ନୟାଗଡ଼,(ବାଘୁଆବାର୍ତ୍ତା): ରାଜ୍ୟରେ ଦ୍ରୁତ କରୋନା ସଂକ୍ରମଣକୁ ନେଇ ସପ୍ତାହନ ସଟଡାଉନ ଲାଗୁ କରିବା ପାଇଁ ରାଜ୍ୟ ସରକାର ନିୟମ ଜାରି କରିଛନ୍ତି । ଏହି ନିୟମକୁ ଦୃଷ୍ଟି ଦେଇ ଜିଲ୍ଲା ପ୍ରଶାସନ ପକ୍ଷରୁ ସପ୍ତାହନ ସଟଡାଉନକୁ ଦୃଷ୍ଟିରେ ରଖି କଟକଣା ଜାରି କରାଯାଇଛି । ନୟାଗଡ଼ ପୈାରାଞ୍ଚଳ ଏବଂ ଓଡ଼ଗାଁ, ଦଶପଲ୍ଲା, ରଣପୁର, ଖଣ୍ଡପଡ଼ା ବିଜ୍ଞାପିତ ଅଞ୍ଚଳ ପରିଷଦ ପାଇଁ ସ୍ୱତନ୍ତ୍ର ନିୟମ ଲାଗୁ କରାଯାଇଛି । ଶନିବାର ଏବଂ ରବିବାର ସପ୍ତାହନ ସଟଡାଉନ ସମୟରେ ଜିଲ୍ଲାର ସମସ୍ତ ଡାକ୍ତରଖାନା, ଆମ୍ବୁଲାନ୍ସ ସେବା, ଘରୋଇ କ୍ଲିନିକ, ନସିଂ ହୋମ, ପେଟ୍ରୋଲ ଟାଙ୍କି ଏବଂ ଔଷଧ ଦୋକାନ ଖୋଲା ରହିବ ବୋଲି କୁହାଯାଇଛି । ଟେଲିକମ, ଗ୍ୟାସ, ଜଳଯୋଗାଣ ଏବଂ ପରିମଳ ବିଭାଗ, ବିଦ୍ୟୁତ୍ କର୍ମଚାରୀ ଓ ଗଣମାଧ୍ୟମ କର୍ମଚାରୀଙ୍କ ପାଇଁ କୈାଣସି କଟକଣା ଲାଗୁ ହେବ ନାହିଁ ବୋଲି କୁହାଯାଇଛି । କୃଷି, ଉଦ୍ୟାନ, ମତ୍ସ୍ୟ ଓ ପ୍ରାଣୀ ପ୍ରଭୃତି କାର୍ଯ୍ୟକ୍ଷମ ହେବ ବୋଲି ଜଣାଯାଇଛି । ହୋଟେଲ କର୍ମଚାରୀ, ରେଲୱେ, ପରିବହନ ବିଭାଗକୁ କଟକଣା ମୁକ୍ତ କରାଯାଇଛି । ସପ୍ତାହନ ସଟଡାଉନ ସମୟରେ ବାହାଘର ତଥା ସାମାଜିକ କାର୍ଯ୍ୟ ପାଇଁ ସ୍ଥାନୀୟ ଅଧିକାରୀଙ୍କଠାରୁ ଅନୁମତି ନେବାକୁ ପଡ଼ିବ ବୋଲି କୁହାଯାଇଛି । ଏଟିଏମ୍, ଜାତୀୟ ଓ ରାଜ୍ୟ ରାଜପଥର ଢାବା ଖୋଲା ରହିବ ବୋଲି କୁହାଯାଇଛି । ଢାବା ଗୁଡ଼ିକରୁ ଖାଇବା ଦିଆଯାଇ ପାରିବ ବୋଲି ନିୟମ ରହିଛି । ଖାଦ୍ୟ, ଗ୍ରୋସରୀ ଓ ପନିପରିବା ଓ ଜରୁରୀ କାଳୀନ କାର୍ଯ୍ୟରେ ନିୟୋଜିତ ବ୍ୟକ୍ତି ହୋମ ଡେଲିଭରି କରିପାରିବେ । କ୍ଷୀର ଦୋକାନ ଖୋଲା ରହିବା ସହିତ ସକାଳୁ ୫ଟାରୁ ୮ଟା ମଧ୍ୟରେ ଖବରକାଗଜ ବିତରଣ ହେବ ବୋଲି ସୂଚନା ମିଳିଛି । ଜିଲ୍ଲା ପ୍ରଶାସନ ପକ୍ଷରୁ ଏହି କଟକଣାକୁ କଡ଼ାକଡ଼ି ଭାବେ ପାଳନ କରିବା ପାଇଁ ଏନଏସି ଏବଂ ପୈାରାଞ୍ଚଳର ଅଧିକାରୀ ଏବଂ ପୁଲିସ ପ୍ରଶାସନକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।
