ନୟାଗଡ଼,(ବାଘୁଆବାର୍ତ୍ତା): ବେଆଇନ ପିସ୍ତଲ ରାକେଟର ପର୍ଦ୍ଦାଫାଶ କରିଛି ପୁଲିସ୍ । ଏହି ଘଟଣାରେ ୩ ଯୁବକକୁ ଗିରଫ କରିଛି ପୁଲିସ୍ । ସେମାନଙ୍କ ନିକଟରୁ ୩ଟି ପିସ୍ତଲ, ୬ଟି ଜୀବନ୍ତ ଗୁଳି ଜବତ ହୋଇଥିବା ନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଜୟପୁର ଏସଡିପିଓ ଅରୁପ ଅଭିଷେକ ବେହେରା । ସୂଚନାନୁସାରେ, କୋରାପୁଟ ଜିଲ୍ଲା ଜୟପୁର ଅଞ୍ଚଳରେ ଦୀର୍ଘଦିନ ହେବ କିଛି ଯୁବକ ବେଆଇନ ଭାବେ ପିସ୍ତଲ ରଖି ଅସାମାଜିକ କାର୍ୟ୍ୟ ଘଟାଇବା ପାଇଁ ଯୋଜନା କରୁଥିଲେ । କୌଣସି ସୂତ୍ରରୁ ଖବର ପାଇ ଜୟପୁର ସଦର ପୁଲିସ୍ ପ୍ରଥମ ଫମ୍ପୁଣୀ ଗ୍ରାମର ଜଣେ ଯୁବକ ଶଙ୍କର ପ୍ରଧାନଙ୍କ ଉପରେ ଚଢ଼ାଉ କରିଥିଲା । ଚଢ଼ାଉ ସମୟରେ ଶଙ୍କରଠାରୁ ଗୋଟିଏ ପିସ୍ତଲ ଜବତ କରିଥିଲା । ପୁଲିସ୍ ର ଅଧିକ ଜେରା ସମୟରେ ଏହି ପିସ୍ତଲର ଲିଙ୍କରେ ଅନ୍ୟ ଦୁଇ ଯୁବକଙ୍କ ପାଖକୁ ପହଞ୍ଚିଥିଲା । ସେମାନେ ହେଲେ ଦାମାପୁଟର ରାକେଶ କୁମାର ଶୁକ୍ରୀ, ଜୟପୁର ସହର ପାଇକସାହିର ଏମଡି ଅନସର ଅଲ୍ଲୀ ଏମାନଙ୍କଠାରୁ ମଧ୍ୟ ଦୁଇଟି ପିସ୍ତଲ ଜବତ କରିଛି ପୁଲିସ୍ । ତିନି ଅଭିଯୁକ୍ତ ମଧ୍ୟରୁ ମାଷ୍ଟର ମାଇଣ୍ଡ ହେଉଛନ୍ତି ଶଙ୍କର ପ୍ରଧାନ । ତାଙ୍କ ନାଁରେ ଜୟପୁର ସଦର ଥାନାରେ ତିନୋଟି ଅପରାଧିକ ମାମଲା ଥିବାବେଳେ କୁନ୍ଦ୍ରା ଥାନାରେ ଜଣେ ସାମ୍ବାଦିକଙ୍କୁ ଜୀବନରେ ମାରିବା ଭଳି ମାମଲାରେ ଜଡିତ ଅଛନ୍ତି। ଅନ୍ୟପଟେ ରାକେଶ କୁମାର ଶୁକ୍ରୀ ଜଣେ ଓକିଲଙ୍କ ଆକ୍ରମଣ କରିବା ଘଟଣାରେ ଜୟପୁର ଟାଉନ ଥାନାରେ ମାମଲା ରହିଛି । ଅନ୍ୟପଟେ ଗିରଫ ତିନି ଯୁବକଙ୍କଠାରୁ ତିନୋଟି ପିସ୍ତଲ, ୭.୬୫ଏମଏମର ଜୀବନ୍ତ ଗୁଳି, ତିନୋଟି ମୋବାଇଲ ଏବଂ ଏକ ଧଳା ଆପଚି ବାଇକକୁ ଜବତ କରିଥିବା ବେଳେ ପିସ୍ତଲ ରାକେଟର ଚେର କେଉଁଠିକୁ ଲମ୍ବିଛି ଏବଂ ଏହା କେଉଁ ଆସାମାଜିକ କାର୍ୟ୍ୟ ପାଇଁ ବ୍ୟବହାର ହେବାର ଥିଲା ଏବଂ ଗୁଳି କେଉଁଠୁ ଆସିଛି ସେସବୁର ପୁରା ତଦନ୍ତ ଚାଲିଛି ବୋଲି କହିଛନ୍ତି ଜୟପୁର ଏସଡିପିଓ ଅରୁପ ଅଭିଷେକ ବେହେରା ।
