବର୍ତ୍ତନ କରିଥିବା ଦର୍ଶାଇଛି । ଜୁନ ଶେଷ ସୁଦ୍ଧା ମାର୍କ ଦାଖଲ ଲାଗି ବୋର୍ଡ ସିବିଏସଇ ଅନୁବନ୍ଧିତ ସ୍କୁଲଗୁଡ଼ିକୁ ନିର୍ଦ୍ଦେଶ ଦେଇଛି । ସେହିପରି ଅନ୍ୟାନ୍ୟ ପ୍ରକ୍ରିୟା ପାଇଁ ତାରିଖ ନିଷ୍ପତ୍ତି ରେଜଲ୍ଟ କମିଟି ଗ୍ରହଣ କରିବ ବୋଲି ବୋର୍ଡ ବିଜ୍ଞପ୍ତିରେ ଉଲ୍ଲେଖ କରିଛି ।
