ଯୁବକଙ୍କୁ ଛୁରାମାଡ଼

ଖଲ୍ଲିକୋଟ, (ବାଘୁଆବାର୍ତ୍ତା): ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ଡିମିରିଆ ପଞ୍ଚାୟତର ବି. ବରପଲ୍ଲୀ ଗାଁରେ ଅଭାବନୀୟ ଘଟଣା। ଘର ଆଗରେ ଗଣ୍ଡଗୋଳ କରିବାକୁ ମନା କରିବାରୁ ଯୁବକଙ୍କୁ ଛୁରାମାଡ଼ ହୋଇଛି । ତାଙ୍କୁ ଗୁରୁତର ଅବସ୍ଥାରେ ବ୍ରହ୍ମପୁର ସ୍ଥାନାନ୍ତର କରାଯାଇଛି । ସୂଚନାନୁଯାୟୀ, ଖଲ୍ଲିକୋଟ୍ ଥାନା ଅନ୍ତର୍ଗତ ଡିମିରିଆ ପଞ୍ଚାୟତର ବି. ବରପଲ୍ଲୀ ଗ୍ରାମରେ ତ୍ରୟ ବାର୍ଷିକ ଯାତ୍ରା ଚାଲିଥିଲା । ସୋମବାର ବିଳମ୍ଵିତ ରାତିରେ ଗ୍ରାମର ବଚନ ପ୍ରଧାନଙ୍କ ଘର ଆଗରେ କିଛି ଯୁବକ ଗଣ୍ଡଗୋଳ କରୁଥିଲେ। ବଚନ ଏହାକୁ ବିରୋଧ କରିବା ସହ ଗଣ୍ଡଗୋଳ ନକରିବାକୁ କହିଥିଲେ । ଏଥିରେ ଉତ୍ତ୍ୟକ୍ତ ହୋଇ ଝଗଡ଼ା କରୁଥିବା ୪ରୁ ୫ଜଣ ଯୁବକ ବଚନଙ୍କୁ ଛୁରୀ ଓ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ । ଏଥିରେ ବଚନଙ୍କ ପେଟ ଓ ଦେହର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଥିଲା। ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଖଲ୍ଲିକୋଟ୍ ମେଡିକାଲ ଓ ପରେ ବ୍ରହ୍ମପୁର ସ୍ଥାନାନ୍ତର କରାଯାଇଛି । ଘଟଣାସ୍ଥଳରେ ଖଲ୍ଲିକୋଟ ପୁଲିସ ପହଞ୍ଚି ତଦନ୍ତ ଆରମ୍ଭ କରୁଛି।