ବର୍ଷାରେ ବି ବନ୍ଦ ହେବନି ମାଓ ଶିକାର, ଡ୍ରୋନ୍ ସହାୟତାରେ ଠାବ ହେବ ମାଓ କ୍ୟାମ୍ପ

ରାୟପୁର, (ବାଘୁଆବାର୍ତ୍ତା): ମାଓବାଦୀ ନିପାତ ପାଇଁ ଧାର୍ଯ୍ୟ ହୋଇଥିବା ଲକ୍ଷ୍ୟ (୨୦୨୬ ମାର୍ଚ୍ଚ ୩୧) ପାଖ ହୋଇ ଆସୁଥିବାରୁ ଚଳିତ ବର୍ଷ ବର୍ଷା ଋତୁରେ ମଧ୍ୟ ଅପରେସନ ବନ୍ଦ ନ କରିବାକୁ ସୁରକ୍ଷା ବାହିନୀକୁ ନିର୍ଦ୍ଦେଶ ଦିଆଯାଇଥିବା ସ୍ୱରାଷ୍ଟ୍ର ମନ୍ତ୍ରାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି । ସାଧାରଣତଃ ବର୍ଷା ଦିନେ କେବେ ହେଲେ ସୁରକ୍ଷା ବାହିନୀ ଅପରେସନ କରନ୍ତି ନାହିଁ କି ମାଓବାଦୀମାନେ ମଧ୍ୟ କୌଣସି ପ୍ରକାର ହିଂସା ଭିଆଇବାକୁ ଆସନ୍ତି ନାହିଁ । ବର୍ଷା ଦିନରେ ବଣଜଙ୍ଗଲରେ ନଦୀ-ନାଳ ବଢ଼ୁଥିବାରୁ ଏବଂ ରାସନ ସାମଗ୍ରୀ ମିଳିବା, ଯାତାୟାତ ସମସ୍ୟା ରହିଥାଏ । ତେଣୁ ମାଓବାଦୀମାନେ ଘଞ୍ଚ ଜଙ୍ଗଲର କୌଣସି ଗୋଟିଏ ସ୍ଥାନ ପସନ୍ଦ କରି କ୍ୟାମ୍ପ କରିବା ସହ କ୍ୟାଡରମାନଙ୍କୁ ପ୍ରଶିକ୍ଷଣ ଦେଇଥାନ୍ତି । ପରବର୍ତ୍ତୀ ଶୀତ ଓ ଗ୍ରୀଷ୍ମ ଋତୁରେ କିଭଳି କେଉଁଠାରେ ହିଂସା ଘଟାଇବେ ତାର ବ୍ଲୁପ୍ରିଣ୍ଟ ମଧ୍ୟ ଏହି ସମୟରେ ପ୍ରସ୍ତୁତ କରାଯାଇଥାଏ । ବର୍ଷା ଋତୁ ସରିବା ପରେ ମାଓ ସଙ୍ଗଠନ ଆରମ୍ଭ କରିଥାଏ ଟିସିଓସି (ଟାକ୍ଟିକାଲ କାଉଣ୍ଟର ଅଫେନ୍ସିଭ୍ ମିସନ) । ଚଳିତ ବର୍ଷ ମାଓବାଦୀଙ୍କ ରଣନୀତିକୁ ବିଫଳ କରିବାକୁ ସୁରକ୍ଷା ବାହିନୀ ରଣନୀତି ପ୍ରସ୍ତୁତ କରିଛି । ଛତିଶଗଡ଼, ମହାରାଷ୍ଟ୍ର, ତେଲଙ୍ଗାନା ଓ ଝାଡ଼ଖଣ୍ଡର ଅନେକ ଜଙ୍ଗଲ ଭିତରେ ଯବାନମାନେ କ୍ୟାମ୍ପ ପ୍ରତିଷ୍ଠା କରିସାରିଛନ୍ତି । ବର୍ଷା ଋତୁରେ ମାଓବାଦୀଙ୍କ ସମ୍ଭାବ୍ୟ କ୍ୟାମ୍ପସ୍ଥଳ ବାବଦରେ ଡ୍ରୋନ୍ ସହାୟତାରେ ଚିହ୍ନଟ କରି ଅଚାନକ ହମ୍ଲା କରିବାକୁ ମଧ୍ୟ ଯୋଜନା ହୋଇଛି । ଅପରପକ୍ଷେ, ସିପିଆଇ-ମାଓବାଦୀ ମହାସଚିବ ନମ୍ବାଲା କେଶବରାଓ ଓରଫ ବାସବରାଜ ନିହତ ହେବା ପରେ କ୍ୟାଡରମାନଙ୍କ ମନୋବଳ ଭାଙ୍ଗିଯାଇଥିବା ଜଣାପଡ଼ିଛି । ଖୋଦ୍ ସଙ୍ଗଠନ ପକ୍ଷରୁ ଦିନେ ତଳେ ଏକ ପ୍ରେସ୍ ବିବୃତି ଜାରି କରି ଏହା ସ୍ୱୀକାର କରାଯାଇଛି । ସଙ୍ଗଠନର ମୁଖପାତ୍ର ବିକଳ୍ପ ଏହା ଜାରି କରିଛନ୍ତି । ସେଥିରେ କୁହାଯାଇଛି, ଗତ ୨୧ ତାରିଖରେ ୨୭ ନୁହେଁ ୨୮ ଜଣ ଏନକାଉଣ୍ଟରରେ ପ୍ରାଣ ହରାଇଛନ୍ତି । କମାଣ୍ଡର ନିଲେଶଙ୍କ ମୃତଦେହ ପିଏଲଜିଏ କ୍ୟାଡରମାନଙ୍କ ନିକଟରେ ରହିଛି । ବାସବରାଜ ଓରଫ ବି.ଆର ଦାଦାଙ୍କ ସହ ୩୪ ଜଣ କ୍ୟାଡର ଥିଲେ । ୭ ଜଣ ଖସିଯିବାରେ ସକ୍ଷମ ହୋଇଥିଲେ । କ୍ୟାଡରମାନେ ଘେରାବନ୍ଦୀ କରି ବାସବରାଜଙ୍କୁ ଖସାଇଦେବାକୁ ଉଦ୍ୟମ କରିଥିଲେ । କିନ୍ତୁ ତାଙ୍କର ଜିଦ୍ ଥିଲା ଯୁବ କ୍ୟାଡରମାନେ ପ୍ରଥମେ ଖସିଯାଆନ୍ତୁ । କିନ୍ତୁ ଯବାନଙ୍କ ଘେରାବନ୍ଦୀ କାଟି ଅଧିକ କ୍ୟାଡର ଖସିବାରେ ବିଫଳ ହେଲେ । ଏନକାଉଣ୍ଟରରେ ନାଗେଶ୍ୱର ରାଓ ଓରଫ ଜଙ୍ଗ ନବୀନ, ସଙ୍ଗୀତା, ଭୂମିକା, ବିବେକ, କମଳା, ନାଗେଶ, ରାଜେଶ, ରବି, ସୁନିଏ ସରିତାଙ୍କ ସମେତ ଅନେକ ବରିଷ୍ଠ କ୍ୟାଡର ପ୍ରାଣ ହରାଇଛନ୍ତି । ଯବାନମାନେ ବାସବରାଜଙ୍କୁ ଧରିବା ପରେ ହତ୍ୟା କରିଥିବା ବିବୃତିରେ ଅଭିଯୋଗ କରାଯାଇଛି । ବିଗତ ୪୦ ଦିନ ଧରି ସଙ୍ଗଠନ ପକ୍ଷରୁ ଏକତରଫା ଅସ୍ତ୍ରବିରତି ଘୋଷଣା କରାଯାଇ କୌଣସି ହିଂସା ହୋଇନଥିଲା । ଏହାରି ସୁଯୋଗରେ ଯବାନମାନେ ଅପରେସନ କରିଥିବା ବିବୃତିରେ କୁହାଯାଇଛି । ବାସବରାଜଙ୍କ ସୁରକ୍ଷା ପାଇଁ ସର୍ବଦା ୬୫ ଜଣ କ୍ୟାଡର ରହୁଥିଲେ । ତେବେ ଯବାନଙ୍କ କ୍ରମାଗତ ଅପରେସନ ଯୋଗୁ ଏହି ସଂଖ୍ୟାକୁ ହ୍ରାସ କରାଯାଇଥିଲା । ଏହାପରେ ଏହି କମିଟିର ୭ ଜଣ କ୍ୟାଡର ନିକଟରେ ଆତ୍ମସମର୍ପଣ କରିବା ସହ ବିଶ୍ୱାସଘାତକତା କରି ପୁଲିସକୁ ସଙ୍ଗଠନ ବାବଦରେ ଅନେକ ଗୁପ୍ତ ତଥ୍ୟ ଦେଇଥିବାରୁ ସଙ୍ଗଠନର ବଡ଼ କ୍ଷତି ହେଲା । ଏହାର ପ୍ରତିଶୋଧ ନିଆଯିବ ବୋଲି ପ୍ରେସ ବିବୃତିରେ ଶପଥ ନିଆଯାଇଛି । ଯୁବ କମାଣ୍ଡରମାନଙ୍କ ପାଇଁ ବାସବରାଜ ଆଦର୍ଶ ଥିଲେ । ସେମାନେ ପ୍ରତିଶୋଧ ନେବାକୁ ଶପଥ ଦେଇଥିବା ବିକଳ୍ପ କହିଛନ୍ତି । ଇତି ମଧ୍ୟରେ ବାସବରାଜ ଓ ଅନ୍ୟ ଜଣେ କମାଣ୍ଡର ଭୂମିକାଙ୍କ ପରିବାର ମୃତଦେହ ପାଇବାକୁ ତେଲଙ୍ଗାନା ହାଇକୋର୍ଟଙ୍କ ଶରଣ ନେଇଥିଲେ । ଛତିଶଗଡ଼ ଆସି ମୃତଦେହ ନେବାକୁ ସେମାନଙ୍କୁ କୁହାଯାଇଥିଲା । କିନ୍ତୁ ସେମାନେ ଆସିନଥିଲେ । ତେଣୁ ଆଜି ୧୯ ଜଣଙ୍କ ମୃତଦେହ ପରିବାରବର୍ଗଙ୍କୁ ହସ୍ତାନ୍ତର କରାଯାଇଥିବା ବେଳେ ବାସବରାଜଙ୍କ ସମେତ ୮ ଜଣଙ୍କ ଅନ୍ତ୍ୟେଷ୍ଟି ପୁଲିସ ପକ୍ଷରୁ କରାଯାଇଛି । ବାସବରାଜଙ୍କର ୪ ଭାଇଙ୍କ ମଧ୍ୟରେ ଇଞ୍ଜିନିୟର, ଡାକ୍ତର ଏବଂ ଭିଜିଲାନ୍ସ ଅଫିସର ରହିଛନ୍ତି । ମାଓବାଦୀଙ୍କ ଠାରୁ ଜବତ ହୋଇଥିବା ୩ଟି ଏକେ-୪୭, ୪ଟି ଏସ୍ଏଲ୍ଆର, ୬ଟି ଇନ୍ସାସ୍, ୬ଟି ଥ୍ରୀ ନଟ୍ ଥ୍ରୀ, ଗୋଟିଏ କାର୍ବାଇନ, ୩ଟି ୧୨ ବୋର୍ ଗନ୍, ଗୋଟିଏ ଦେଶୀ ପିସ୍ତଲ, ଗୋଟିଏ ବିଜିଏଲ ଲଞ୍ଚର, ୨ଟି ରକେଟ ଲଞ୍ଚର୍, ୨ଟି ଭରମାର୍ ଚିହ୍ନଟ କରାଯାଇଛି । ଏଗୁଡ଼ିକରୁ ଅଧିକାଂଶ ୨୦୧୦ (ଦାନ୍ତେୱାଡ଼ାର ତାଡ଼ମେଟଲା ଓ ନାରାୟଣପୁରର ଗୱାଡି) ଓ ୨୦୧୭ (ସୁକ୍ମା ଜିଲ୍ଲାର ବୁର୍କାପାଲ) ମାଓବାଦୀ ହିଂସାକାଣ୍ଡ ବେଳ ଯବାନଙ୍କ ଠାରୁ ଲୁଟ୍ ହୋଇଥିଲା ।