ଭୁବନେଶ୍ୱର, (ବାଘୁଆବାର୍ତ୍ତା): ମହିଳାଙ୍କ ସୁରକ୍ଷିତ ଯାତାୟତ ପାଇଁ ଆରମ୍ଭ ହୋଇଥିବା ‘ପିଙ୍କ୍ ଅଟୋ ସେବା’ କୁ ପୁନର୍ବାର ଆରମ୍ଭ କରିବା ଲାଗି ପରିବହନ ବଭାଗ ପ୍ରମୁଖ ଶାସନ ସଚିବ ମଧୁସୂଦନ ପାଢ଼ୀ ପୁଲିସ୍ କମିସନରଙ୍କୁ ଚିଠି ଲେଖିଛନ୍ତି । ଏହି ସେବା କାହିଁକି ବନ୍ଦ କରାଗଲା ସେ ନେଇ କମିସନରେଟ୍ ପୁଲିସ୍ ସମୀକ୍ଷା କରିବା ସହ ଜନସାଧାଧରଣଙ୍କ ଚାହିଦା ଏବଂ ମହିଳାଙ୍କ ସୁରକ୍ଷାକୁ ଦୃଷ୍ଟିରେ ରଖି ଏହି ସେବା କିପରି ପୁନର୍ବାର ଆରମ୍ଭ ହୋଇପାରିବ ସେ ନେଇ କମିସନରେଟ୍ ପୁଲିସ ପକ୍ଷରୁ ପଦକ୍ଷେପ ନେବାକୁ ସଚିବ ଶ୍ରୀ ପାଢ଼ୀ ଗୁରୁତ୍ୱାରୋପ କରିଛନ୍ତି । ସୁରକ୍ଷିତ ଯାତ୍ରା ଲାଗି ମହିଳାମାନଙ୍କ ପାଇଁ ରାଜଧାନୀ ଭୁବନେଶ୍ୱର ଏବଂ କଟକରେ ‘ପିଙ୍କ ଅଟୋ’ ସେବା ଆରମ୍ଭ ହୋଇଥିଲା । କମିସନରେଟ ପୁଲିସ୍ର ସମସ୍ତ ପ୍ରକାର ସହାୟତା ଯୋଗୁ ଏହି ସେବା ଗତ କିଛି ବର୍ଷ ଧରି ବେଶ୍ ସଫଳତାର ସହ ଚାଲିଥିଲା, କିନ୍ତୁ ଏବେ ଏହି ସେବାକୁ ବନ୍ଦ କରି ଦିଆଯାଇଛି । ଫଳରେ ଏବେ ସହରର କର୍ମଜୀବୀ ମହିଳା, ଛାତ୍ରୀମାନେ ବିଳମ୍ବିତ ରାତ୍ରିରେ ‘ପିଙ୍କ ଅଟୋ ସେବା’ ପାଇନପାରି ଅସୁରକ୍ଷିତ ଭାବେ ଯାତାୟତ କରୁଛନ୍ତି । ଏହି ପରିପ୍ରେକ୍ଷୀରେ ସହରରେ ପୁନର୍ବାର ଏହି ସେବାର ଆବଶ୍ୟକତା ଜରୁରୀ ହୋଇପଡ଼ିଛି । ତେଣୁ ଏହି ସେବାକୁ ପୁନର୍ବାର ଆରମ୍ଭ ଲାଗି କମିସନରେଟ୍ ପୁଲିସ୍ ପଦକ୍ଷେପ ନେବାକୁ ପ୍ରମୁଖ ଶାନସନ ସଚିବ ନିର୍ଦ୍ଦେଶ ଦେଇଛନ୍ତି ।
