ରଣଭୂମି ପାଲଟିଲା ଶ୍ମସାନ, ସମ୍ପତ୍ତି ପାଇଁ ତିନି ଭାଇଙ୍କ ମାରପିଟ

ଭୀଲୱାଡା (ବାଘୁଆବାର୍ତ୍ତା): ଅର୍ଥ ସର୍ବସ୍ୱ ମଣିଷ ଏଭଳି ଏକ ମହାମାରୀ ସମୟରେ ମଧ୍ୟ ନିଜର ଫାଇଦା ପାଇଁ ଅନ୍ୟକୁ ହଇରାଣ କରିବାକୁ ପଛାଉ ନାହିଁ । ଏପରିକି ରକ୍ତ ସମ୍ପର୍କ ମଧ୍ୟ ଶତ୍ରୁ ପାଲଟି ଯାଉଛନ୍ତି । ଏଭଳି ଏକ ଲଜ୍ୟାଜନକ ଘଟଣା ରାଜସ୍ଥାନର ଭୀଲୱାଡାରେ ଦେଖିବାକୁ ମିଳିଛି । ଜଣେ ବୃଦ୍ଧ ବ୍ୟକ୍ତିଙ୍କର ମୃତ୍ୟୁ ପରେ ପୈତୃକ ସମ୍ପତ୍ତିକୁ ନେଇ ୩ ପୁଅ ଭିତରେ ସଂଘର୍ଷ । ଶ୍ମଶାନକୁ ବାପାର ଅସ୍ଥି ନେବାକୁ ଆସିଥିବା ୩ ପୁଅ ଜମିଜମା ବିବାଦକୁ ନେଇ ପରସ୍ପରକୁ ଜୀବନରେ ମାରିଦେବାକୁ ଆକ୍ରମଣ କରିଥିଲେ । ଘଟଣା ସମ୍ପର୍କରେ ସୂଚନା ପାଇଁ ପୋଲିସ ସେଠାରେ ପହଁଞ୍ଚି ପରିସ୍ଥିତିକୁ ସମ୍ଭାଳିଥିଲା । ଭାଇମାନଙ୍କ ଭିତରେ ଜମି ପାଇଁ ଲଢ଼େଇ ଚାଲିଥିବା ବେଳେ ସେଠାରେ ଥିବା ଲୋକମାନେ ଏହାର ଭିଡିଓ ତିଆରି କରିଥିଲେ । ବାପାଙ୍କ ମୃତ୍ୟୁ ପରେ ତୃତୀୟ ଦିନ ଏଭଳି ଘଟଣାକ୍ରମ ଭୀଲୱାଡାରେ ବେଶ ଚର୍ଚ୍ଚାର ବିଷୟ ପାଲଟିଛି । ଏହି ମାମଲାରେ ପୋଲିସ ମାମଲା ରୁଜୁ କରିନାହିଁ । ଭୀଡୱାଡାର ସାଙ୍ଗନେରରେ ରହୁଥିବା ପ୍ରତାପ ରାଓ ନାମକ ଜଣେ ବ୍ୟକ୍ତିଙ୍କର ନିକଟରେ ମୃତ୍ୟୁ ହୋଇଥିଲା । ବୁଧବାର ତୃତୀୟ ଦିନରେ ତାଙ୍କ ତିନି ପୁଅ ଧର୍ମ ସିଂ ରାଓ, ପପୁ ରାଓ ଓ ରଘୁନାଥ ରାଓ ଅସ୍ଥି ନେଇ ଏକାଠି ଶ୍ମଶାନକୁ ଆସିଥିଲେ । ଏହି ସମୟରେ ସମସ୍ତେ ମାନମର୍ଯ୍ୟାଦା ଭୁଲି ପୈତୃକ ଜମି ପାଇଁ ପରସ୍ପର ଭିତରେ ସଂଘର୍ଷ କରିବାକୁ ପଛାଇ ନଥିଲେ । ଶ୍ମଶାନକୁ ଆଉ କିଛି ବ୍ୟକ୍ତି ଶବଦାହ କରିବାକୁ ଆସିଥିବା ବେଳେ ସେମାନେ ତାଙ୍କୁ ରୋକିବାକୁ ଚେଷ୍ଟା କରିଥିଲେ । ହେଲେ ଏହି ତିନି ଭାଇ ରାଗରେ ତାଙ୍କ ଉପରେ ମଧ୍ୟ ଆକ୍ରମଣ କରିଥିଲେ । ଏହାପରେ ସେଠାରେ ଥିବା ଲୋକମାନେ ପୋଲିସକୁ ସୂଚନା ଦେଇଥିଲେ ।