ବାହାହେଲେ, ଜୋରିମାନା ଦେଲେ କନ୍ୟା ନେଇ ବର ଫେରିଲା ଆନ୍ଧ୍ର

ରଙ୍ଗେଇଲୁଣ୍ଡା (ବାଘୁଆବାର୍ତ୍ତା): ଓଡିଶା ଓ ଆନ୍ଧ୍ରପ୍ରଦେଶ ସହ ତେଲେଙ୍ଗାନାକୁ ସଂଯୋଗ କରୁଥିବା ସମସ୍ତ ସୀମାକୁ ସିଲ କରିବା ସହ ସେଠାରୁ ଓଡିଶାରେ ପ୍ରବେଶ କରୁଥିବା ପ୍ରବାସୀ ଓଡିଆଙ୍କୁ ସଙ୍ଗରୋଧରେ ରହିବାକୁ ନିର୍ଦ୍ଦେଶ ଦିଆଯାଇଛି । ଏଥିପାଇଁ ଓଡିଆ-ଆନ୍ଧ୍ର ସୀମା ଗିରିସୋଲା ଠାରେ ପ୍ରଶାସନ ପକ୍ଷରୁ ପୁଲିସ, ପରିବହନ ଓ ରାଜସ୍ୱ ବିଭାଗ କର୍ମଚାରୀଙ୍କୁ ନେଇ ଏକ ଟିମ ଗଠନ ହୋଇଛି । ଜିଲ୍ଲାପାଳ ବିଜୟ ଅମୃତା କୁଲଙ୍ଗେ ଏଠାରେ ଯାଞ୍ଚ ଅନୁଧ୍ୟାନ କରିଥିବା ବେଳେ ଡିଆଇଜି ସତ୍ୟବ୍ରତ ଭୋଇ, ବ୍ରହ୍ମପୁର ଏସପି ପିନାକୀ ମିଶ୍ର ପ୍ରମୁଖ ସ୍ଥିତି ଅନୁଧ୍ୟାନ କରିଥିଲେ । ତେବେ ଅଭିଯୋଗ ହେଉଛି ଯେ, ଉପରିସ୍ଥ ଅଧିକାରୀ ଘଟଣା ସ୍ଥଳରେ ପହଞ୍ଚିବା ପୂର୍ବରୁ ଓ ଯିବାର କିଛି ସମୟ ପର୍ଯ୍ୟନ୍ତ ଚେକିଂ କଡାକଡି ହେଉଥିବା ବେଳେ ଅନ୍ୟ ସମୟରେ ସୀମା ଯାଞ୍ଚ କାର୍ଯ୍ୟ ଢିଲା ହେଉଛି । ଆଜି ଆନ୍ଧ୍ର ସୋମପେଟା ମଣ୍ଡଳର କୁମ୍ଭାର ନୂଆଗାଁ ଗ୍ରାମର ଏକ ବର ଓ ୫ ଜଣ ଏକ କାରରେ ଗିରିସୋଲା ଚେକପୋଷ୍ଟ ଦେଇ ଆସିଥିଲେ । ପରେ ଶାସନପଦରରେ ବିବାହ କରି କନ୍ୟା ସହ ପୁଣି କାର ଯୋଗେ ଆନ୍ଧ୍ର ଯାଇଥିବା ଜଣାପଡିଛି । ତେବେ ବିବାହ ସ୍ଥଳରେ କନିଷି ତହସିଲଦାର ତାପସ କୁମାର ରାଉତ ପହଞ୍ଚି କୋଭିଡ ଗାଇଡ ଲାଇନ ପାଳନ ନହୋଇଥିବା ଦର୍ଶାଇବା ସହ ପାଞ୍ଚହଜାର ଟଙ୍କା ଜୋରିମାନା ଆଦାୟ କରିଥିଲେ । ସମସ୍ତେ କୋଭିଡ ନେଗେଟିଭ ରିପୋର୍ଟ ଆଣିଥିବା ସୂଚନା ପ୍ରଦାନ କରିଛନ୍ତି ତହସିଲଦାର ।