ବିବାହ ପାଇଁ ରାଜି ନହେବାରୁ ମାରିଦେଲା ଗ୍ୟାଙ୍ଗଷ୍ଟର, ତଦନ୍ତ ଆରମ୍ଭ

ନୂଆଦିଲ୍ଲୀ (ବାଘୁଆବାର୍ତ୍ତା): ବିବାହ ପାଇଁ ଜବରଦସ୍ତି କରି ରାଜି ନହେବାରୁ ଜୀବନରୁ ମାରିନେଲେ । ଏମିତି ଏକ ଅଭାବନୀୟ ଘଟଣା ପାକିସ୍ତାନର ଲାହୋରରେ ଘଟିଛି । ହତ୍ୟାକାଣ୍ଡରେ ଶିକାର ହୋଇଛନ୍ତି ଜଣେ ଲଣ୍ଡନ ଯୁବତୀ । ସେ ହେଉଛନ୍ତି ମୟରା ଜୁଲିଫକର । ସ୍ଥାନୀୟ ପୁଲିସ ଘଟଣାର ତଦନ୍ତ ଚଳାଇଛି । ସୂଚନାନୁସାରେ, ଯୁବତୀ ଜଣଙ୍କ ୨ ମାସ ପୂର୍ବରୁ ନିଜର ଜଣେ ସମ୍ପର୍କୀୟଙ୍କ ବିବାହ ଉତ୍ସବକୁ ଯୋଗ ଦେବା ପାଇଁ ଲଣ୍ଡନରୁ ପାକିସ୍ତାନର ଲାହୋରକୁ ଆସିଥିଲେ । ତେବେ ଯୁବତୀଙ୍କ ମା ଝିଅର ପ୍ରତ୍ୟାବର୍ତନ ନେଇ ମଧ୍ୟ ଫ୍ଲାଇଟ ଟିକେଟ ବ୍ୟବସ୍ଥା କରିଥିଲେ । ତେବେ ଦକ୍ଷିଣ ଏସିଆରେ ଦ୍ରୁତଗତିରେ ବଢ଼ୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ପାକିସ୍ତାନକୁ ରେଡ ଜୋନରେ ରଖିଛି ୟୁକେ । ତେଣୁ ପାକିସ୍ତାନରୁ ଫେରିବା ପରେ ଲଣ୍ଡନରେ କ୍ୱରେଣ୍ଟାଇନରେ ରହିବା ବାଧ୍ୟତାମୂଳକ ନିୟମ କରାଯାଇଛି । କ୍ୱରେନଟାଇନ ଫି ବାବଦକୁ ଟଙ୍କା ଦେବାକୁ ପଡୁଥିବାରୁ ଯୁବତୀ ଜଣକ ଲଣ୍ଡନ ଫେରିବାକୁ ଅରାଜି ହୋଇଥିଲେ । ଭାବିଥିଲେ କରୋନା ସଂକ୍ରମଣ କମିବା ପରେ ଲଣ୍ଡନରେ ଲାଗୁ ହୋଇଥିବା କଟକଣା କୋହଳ ମଧ୍ୟ ହୋଇଯିବ । ସେଥିପାଇଁ ଆଉ କିଛି ଦିନ ପରେ ଲଣ୍ଡନକୁ ଫେରିବା ପାଇଁ ଯୋଜନା କରି ସେ ଲାହୋରରେ ତାଙ୍କ ଆଇ ପାଖରେ ରହିଥିଲେ । ଏହାରି ଭିତରେ ଲାହୋରରେ କିଛି ପିଲାଙ୍କ ସହ ବନ୍ଧୁତ୍ୱ ମଧ୍ୟ ବଢ଼ି ଯାଇଥିଲା । ତେବେ ଜଣେ ଗ୍ୟଙ୍ଗଷ୍ଟର ଆସି ଯୁବତୀଙ୍କୁ ବିବାହ ପାଇଁ ଜବରଦସ୍ତି କରିଥିଲେ । ଏଥିରେ ଯୁବତୀ ଜଣକ ରାଜି ହୋଇ ନଥିବାରୁ ତାଙ୍କୁ ନୃଶଂସ ଭାବେ ହତ୍ୟା କରାଯାଇଛି ।