ନୂଆଦିଲ୍ଲୀ (ବାଘୁଆବାର୍ତ୍ତା): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମାଲୋଚନାମୂଳକ ପୋଷ୍ଟର ପ୍ରସଙ୍ଗ ସୋମବାର ସୁପ୍ରିମକୋର୍ଟରେ ପହଞ୍ଚିଛି । ରାଷ୍ଟ୍ରୀୟ ରାଜଧାନୀ ଦିଳ୍ଲୀରେ ଲାଗିଥିବା ଏହି ପୋଷ୍ଟର ଲାଗି ପୁଲିସ ବିଭିନ୍ନସ୍ଥାନରୁ ୨୫ ଜଣଙ୍କୁ ଗିରଫ କରିଛି । ଏଭଳି ପୋଷ୍ଟର ଲଗାଇବା ପଛରେ କାହାର ହାତ ରହିଛି ତାକୁ ନେଇ ପୁଲିସ ତଦନ୍ତ ଜାରି ରଖିଛି । ତେବେ ପୋଷ୍ଟରକୁ ନେଇ ସୋମବାର ସୁପ୍ରିମକୋର୍ଟରେ ଏକ ପିଟିସନ ରୁଜୁ ହୋଇଛି । ପୁଲିସ ଏତଲ୍ଲା ରଦ୍ଦ ଲାଗି ସୁପ୍ରିମ କୋର୍ଟରେ ନିବେଦନ କରାଯାଇଛି । ଅଭିବ୍ୟକ୍ତି ସ୍ୱାତନ୍ତ୍ରତା ଆଧାରରେ ଆବେଦନକାରୀ ପ୍ରଦୀପ କୁମାର ଏହି ପିଟିସନ ଦାୟର କରିଛନ୍ତି । ଆବେଦନରେ ସେ ଉଲ୍ଲେଖ କରିଛନ୍ତି ଯେ ସରକାରଙ୍କ ଭାକ୍ସିନେସନ ପଲିସି ଉପରେ ପ୍ରଶ୍ନ ଉଠାଉଥିବା ପୋଷ୍ଟର ବିରୋଧୀରେ ଦିଲ୍ଲୀ ପୋଲିସର କାର୍ଯ୍ୟାନୁଷ୍ଠାନ ବନ୍ଦ ଲାଗି ପ୍ରଥମେ କୋର୍ଟ ନିର୍ଦ୍ଦେଶ ଦିଅନ୍ତୁ । ପ୍ରସଙ୍ଗରେ ଦିଲ୍ଲୀ ପୋଲିସର ଏତଲ୍ଲା ରଦ୍ଦ କରିବାକୁ ମଧ୍ୟ ପ୍ରଦୀପ ଦାବି କରିଛନ୍ତି । ଭାକ୍ସିନେସନ ସମ୍ପର୍କିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମାଲୋଚନାମୂଳକ ପୋଷ୍ଟର ଦିଲ୍ଲୀର ଅନେକ ଜିଲ୍ଲାରେ ଲାଗିଥିଲା । ମାମଲାରେ ପୋଲିସ ୨୫ଟି ଏଫଆଇଆର ରୁଜୁ କରିବା ସହ ୨୫ ଜଣଙ୍କୁ ଗିରଫ କରିଛି । ଦିଲ୍ଲୀ ପୋଲିସ ଅନୁସାରେ ରାଷ୍ଟ୍ରୀୟ ରାଜଧାନୀର ବିଭିନ୍ନ ସ୍ଥାନରେ ପ୍ରଧାନମନ୍ତ୍ରୀଙ୍କ ସମାଲୋଚନାମୂଳକ ପୋଷ୍ଟର ଆମ ଆଦମୀ ପାର୍ଟି(ଏଏପି) ର କାର୍ଯ୍ୟକର୍ତ୍ତା ଓ ନେତାମାନେ ଲଗାଇଥିବା ଜଣାପଡିଛି । ତେବେ ଏହି ସବୁ ପୋଷ୍ଟରରେ ଏହାକୁ ଛପାଇଥିବା ପ୍ରିଣ୍ଟିଂ ପ୍ରେସର ନାମ ମଧ୍ୟ ନାହିଁ । ତେବେ ତଦନ୍ତରୁ ମୋତି ନଗର ନିବାସୀ ପ୍ରସାନ୍ତ କୁମାରଙ୍କ ନିର୍ଦ୍ଦେଶରେ ଏହି ସବୁ ପୋଷ୍ଟର ରାଜଧାନୀର ବିଭିନ୍ନ ସ୍ଥାନରେ ଲଗାଯାଇଥିଲା । ପ୍ରଶାନ୍ତ କୁମାର ଏଏପିର କାର୍ଯ୍ୟକର୍ତ୍ତା ଓ ରାକେଶ ଯୋଶୀଙ୍କ ସହଯୋଗୀ । ଯୋଶୀଙ୍କୁ ମଧ୍ୟ ମାମଲାର ଯାଞ୍ଚରେ ଅନ୍ତର୍ଭୁକ୍ତ କରାଯାଇଛି ।
ଦିଲ୍ଲୀ ପୋଷ୍ଟର ମାମଲା: ପୁଲିସ ଗିରଫଦାରୀକୁ ନେଇ ସୁପ୍ରିମକୋର୍ଟରେ ମାମଲା
