ଜଳେଶ୍ୱର (ବାଘୁଆବାର୍ତ୍ତା): ଧାନ ବିଲରେ ଦେଖିବାକୁ ମିଳିଛି ଏକ ଅଭାବନୀୟ ଘଟଣା । ଯେଉଁଠିକି ଧାବିଲରେ ଭାଉଜକୁ ଦିଅର ଗୋଡାଗୋଡାଇ ପିଟୁଥିବା ବେଳେ ବଡ଼ ପୁଅକୁ କଟୁରିରେ ଆକ୍ରମଣ କରିଛି ବାପା । ଏଭଳି ଅଭିଯୋଗ ଆସିଛି କମର୍ଦ୍ଦା ଥାନା କଣ୍ଠାଳିଆ ଗ୍ରାମରେ । ସୂଚନାନୁସାରେ, କଣ୍ଠାଳିଆ ଗ୍ରାମର ଗଙ୍ଗା ନାରାୟଣ ପଢ଼ିଆରୀ ଓ ତାଙ୍କର ବଡ଼ ପୁଅ ସପନ ପଢ଼ିଆରୀଙ୍କ ମଧ୍ୟରେ ଦୀର୍ଘ ଦିନ ଧରି ଜମିବାଡିକୁ କେନ୍ଦ୍ର କରି ବିବାଦ ଲାଗି ରହିଥିଲା । ବଡ ପୁଅ ସପନ ତାଙ୍କୁ ମିଳିଥିବା ଭାଗ ଜମିରେ ଧାନ ଚାଷ କରିଥିଲେ । ବର୍ତ୍ତମାନ ଧାନ ଅମଳ ସମୟ ହୋଇଥିବାରୁ ଆଜି ସପନ ନିଜ ବିଲରେ ହାରଭେଷ୍ଟର ମେସିନ ସାହାଯ୍ୟରେ ଧାନ ଅମଳ କରୁଥିଲେ । ଏହି ସମୟରେ ତାଙ୍କ ବାପା ଗଙ୍ଗା ନାରାୟଣ ପଢ଼ିଆରୀ ଓ ସାନ ପୁଅ ବିଜୁ ପଢ଼ିଆରୀ ମିଳିତ ହୋଇ ବଡ଼ ପୁଅ ସପନ ପଢ଼ିଆରୀଙ୍କ ଧାନ କ୍ଷେତରେ ପହଞ୍ଚି ଜୋରଜବରଦସ୍ତ ଭାଗ ଧାନ ଦେବା ପାଇଁ କହିଥିଲେ । ମାତ୍ର ବଡ଼ ପୁଅ ସପନ ଧାନ ଦେବାକୁ ମନା କରିବାରୁ ବାପ ପୁଅଙ୍କ ମଧ୍ୟରେ ଗଣ୍ଡଗୋଳ ସୃଷ୍ଟି ହୋଇଥିଲା । ସାନ ପୁଅ ଏବଂ ବାପା ମିଶି ବଡ଼ ପୁଅ ସପନକୁ କଟୁରୀରେ ମରଣାନ୍ତକ ଆକ୍ରମଣ କରିବା ସହ ରଶିରେ ବାନ୍ଧି ପକାଇଥିଲେ । ଖବର ପାଇ ସପନଙ୍କ ସ୍ତ୍ରୀ ରଞ୍ଜିତାଙ୍କୁ ଧାନ ବିଲ ମଝିରେ ଗୋଡାଇ ଗୋଡାଇ ଆକ୍ରମଣ କରିଥିଲେ । ନିଜ ବଡ଼ ପୁଅକୁ ରଶିରେ ବାନ୍ଧି ବୋହୁକୁ ଆକ୍ରମଣ କରି ତାଙ୍କ ବିଲରୁ ଜୋରଜବରଦସ୍ତ ଧାନ କାଟି ନେବା ଘଟଣା ଏବେ ସମଗ୍ର ଅଞ୍ଚଳରେ ଚର୍ଚ୍ଚାରେ ବିଷୟ ପାଲଟିଛି । ଗୋଡାଇ ଗୋଡାଇ ମାଡ଼ ମାରିବା ଘଟଣା ସମୟରେ ଦୃଶ୍ୟରେ ଏବେ ସୋସିଆଲ ମିଡିଆରେ ଘୁରି ବୁଲିଛି । ଖବର ପାଇ ଘଟଣାସ୍ଥଳରେ କମର୍ଦ୍ଦା ପୋଲିସ ପହଞ୍ଚି ସ୍ୱାମୀ ସ୍ତ୍ରୀ ଦୁଇ ଜଣଙ୍କୁ ଉଦ୍ଧାର କରି ନିକଟସ୍ଥ ଡାକ୍ତରଖାନାକୁ ଚିକିତ୍ସା ପାଇଁ ପଠାଇଥିଲେ । ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ପଠାଯାଇଛି । କମର୍ଦ୍ଦା ପୋଲିସ ଅଧିକ ତଦନ୍ତ ଜାରି ରଖିଛି ।
