ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ କରୋନା ସ୍ଥିତି ଭୟଙ୍କର ସ୍ଥିତିରେ ପହଞ୍ଚିଥିବା ବେଳେ କୋଭିଡ୍ ଓ ଅଣକୋଭିଡ୍ ମୃତ୍ୟୁ ସଂଖ୍ୟା ଦ୍ରୁତ ଗତିରେ ବୃଦ୍ଧି ପାଉଛି । ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକ ଗିରିଡ଼ିପଲ୍ଲୀ ପଞ୍ଚାୟତ ଝାଡ଼ସାହି ଗ୍ରାମରେ ୪ ଜଣ ବ୍ୟକ୍ତି ଆଜି ମୃତ୍ୟୁ ବରଣ କରି ସାରିଥିବା ଜଣାଯାଇଛି । ଏନେଇ ନୟାଗଡ଼ ଜିଲ୍ଲା ପ୍ରଶାସନ ଜ୍ଞାତ ବା ଅଜ୍ଞାତ ଅଛି ତାହା ପରିତାପର ବିଷୟ ପାଲଟିଥିବା ବେଳେ ଗାଁରେ ଭୟର ବାତାବରଣ ସୃଷ୍ଟି ହୋଇଛି । ଉକ୍ତ ଗ୍ରାମଟି କଣ୍ଟେନମେଣ୍ଟ ଜୋନ ମଧ୍ୟରେ ରହିଛି । ଗାଁରେ ଅନେକ ସଂଖ୍ୟକ କରୋନା ଆକ୍ରାନ୍ତ ବ୍ୟକ୍ତି ରହିଥିବା ବେଳେ ବହୁ ଲୋକ ଜ୍ୱରରେ କୁହୁକୁଛନ୍ତି । ଏଭଳି ସ୍ଥିତିରେ ଆଜି ଗାଁରୁ ୪ ଜଣଙ୍କ ଜୀବନ ଯିବା ଏକ ଭିନ୍ନ ପରିସ୍ଥିତି ସୃଷ୍ଟି ହୋଇଛି । ଆଜି ସକାଳୁ ଗ୍ରାମର ଜଣେ କରୋନା ଆକ୍ରାନ୍ତ ବ୍ୟକ୍ତି ଚାନ୍ଦପୁର କୋଭିଡ୍ ହସ୍ପିଟାଲଠାରେ ମୃତ୍ୟୁ ବରଣ କରିଥିଲେ । ଏହା ପରେ ଜଣେ ବ୍ୟକ୍ତିଙ୍କୁ ଗୁରୁତର ଅବସ୍ଥାରେ ମହୀପୁର ଡାକ୍ତରଖାନା ନିଆଯାଇଥିବା ବେଳେ ସେଠାରେ ମୃତ୍ୟୁ ଘଟିଛି। ମୃତ୍ୟୁ ପରେ ତାଙ୍କର କୋଭିଡ୍ ପଜିଟିଭ ବାହାରିଥିବା ସ୍ଥାନୀୟ ଜନପ୍ରତିନିଧି ସୂଚନା ଦେଇଛନ୍ତି । ମହିପୁର ଡାକ୍ତରଖାନାରେ ମୃତ୍ୟୁ ଘଟିଥିବା ବ୍ୟକ୍ତି ୫୦ ବର୍ଷ ବୟସ୍କ ବୋଲି ଜଣାଯାଇଛି । ସେହିଭଳି ଭାବେ ଗ୍ରାମରେ ଆଜି ଜଣେ ବୃଦ୍ଧ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ ସେ ଜ୍ୱରରେ ଆକ୍ରାନ୍ତ ଥିବା ସୂଚନା ମିଳିଛି । ବୃଦ୍ଧ ବ୍ୟକ୍ତିଙ୍କ ଶବକୁ ଗ୍ରାମରେ ସତ୍କାର କରା ସରିଥିବା ଜଣାଯାଇଛି । ସେହିଭଳି ଭାବେ ଅପରାହ୍ନରେ ଜଣେ ୫୨ ବର୍ଷିୟ ବ୍ୟକ୍ତିଙ୍କୁ ଗୁରୁତର ଅବସ୍ଥାରେ ଜଗନ୍ନାଥପ୍ରସାଦ ନେବା ବାଟରେ ତାଙ୍କର ମୃତ୍ୟୁ ଘଟିଛି । ଫଳରେ ପରିବାର ଓ ସଂମ୍ପର୍କୀୟମାନେ ତାଙ୍କ ଶବକୁ ଗାଁକୁ ଫେରାଇ ଆଣିଥିବା ବେଳେ ଗ୍ରାମରେ ଭୟ ଓ ଆତଙ୍କ ସୃଷ୍ଟି ହୋଇଛି । କଣ୍ଟେନମେଣ୍ଟ ଜୋନରେ ଥିବା ଗୋଟିଏ ଗାଁରେ ଗୋଟିଏ ଦିନରେ ୪ ଜଣ ବ୍ୟକ୍ତି ମୃତ୍ୟୁ ଘଟିବା କରୋନା ଭୟାବହତାକୁ ସ୍ପଷ୍ଟ କରୁଛି । ଗ୍ରାମରେ ଏଭଳି ସ୍ଥିତି ସୃଷ୍ଟି ହୋଇଥିବା ବେଳେ କୈାଣସି ପ୍ରଶାସନିକ ଅଧିକାରୀ ଗ୍ରାମରେ ପହଞ୍ଚିନଥିବା ଜଣାଯାଇଛି ।
