ଭଦ୍ରକ (ବାଘୁଆବାର୍ତ୍ତା): କରୋନା ସମୟରେ ମଦ ଦୋକାନ ବନ୍ଦ ଥିବାରୁ ମଦ ମାଫିଆଙ୍କର ନୂଆ ଠିକଣା ପାଲଟିଛି ମନ୍ଦିର ସ୍ଥାନ । ଠାକୁରଙ୍କ ରୋଷ ଘର ପାଲଟୁଥିଲା ଚୋରା ମଦ ବେପାରୀଙ୍କ ସୁରକ୍ଷିତ ସ୍ଥାନ । ଚୋରା ମଦ ବେପାର କରିବା ପାଇଁ ଠାକୁରଙ୍କ ସ୍ଥାନକୁ ବି ଛାଡିଲେନି ମଦ ମାଫିଆ । ଏକ ଶିବ ମନ୍ଦିର ପରିସରରେ ଥିବା ଏକ ଘରୁ ବିପୁଳ ପରିମାଣରେ ପୋଲିସ ମଦ ଜବତ କରିଥିବା ସୂଚନା ମିଳିଛି । ଲକ ଡାଉନ ସମୟରେ ପୋଲିସକୁ ଚକମା ଦେଇ ଏଭଳି ଉପାୟରେ ମଦ ବିକ୍ରି କରୁଥିଲେ ମଦ ମାଫିଆ । ଭଦ୍ରକ ସାବରଙ୍ଗ ଥାନା ଅନ୍ତର୍ଗତ ଗୋରାମାଟି ପଞ୍ଚାୟତ ନୂଆ ସାହି ଗ୍ରାମରେ ଏଭଳି ଘଟଣା ସାମ୍ନା କୁ ଆସିଛି । ବର୍ତ୍ତମାନ ଲକ ଡାଉନ କାରଣରୁ ମଦ ଦୋକାନ ବନ୍ଦ ଥିବା ବେଳେ, ପୋଲିସର କଡା ଚେକିଂ ଚାଲିଛି । ଏଭଳି ସ୍ଥଳରେ ଉକ୍ତ ଗ୍ରାମର କିଛି ଲୋକ ମଦ ବିକ୍ରି କରିବା ପାଇଁ ଗାଁ ରେ ଥିବା ଶିବ ମନ୍ଦିର ପରିସରରେ ଏକ ଘରକୁ ସୁରକ୍ଷିତ ମଣିଥିଲେ । ଯାହାକି ଉକ୍ତ ଘରେ ମଦ ରଖି ଚୋରାରେ ବିକ୍ରି କରୁଥିଲେ । ଏହି ଖବର ସାବରଙ୍ଗ ପୋଲିସ ପାଇବା ପରେ ଆଜି ଚଢ଼ାଉ କରି ବିପୁଳ ପରିମାଣରେ ମଦ ଜବତ କରିଛି । ଏହି ମଦ ବେପାରରେ କେଉଁ ମାନେ ସମ୍ପୃକ୍ତ ତାହା ଜଣାପଡିନାହିଁ । ବର୍ତ୍ତମାନ କରୋନା ପାଇଁ ଚାରିଆଡେ ହାହାକାର ପଡିଥିବା ବେଳେ, ଲୋକମାନେ ଭଗବାନଙ୍କୁ ଡାକୁଛନ୍ତି ।
