ଖୁବ୍ ଶୀଘ୍ର ବୁର୍ଲା ଥାନାର ନୂଆ କୋଠା ଉଦ୍ଘାଟନ୍

ବୁର୍ଲା, (ବାଘୁଆବାର୍ତ୍ତା): ଭଙ୍ଗା ଦଦରା କୋଠା ତଳେ ଚାଲିଥିବା ସମ୍ବଲପୁର ଜିଲ୍ଲାର ସବୁଠାରୁ ଗୁରୁତ୍ୱ ବହନ କରୁଥିବା ବୁର୍ଲା ଥାନା ଆଉ କିଛିଦିନ ମଧ୍ୟରେ ନୂତନ କୋଠାକୁ ସ୍ଥାନାନ୍ତର ହେବ । ୩ କୋଟି ୪୫ ଲକ୍ଷ ବ୍ୟୟରେ ନିର୍ମାଣ ହୋଇଥିବା ଏହି ନୂତନ କୋଠା କାମ ଶେଷ ପର୍ଯ୍ୟାୟରେ ପହଞ୍ଚିଲାଣି । ଆସନ୍ତା ମାସ ପ୍ରଥମ ସପ୍ତାହ ଆଡକୁ ଏହି ନୂତନ କୋଠା ଉଦ୍ଘାଟନ ହେବ ବୋଲି ଜଣାପଡିଛି । ଏହି କୋଠା ମୁଖ୍ୟମନ୍ତ୍ରୀ ଉଦ୍ଘାଟନ କରିବେ ବୋଲି ପୁଲିସ ବିଭାଗର କିଛି ବରିଷ୍ଠ ଅଧିକାରୀଙ୍କ ମଧ୍ୟରେ ଆଲୋଚନା ହେଉଥିବା ବେଳେ କିଏ ଉଦ୍ଘାଟନ କରିବେ ତାହା ସ୍ୱଷ୍ଟ ସୂଚନା ମିଳିପାରିନାହିଁ । ହୀରାକୁଦ ଡ୍ୟାମ୍ ନିର୍ମାଣ ସମୟରୁ ସୁରକ୍ଷା ଦୃଷ୍ଟି କୋଣରୁ ବୁର୍ଲା ସହରରେ ଥାନା ପ୍ରତିଷ୍ଠା ହୋଇଥିଲା । କିନ୍ତୁ ଥାନା ପାଇଁ ନିଜସ୍ୱ କୋଠା ନଥିବା ବେଳେ ଡ୍ୟାମ୍ ଡିଭିଜନର ଏକ କୋଠାରେ ଥାନା ସ୍ଥାପନ ହୋଇଥିଲା । ସେହିଦିନ ଠାରୁ ସେହି କୋଠାରେ ଆଜି ପର୍ଯ୍ୟନ୍ତ ବୁର୍ଲା ଥାନା ଚାଲିଛି । ଏହି କୋଠାଟି ପୁରୁଣା ହୋଇଥିବା ବେଳେ ଭଙ୍ଗା ଦଦରା କୋଠାରେ କାର୍ଯ୍ୟ କରୁଛନ୍ତି ପୁଲିସ କର୍ମଚାରୀ । ପୂର୍ବରୁ ଏହି ଥାନା କୋଠା ଦୁର୍ବଳ ଯୋଗୁଁ ଅନେକ ସମୟରେ ଛାତରୁ ସିଲିଙ୍ଗ ଖସିବା ନଜିର ରହିଛି । ଅଳ୍ପକେ ବିପଦରୁ ବର୍ତ୍ତିଯାଇଥିଲେ ପୁଲିସ କର୍ମଚାରୀ । ଏପରିକି ଥାନାରେ ହାଜତ ନ ଥିବାରୁ ପୁଲିସ ଅଫିସର୍ସ ମାନେ ଯେଉଁଠାରେ କାର୍ଯ୍ୟ କରନ୍ତି ସେହି ଅଫିସ୍ କୋଠାରେ ଅପରାଧୀଙ୍କୁ ରଖାଯାଇଥାଏ । ଏଭଳି ଅନେକ ସମସ୍ୟା ଦେଇ ଗତିକରୁଥିବା ଏହି ଗୁରୁତ୍ୱପୂର୍ଣ୍ଣ ଥାନାର ଶୋଚନୀୟ ଅବସ୍ଥାକୁ ନେଇ ବିଭିନ୍ନ ସମୟରେ ପ୍ରଶ୍ନବାଚୀ ସୃଷ୍ଟି ହେଉଥିଲା । ପୂର୍ବ ସରକାରଙ୍କ ସମୟରେ ରାଜ୍ୟର ବିଭିନ୍ନ ସ୍ଥାନରେ ନୂତନ ଥାନା ନିର୍ମାଣ କରାଯାଇଥିଲେ ମଧ୍ୟ ବୁର୍ଲା ଥାନାକୁ ଗୁରୁତ୍ୱ ଦିଆଯାଇ ନଥିଲା । ତେବେ ନୂତନ ସରକାର ଆସିବା ପରେ ବୁର୍ଲା ଥାନାକୁ ଏକ ଅତ୍ୟାଧୁନିକ ଥାନାରେ ପରିଣତ କରିବା ପାଇଁ ପଦକ୍ଷେପ ନେଇଥିବା ଜଣାପଡିଛି । ବୁର୍ଲା ସହରର ପ୍ଲାନେଟୋରିୟମ୍ ଛକ ନିକଟରେ ଥିବା ସରକାରୀ ଜମିକୁ ବୁର୍ଲା ଥାନା ନାମରେ କରାଇ ଏକ ନୂତନ କୋଠା ନିର୍ମାଣ କରାଯାଉଛି । ରାଜ୍ୟ ସରକାର ଏହି ନୂତନ ଥାନା ନିର୍ମାଣ ପାଇଁ ୩ କୋଟି ୪୫ ଲକ୍ଷ ୩୯ ହଜାର ୭୦୪ ଟଙ୍କା ବ୍ୟୟ ବରାଦ କରିଛନ୍ତି । ତିନି ମହଲାକୁ ମିଶାଇ ଚାରିମହଲା ବିଶିଷ୍ଟ ଏହି ନୂତନ କୋଠାରେ ସମସ୍ତ ପ୍ରକାର ସୁବିଧା ସୁଯୋଗ ରହିବ ବୋଲି କୁହାଯାଉଛି । ଅଫିସର୍ସ ଏବଂ କର୍ମଚାରୀଙ୍କ ପାଇଁ ସ୍ୱତନ୍ତ୍ର କାର୍ଯ୍ୟାଳୟ କୋଠାରୀ ରହିବାର ବ୍ୟବସ୍ଥା କରାଯାଇଛି । ବର୍ତ୍ତମାନ ଚାଲୁଥିବା ଏହି ପୁରୁଣା କୋଠାରେ କର୍ମଚାରୀଙ୍କ ପାଇଁ ସ୍ୱତନ୍ତ୍ର ଶୌଚାଳୟ ବ୍ୟବସ୍ଥା ମଧ୍ୟ ନଥିବା ବେଳେ ନୂତନ କୋଠାରେ ସବୁ ପ୍ରକାର ବ୍ୟବସ୍ଥା ଯାହା ଗୋଟିଏ ଥାନା ପାଇଁ ଆବଶ୍ୟକ ସେହି ସବୁ ବ୍ୟବସ୍ଥା ରହିବ ବୋଲି କୁହାଯାଉଛି । ସୂଚନା ଥାଉ କି ବୁର୍ଲା ଥାନା ଅଧିନରେ ମୁଖ୍ୟତଃ ହୀରାକୁଦ ଜଳଭଣ୍ଡାର, ଓଏଚ୍ପିସି, ଭିମ୍ସାର୍, ଭିସୁଟ୍, ସମ୍ବଲପୁର ବିଶ୍ୱବିଦ୍ୟାଳୟ, ଆଇଆଇଏମ୍, କୃଷି ମହାବିଦ୍ୟାଳୟ ସମେତ ଅନେକ ବଡ଼ ବଡ଼ ପ୍ରତିଷ୍ଠାନ ଏବଂ କଳକାରଖାନାର ସୁରକ୍ଷା ବ୍ୟବସ୍ଥା ନିର୍ଭର କରେ । ବୁର୍ଲା ଥାନା ଅଧିନରେ ଚାରୋଟି ପୁଲିସ ଫାଣ୍ଡି ରହିଛି । ତେବେ ଏତେବଡ଼ ଗୁରୁଦାୟିତ୍ୱ ରହିଥିବା ବୁର୍ଲା ଥାନା ଆଗକୁ ନବକଳେବର ହେବାକୁ ଯାଉଛି ।