ନୟାଗଡ଼ ଜିଲ୍ଲାର ପ୍ରମୁଖ ଦେବାଳୟ ସମ୍ପତ୍ତି ସୁରକ୍ଷା ପାଇଁ ହାଇଆଲର୍ଟ ବ୍ୟବସ୍ଥା କରନ୍ତୁ ଆଇଜି ସେଣ୍ଟ୍ରାଲ ରେଞ୍ଜ:ଜିଲ୍ଲା କଂଗ୍ରେସ

ନୟାଗଡ଼, (ବାଘୁଆବାର୍ତ୍ତା): ମାତା ବୈଷ୍ଣଦେବୀ ମନ୍ଦିରରୁ ପ୍ରାୟ ୪୦ ଲକ୍ଷ ଟଙ୍କାର ସ୍ବର୍ଣ୍ଣଅଳଙ୍କାର ଚୋରି ହେବା ପରେ ନୟାଗଡ଼ ଜିଲ୍ଲାରେ ଆଇନଶୃଙ୍ଖଳା କୂଳକିନାରା ହଜାଇ ନୟାଗଡ଼ ଏସପିଙ୍କ ପାରିବାପଣିଆ ଉପରେ ପ୍ରଶ୍ନଚିହ୍ନ ଲଗାଇଛି । ଅପରାଧୀ ମାନଙ୍କ ଉପରେ ଅଙ୍କୁଶ ଲଗାଇବାରେ ପୋଲିସ ବ୍ୟବସ୍ଥା ଫେଲ ମାରିଛି । ଜିଲ୍ଲାର ପ୍ରତ୍ୟେକ ଥାନା ଅଞ୍ଚଳରେ ଦୈନନ୍ଦିନ ଚୋରି ରାହାଜାନୀ ସାଧାରଣ ଲୋକଙ୍କ ନିଦ ହଜାଇ ସାରିଲାଣି । ଜିଲ୍ଲାରେ ମହିଳା ଅସୁରକ୍ଷିତ,ଦେଶୀ ମଦ,ଗଞ୍ଜେଇ ବ୍ରାଉନସୁଗାର ଚୋରାବେପାରରେ ନୟାଗଡ଼ ଜିଲ୍ଲା ହବ ହେଇଛି । ଜିଲ୍ଲା ମଧ୍ୟ ଦେଇ ପ୍ରତ୍ୟହ ଗୋଚାଲାଣ ବୃଦ୍ଧି ପାଇଥିବା ବେଳେ ନାବାଳିକା ଦୁଷ୍କର୍ମ ମାମଲା ପୀଡିତା ମାନଙ୍କୁ ଉଦ୍ଧାର କ୍ଷେତ୍ରରେ ଆମ ଜିଲ୍ଲା ବହୁ ପଛରେ ଏବଂ ଅଣନିୟନ୍ତ୍ରିତ ସାଇବର କ୍ରାଇମ ଭଳି ପ୍ରମୁଖ କାରଣ ଏସପିଙ୍କ ଅପାରଗତାକୁ ଆଙ୍ଗୁଳି ନିର୍ଦ୍ଦେଶ କରୁଛି । ଜିଲ୍ଲାରେ ଜଣେ ବରିଷ୍ଠ ପୋଲିସ ଅଧିକାରୀ ଜନୈକ ମହିଳାଙ୍କୁ ତାଙ୍କ ସହିତ ରାତି ବିତାଇବା ପାଇଁ ପ୍ରେମାଳାପ କରିବା ପରେ ନୟାଗଡ଼ ଜିଲ୍ଲାରେ ଖାକୀରେ କଳଙ୍କ ଲାଗି ସାରିଛି । ଏଥିପାଇଁ ନୟାଗଡ଼ ପୋଲିସ ଜିଲ୍ଲାରେ ଏସପି,ଅତିରିକ୍ତ ଏସପିଙ୍କୁ ତୁରନ୍ତ ବଦଳି କରିବା ପାଇଁ ଜିଲ୍ଲା କଂଗ୍ରେସ ସଭାପତି ବରିଷ୍ଠ ଆଇନଜୀବୀ ଶ୍ରୀ ରଣଜିତ ଦାଶ ମାନ୍ୟବର ମୁଖ୍ୟମନ୍ତ୍ରୀଙ୍କୁ ଟୁଇଟ କରି ଦାବୀ ଜଣାଇଛନ୍ତି ।