ନୂଆଦିଲ୍ଲୀ (ବାଘୁଆବାର୍ତ୍ତା): କରୋନା ସଂକ୍ରମଣକୁ ରୋକିବା ପାଇଁ ହେଲେ ଭାରତବର୍ଷରେ ଟିକାକରଣ ଜୋରଦାର ହେବା ଦରକାର । ଦୁଇଟି ଯାକ ଟିକା ନେବା ପରେ କରୋନା ଜନିତ ମୃତ୍ୟୁ ସଂଖ୍ୟା କମିଯିବ । ଯେଉଁମାନେ ଦୁଇଟି ଟିକା ନେଇଥିବେ ସେମାନେ ସଂକ୍ରମିତ ହେଲେ ମଧ୍ୟ ଗୁରୁତର ହେବେ ନାହିଁ । ଏହା ବିଶେଷଜ୍ଞ ଏବଂ ସରକାର ଉଭୟ କହୁଛନ୍ତି । ହେଲେ ଏବେ ଏହାର ବ୍ୟତିକ୍ରମ ଦେଖିବାକୁ ମିଳିଛି । କାରଣ ଟିକା ନେଇ ସାରିଥିବା ଜଣେ ଡାକ୍ତର କରୋନାରେ ଗୁରୁତର ହେବା ପରେ ତାଙ୍କର ମୃତ୍ୟୁ ଘଟିଛି । ୫୮ ବର୍ଷୀୟ ଏହି ଡାକ୍ତର ଜଣଙ୍କ ଦିଲ୍ଲୀର । ତାଙ୍କ ନାମ ଅନୀଲ ରାୱତ । ଡାକ୍ତର ରାୱତ ରାଜଧାନୀ ସ୍ଥିତ ସରୋଜ ହସ୍ପିଟାଲରେ କାର୍ଯ୍ୟରତ ଥିଲେ । ସେ ମାର୍ଚ୍ଚରେ ଦ୍ୱିତୀୟ ଟିକା ନେଇଥିଲେ । ନିକଟରେ ସେ କରୋନାରେ ସଂକ୍ରମିତ ହେବା ପରେ ହସ୍ପିଟାଲରେ ଭର୍ତ୍ତି ହୋଇଥିଲେ । ଗୁରୁତର ହେବାରୁ ତାଙ୍କୁ ଶନିବାର ଭେଣ୍ଟିଲେଟରକୁ ନିଆଯାଇଥିଲା । ଆଉ ଭେଣ୍ଟିଲେଟରକୁ ଯିବା ପୂର୍ବରୁ ସେ ତାଙ୍କ ସହକର୍ମୀଙ୍କୁ କହିଥିଲେ, ‘ବ୍ୟସ୍ତ ହେବାର ଆବଶ୍ୟକତା ନାହିଁ । ମୁଁ ଖୁବଶୀଘ୍ର ଫେରିବି’ । ଯେହେତୁ ଡାକ୍ତର ରାୱତ ଦୁଇଟି ଯାକ ଟିକା ନେଇ ସାରିଥିଲେ ତେଣୁ ସେ ଆରୋଗ୍ୟ ହୋଇଯିବେ ବୋଲି ବିଶ୍ୱାସ ରଖିଥିଲେ ।
