ଢେଙ୍କାନାଳ (ବାଘୁଆବାର୍ତ୍ତା): କୋଭିଡ ଭଳି ମହାମାରୀ ସଂକ୍ରମଣ ସାରା ବିାଶ୍ୱ ବାସୀଙ୍କୁ ଚିନ୍ତାରେ ପକାଇ ଦେଇଛି । ଫଳରେ ସଂକ୍ରମଣ ରୋକିବାକୁ ବାଧ୍ୟହୋଇ ଲକଡାଉନ ସଟଡାଉନ ଆଦି ଘୋଷଣା ଯୋଗୁଁ ଅର୍ଥନୀତି ଭୁଶୁଡି ଗଲାଣି । ଏପଟେ କିନ୍ତୁ ଢେଙ୍କାନାଳ ଜିଲ୍ଲା କାମାକ୍ଷାନଗର ପ୍ରଶାସନର ବେଫିକର ମନୋଭାବ ଲୋକଙ୍କୁ ଚିନ୍ତା ପକାଇଛି । କାମାକ୍ଷାନଗର ମୁଂଡିଦେଉଳି ଅଂଚଳରେ ଜଣେ ଅବସର ପ୍ରାପ୍ତ ପ୍ରଧାନ ଶିକ୍ଷକଙ୍କ ପରିବାର ୫ ଜଣ ସଦସ୍ୟ କୋଭିଡ ସଂକ୍ରମିତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ହେଲେ ଉକ୍ତ ଶିକ୍ଷକ ଘରେ ଆଇସଲେସନରେ ଥିବାବେଳେ ରବିବାର ତାଙ୍କର ମୃତ୍ୟୁ ଘଟିଥିଲା । ମୃତ୍ୟୁର ଦୀର୍ଘ ୧୨ ଘଣ୍ଟା ବିତି ଯାଇଥିଲେ ମଧ୍ୟ ସମ୍ପର୍କୀୟଙ୍କ ଠାରୁ ଆରମ୍ଭ କରି ସାହି ପଡିଶାଙ୍କ ପର୍ଯ୍ୟନ୍ତ ସଂକ୍ରମଣ ଭୟରେ କେହି ପାଖକୁ ଯାଇନଥିଲେ । ଏହି ଖବର ପାଇ କିଛି ଅଧିକାରୀ ମୃତଦେହକୁ ବନ୍ଦ ଘରୁ ଉଦ୍ଧାର କରି ଶବକୁ ସତ୍କାର କରିବା ପାଇଁ ନେଇଥିଲେ । ମାତ୍ର ସଂକ୍ରମଣ ଠାରୁ ଦୁରେଇବା ପାଇଁ ଯତ୍ନର ସହ ଶବ ଦାହ କରିବା ପରିବର୍ତ୍ତେ କୋଭିଡ ଆକ୍ରାନ୍ତ ଶବକୁ ଫୋପାଡି ଦେଇଥିବା ଜଣାପଡିଛି । ଫଳରେ ଏହି କୋଭିଡ ଆକ୍ରାନ୍ତଙ୍କ ମୃତଦେହ ଗୁଣ୍ଡିଚାନାଳି ଗ୍ରାମ ଠାରୁ କିଛି ଦୂରରେ ପଡିରହିଥିବା ଦେଖିବାକୁ ମିଳିଛି । ଗୋଟିଏ ପଟରେ ଜଣେ ଅବସର ପ୍ରାପ୍ତ ଶିକ୍ଷକଙ୍କ ମୃତଶରୀରକୁ ଏପରି ବେପରୁଆ ଭାବେ ଫୋପାଡି ଦେବା ଶବ ପ୍ରତି ଘୋର ଅପମ।।ନ ହୋଇଛି । ସେପଟେ ଖୋଲା ଆକାଶ ତଳେ ପଡି ରହିଥିବା କୋଭିଡ ଆକ୍ରାନ୍ତ ମୃତଦେହକୁ କୌଣସି ଜଙ୍ଗଲୀ ପଶୁ ବା କୁକୁର ମାଧ୍ୟମରେ ସଂକ୍ରମଣ ହେବାର ଭୟ ସମସ୍ତଙ୍କୁ ଘାରିଛି । ଯାହାକୁ ନେଇ ସ୍ଥାନୀୟ ଅଂଚଳ ବାସୀ ସଂକ୍ରମଣ ଆଶଙ୍କାରେ ଆତଙ୍କିତ ହୋଇପଡିଛନ୍ତି ।
