ଚାଷୀଙ୍କୁ ମିଳିବ ଅନନ୍ୟ ପରିଚୟପତ୍ର

ଭୁବନେଶ୍ୱର, (ବାଘୁଆବାର୍ତ୍ତା): ଏଣିକି ଚାଷୀଙ୍କୁ ମିଳିବ ଅନନ୍ୟ ଚାଷୀ ପରିଚୟପତ୍ର ବା ୟୁନିକ୍ ଫାର୍ମର୍ ଆଇଡି । ଏହି ପରିଚୟପତ୍ରରେ ଆଧାର ନମ୍ବର ଓ ମୋବାଇଲ୍ ନମ୍ବର ସହ ରହିବ ଚାଷୀର ଜମିର ମାଲିକାନା ସମେତ ବିସ୍ତୃତ ବିବରଣୀ । ଏହି ପରିଚୟପତ୍ର ଥିବା ଚାଷୀଙ୍କୁ ସହଜରେ ପିଏମ୍ କିଷାନ ସହାୟତା ମିଳିପାରିବ । ହେଲେ ସେଥିପାଇଁ ପଞ୍ଜୀକରଣ ବାଧ୍ୟତାମୂଳକ । ସେହିପରି ଆଗାମୀ ଦିନରେ ଚାଷୀ ମଣ୍ଡିରେ ଧାନ ବିକ୍ରି କରି ସର୍ବନିମ୍ନ ସହାୟତା ରାଶି(ଏମଏସପି) ପାଇବାକୁ ଏହି ପରିଚୟପତ୍ର ଦ୍ୱାରା ମିଳିବ ଯୋଗ୍ୟତା । ପରିଚୟପତ୍ର ନଥିଲେ ମଣ୍ଡିରେ ଧାନ ବିକ୍ରି କରିବାକୁ ଚାଷୀ ଅସୁବିଧାରେ ପଡ଼ିବେ । କିଷାନ କ୍ରେଡିଟ୍ କାର୍ଡ ଋଣ ମିଳିବାକୁ ସହଜ ହେବ । ଏହା ସହିତ ପ୍ରଧାନମନ୍ତ୍ରୀ ଫସଲ ବୀମା ଯୋଜନା ସମେତ ୭ ଯୋଜନାର ଚାଷୀମାନେ ଲାଭ ନେଇପାରିବେ । ତେବେ କୃଷକ ପଞ୍ଜୀକରଣ ଡିଜିଟାଲ ସିଷ୍ଟମକୁ ଉଭୟ ଓଡ଼ିଶା ଏବଂ ଭାରତ ସରକାରଙ୍କ ମିଳିତ ଭାବେ ବିକାଶ କରିଛନ୍ତି । ଏହା ଦ୍ୱାରା ଚାଷୀ ନିଜ ଅଞ୍ଚଳର କୃଷି ଆଧାରିତ ପରାମର୍ଶ, ଇନପୁଟ୍ ଏବଂ ସତର୍କ ବାର୍ତ୍ତା ପାଇପାରିବ । ଫସଲ ସର୍ଭେ, ଅଭିଯୋଗ ସମାଧାନ ଏବଂ ଯୋଜନା ଯୋଗ୍ୟତା ବ୍ୟବସ୍ଥାରେ ଭାଗ ନେଇପାରିବ । ଚାଷୀମାନେ ଚାଷୀ ପଞ୍ଜୀକରଣ ପୋର୍ଟାଲ୍ କିମ୍ୱା ମୋବାଇଲ୍ ଆପ୍ରେ ପଞ୍ଜୀକରଣ କରିପାରିବେ । ନଚେତ୍ ଜନ ସେବା କେନ୍ଦ୍ର ଯାଇ ପଞ୍ଜୀକରଣ କରିପାରିବେ । ରାଜ୍ୟ କୃଷି ବିଭାଗ ପକ୍ଷରୁ ଏ ନେଇ ବିଭିନ୍ନ ଶିବିର ମଧ୍ୟ ଅନୁଷ୍ଠିତ ହେବ । ସେଠାରେ ସହାୟକମାନେ ଚାଷୀ ପଞ୍ଜୀକରଣ ପ୍ରକ୍ରିୟାରେ ସାହାଯ୍ୟ କରିବେ ବୋଲି ବିଭାଗୀୟ ଅଧିକାରୀ ସୂଚନା ଦେଇଛନ୍ତି ।