ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ କରୋନା ଦିନକୁ ଦିନ ଭୟଙ୍କର ହୋଇ ଚାଲିଛି । ଜିଲ୍ଲାରେ ସଂକ୍ରମିତଙ୍କ ସଂଖ୍ୟା ବଢ଼ିବା ଆଜି ୨୨୭ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହି ଆକ୍ରାନ୍ତଙ୍କୁ ମିଶାଇ ଜିଲ୍ଲାରେ ୨୪୫୭ ସକ୍ରିୟ ମାମଲା ରହିଥିବା ଜଣାଯାଇଛି । ଚିହ୍ନଟ ହୋଇଥିବା ୨୨୭ ମଧ୍ୟରୁ ଭାପୁର ବ୍ଲକରୁ ୧୨, ଦଶପଲ୍ଲାରୁ ୧୮, ଗଣିଆ ୭, ଖଣ୍ଡପଡ଼ାରୁ ୧୫, ନୟାଗଡ଼ରୁ ୪୧, ନୂଆଗାଁରୁ ୩୦, ଓଡ଼ଗାଁରୁ ୫୦, ରଣପୁରରୁ ୩୦, ନୟାଗଡ଼ ପୈାରାଞ୍ଚଳ ତଥା ଜିଲ୍ଲା ବାହାରୁ ୨୪ ଜଣ ଆକ୍ରାନ୍ତ ଚିହ୍ନଟ ହୋଇଥିବା ଜିଲ୍ଲା ପ୍ରଶାସନ ପକ୍ଷରୁ ସୂଚନା ମିଳିଛି । ଓଡ଼ଗାଁ ବ୍ଲକରେ କରୋନା ସ୍ଥିତି ଦିନକୁ ଦିନ ଜଟିଳ ହେଉଥିବାରୁ ଆଜି ପ୍ରଶାସନ ୪ଟି ସ୍ଥାନକୁ ମାଇକ୍ରୋ କଣ୍ଟେନମେଣ୍ଟ ଘୋଷଣା କରାଯାଇଛି । ଏହି ସ୍ଥାନ ଗୁଡ଼ିକ ମଧ୍ୟରେ ଆରଡ଼ା ପଞ୍ଚାୟତର କଇଥସାହି, ଗୈାଡ଼ପୁଟ ଗ୍ରାମ ପଞ୍ଚାୟତର ବାରିକସାହି, ରବିଗାଡ଼ିଆ ପଞ୍ଚାୟତ କୁରୁମବାଙ୍କତରାର ପଥରନୂଆସାହି, ଶିଖରପୁର ପଞ୍ଚାୟତର କାମନାସାହିକୁ ତହସିଲଦାର ବିଜୟିତା ସାମନ୍ତସଂହାର ମାଇକ୍ରୋ କଣ୍ଟେନମେଣ୍ଟ ଘୋଷଣା କରିଛନ୍ତି । ସେହିଭଳି ଭାବେ ଗଣିଆ ବ୍ଲକ ତେଲିସାହିକୁ କଣ୍ଟେନମେଣ୍ଟ ଘୋଷଣା କରାଯାଇଛି । ତହସିଲଦାର କିଶୋର କୁମାର ପଣ୍ଡା କଣ୍ଟେନମେଣ୍ଟ ଘୋଷଣା କରିବା ସହ ବାହାର ଲୋକଙ୍କୁ ଗ୍ରାମକୁ ପ୍ରବେଶ ଉପରେ କଟକଣା ଲଗାଇଛନ୍ତି । କଣ୍ଟେନମେଣ୍ଟ ହୋଇଥିବା ପ୍ରତ୍ୟେକ ଅଞ୍ଚଳକୁ ବିଶୋଧନ କରାଯିବା ସହ ସମସ୍ତଙ୍କ ସ୍ୱାସ୍ଥ୍ୟ ଯାଞ୍ଚ କରିବାକୁ ପ୍ରସ୍ତୁତି କରାଯାଇଛି । ଉକ୍ତ ଅଞ୍ଚଳରେ ସମସ୍ତ ସରକରୀ ଓ ବେସରକାରୀ କାର୍ଯ୍ୟାଳୟକୁ ବନ୍ଦ କରାଯାଇଛି । ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପ୍ରଶାସନ ପକ୍ଷରୁ ଯୋଗାଣ କରାଯିବ ବୋଲି ସୂଚନା ମିଳିଛି ।
