ପୁରୀ,(ବାଘୁଆବାର୍ତ୍ତା): ବଡ଼ଦାଣ୍ଡରେ ବସି ଭୋ ଭୋ କାନ୍ଦୁଛନ୍ତି ଧରିତ୍ରୀ ସାମ୍ବାଦିକ ଦତ୍ତାତ୍ରେୟ ନାୟକ । ପୁରୀ ପୁଲିସର ବର୍ବରଚିତ ଆକ୍ରମଣ ଏବଂ ଦୁର୍ବବ୍ୟବହାର ସହି ନପାରି ଦତ୍ତାତ୍ରେୟ କାନ୍ଦୁଥିବା ଦେଖିବାକୁ ମିଳିଛି । ତାଙ୍କ ଆଖିର ଲୁହକୁ ଦେଖିଲେ ପୁଲିସର ଦୁର୍ବବ୍ୟବହାର ସୀମା ଲଂଘିଥିବା ବେଶ ବୁଝା ପଡ଼ୁଛି । ସୂଚନାନୁସାରେ, ଲକ୍ଡାଉନ୍ ସମୟରେ ପୁରୀ ବଡ଼ଶଙ୍ଖ ବଜାରରେ ଲାଗି ରହିଛି ଉତ୍ତେଜନା। ସାଧାରଣଲୋକ ଓ ପୁଲିସ ମୁହାଁମୁହିଁ ହୋଇଛନ୍ତି। ଏଥିସହିତ ସୁରକ୍ଷାଦୃଷ୍ଟିରୁ ଘଟଣାସ୍ଥଳରେ ପୁଲିସ୍ ଫୋର୍ସ ମୁତୟନ କରାଯାଇଛି । ଆଜି ଜଣେ ଠେଲା ବ୍ୟବସାୟୀଙ୍କୁ ପୁଲିସ ପକ୍ଷରୁ ମାଡ଼ ମାରିବା ଘଟଣାକୁ ନେଇ ଦତ୍ତାତ୍େରୟ ପୁରୀ ପୁଲିସକୁ ପ୍ରଶ୍ନ ପଚାରିଥିଲେ । ଏହାକୁ ନେଇ କିଛି ପୁଲିସ କର୍ମଚାରୀ ତାଙ୍କୁ ମାଡ଼ ମାରିବା ସହ ଘୋଷାରି ନେଇ ଭ୍ୟାନରେ ବସାଇଥିଲେ । ଏହାକୁ ନେଇ ସେଠାରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିବା ବେଳେ ଦତ୍ତାତ୍ରେୟ ପୁଲିସ ର୍ଦୁବ୍ୟବହାରକୁ ନେଇ ବଡ଼ଦାଣ୍ଡରେ ବସି ପ୍ରତିବାଦ କରିବା ସହ ଭୋ ଭୋ କାନ୍ଦୁଥିବା ଦେଖିବାକୁ ମିଳିଛି । ସାମ୍ବାଦିକଙ୍କ ପୁଲିସ ଆକ୍ରମଣ କରିବା ଘଟଣା ବାରମ୍ବାର ସାମନାକୁ ଆସୁଥିବା ବେଳେ ପୁଲିସଙ୍କ ପ୍ରତି କୈାଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ । ଅନ୍ୟପକ୍ଷେ, ଦତ୍ତାତ୍ରେୟ କାନ୍ଦୁଥିବାରୁ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି । ଭାଇରାଲ ହେଉଥିବା ଭିଡିଓରେ ସାମ୍ବାଦିକ ଜଣଙ୍କ କହିଛନ୍ତି ଯେ, ପନିପରିବା ଦୋକାନୀଙ୍କ ଉପରେ ପୋଲିସର ଜୁଲମ ଅଭିଯୋଗ ହୋଇଥିଲା। ଏ ସଂପର୍କରେ ପ୍ରଶ୍ନ କରିବାରୁ ପୁଲିସ ଆକ୍ରମଣ କରି ଭ୍ୟାନରେ ଭର୍ତ୍ତି କରିଥିଲେ। ଏସବୁ ସିଟି ଡିଏସପି ଓ ଆଇଆଇସିଙ୍କ ଉପସ୍ଥିତିରେ ହୋଇଛି ବୋଲି ସେ କହିଛନ୍ତି।
