ଦଶଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବର୍ଷା

ଭୁବନେଶ୍ବର, (ବାଘୁଆବାର୍ତ୍ତା): ଆଗାମୀ ଦଶଦିନ ପର୍ଯ୍ୟନ୍ତ ରାଜ୍ୟରେ ନାହିଁ ବର୍ଷା । ଏବେ ରାଜ୍ୟକୁ ପଶ୍ଚିମା ପବନ ବହୁଥିବାରୁ ମୌସୁମୀ ବାଦଲ ସୃଷ୍ଟି ହୋଇପାରୁନି । ଆଗାମୀ ଦିନରେ ମଧ୍ୟ କୌଣସି ସିଷ୍ଟମ ସୃଷ୍ଟି ହେବା ସମ୍ଭାବନା ନାହିଁ । ଆସନ୍ତା ୧୦ ତାରିଖ ପର୍ଯ୍ୟନ୍ତ ରାଜ୍ୟ ସମେତ ଦେଶର ଅଧିକାଂଶ ସ୍ଥାନରେ ମୌସୁମୀ ନିଷ୍କ୍ରିୟ ରହିବ । ଏପରି ପୂର୍ବାନୁମାନ କରିଛନ୍ତି ବିଶିଷ୍ଟ ପାଣିପାଗ ବିଜ୍ଞାନୀ ଡ.ସୁରେନ୍ଦ୍ର ନାଥ ପଶୁପାଳକ । ହେଲେ ପଶ୍ଚିମ ଉପକୂଳ ସମେତ ଉତ୍ତରପୂର୍ବ ରାଜ୍ୟରେ ବର୍ଷା ହେବ । ୧୦ ତାରିଖରୁ ବାୟୁର ଦିଗ ପରିବର୍ତ୍ତନ ହେବାର ସମ୍ଭାବନା ଥିବାରୁ ୧୧ କିମ୍ବା ୧୨ ତାରିଖ ବେଳକୁ ଉତ୍ତର-ପଶ୍ଚିମ ବଙ୍ଗୋପସାଗରରେ ଏକ ଘୂର୍ଣ୍ଣିବଳୟ ସୃଷ୍ଟି ହୋଇପାରେ । ପରବର୍ତ୍ତୀ ସମୟରେ ଏହା ଲଘୁଚାପର ରୂପ ନେଇ କ୍ରମଶଃ ଓଡ଼ିଶା ବା ସଂଲଗ୍ନ ଉପକୂଳ ଦେଇ ସ୍ଥଳଭାଗକୁ ପ୍ରବେଶ କରିବ । ଏହାଯୋଗୁ ସମଗ୍ର ରାଜ୍ୟରେ ୪ଦିନ ବର୍ଷା ହେବା ସମ୍ଭାବନା ରହିଛି । କିନ୍ତୁ ଭାରି ବର୍ଷା ହେବାର କୌଣସି ସୂଚନା ନାହିଁ । ସେହିପରି ଆସନ୍ତା ୫ ତାରିଖ ପର୍ଯ୍ୟନ୍ତ ରାଜ୍ୟର ଉପକୂଳ ଓ ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ୩୫ରୁ ୩୭ ଡିଗ୍ରି ସେଣ୍ଟିଗ୍ରେଡ୍ ରହିପାରେ । ୯ ତାରିଖରୁ ତାପମାତ୍ରା୍ରେ ଆଉ ଏକ ଡିଗ୍ରି ବୃଦ୍ଧି ସମ୍ଭାବନା ରହିଛି । ୧୦ରୁ ତାପମାତ୍ରା ହ୍ରାସ ପାଇବା ସମ୍ଭାବନା ରହିଛି । ଏହି ସମୟ ଭିତରେ ପ୍ରବଳ ଗରମ ଗୁଳଗୁଳି ଅନୁଭୁତ ହେବ । ରାଜ୍ୟରେ ଏପରି ପାଣିପାଗ ଆସନ୍ତା ଦେବସ୍ନାନ ପୂର୍ଣ୍ଣିମା ପର୍ଯ୍ୟନ୍ତ ଲାଗି ରହିବ ବୋଲି ଆକଳନ କରାଯାଇଛି ।