୧୩ ବର୍ଷ ପରେ ବି ରାଜ୍ୟରେ ପ୍ରତିଷ୍ଠା ହୋଇପାରୁନି ନାଇପର୍

ଭୁବନେଶ୍ୱର, (ବାଘୁଆବାର୍ତ୍ତା): ପଡ଼ୋଶୀ ପଶ୍ଚିମବଙ୍ଗ ସମେତ ଦେଶର ୭ଟି ରାଜ୍ୟରେ ରହିଛି ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ ଫାର୍ମାସ୍ୟୁଟିକାଲ ଏଜୁକେସନ ଆଣ୍ଡ ରିସର୍ଚ୍ଚ ବା ନାଇପର । କୋଭିଡ୍ ସମୟରେ ଅନ୍ୟ ସମସ୍ତ ଶିଳ୍ପ ଅବସ୍ଥା ମାନ୍ଦା ଥିବା ବେଳେ ଔଷଧ ଶିଳ୍ପର ଦ୍ରୁତ ଅଭିବୃଦ୍ଧି ଘଟିଥିଲା । ସେବେଠୁ ଦିନକୁ ଦିନ ଔଷଧ ଓ ଔଷଧଜନିତ ଗବେଷଣା ବଢ଼ିଥିବା ବେଳେ ଓଡ଼ିଶାରେ କିନ୍ତୁ ନାଇପର୍ ପ୍ରତିଷ୍ଠା ହୋଇପାରିନି । ତେବେ ଓଡ଼ିଶାରେ ନାଇପର୍ ପ୍ରତିଷ୍ଠା ପାଇଁ କେନ୍ଦ୍ର ସରକାର ଚାହୁଁଥିବା ୨୦୧୨ ମେ ୨୧ରେ ତତ୍କାଳୀନ କେନ୍ଦ୍ର ସାର ଓ ରସାୟନ ମନ୍ତ୍ରୀ ଶ୍ରୀକାନ୍ତ ଜେନା କହିଥିଲେ । ଏପରିକି ରାଜ୍ୟ ସରକାର ଜମି ଯୋଗାଇ ଦେଲେ ତାହା ସମ୍ଭବ ହୋଇପାରିବ ବୋଲି ଶ୍ରୀ ଜେନା ରାଜ୍ୟବାସୀଙ୍କୁ ସ୍ୱପ୍ନ ଦେଖାଇଥିଲେ । ଏ ନେଇ ସେ ଯୋଜନା ଆୟୋଗ ଓ ରାଜ୍ୟ ସରକାରଙ୍କ ସହ ଆଲୋଚନା କରି ପଦକ୍ଷେପ ନେବେ ବୋଲି ପ୍ରତିଶ୍ରୁତି ମଧ୍ୟ ଦେଇଥିଲେ । ତେବେ ୧୩ ବର୍ଷ ପରେ ବି ରାଜ୍ୟରେ ପ୍ରତିଷ୍ଠା ହୋଇପାରୁନି ନାଇପର୍ । ଅପରପକ୍ଷେ ଗତ ଜାନୁଆରୀ ୧୩ ତାରିଖରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓଡ଼ିଶାରେ ନାଇପର୍ ପ୍ରତିଷ୍ଠା କରିବାକୁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଜେ. ପି. ନଡ୍ଡାଙ୍କୁ ଚିଠି ଲେଖିଥିଲେ । ଭାରତ ବାୟାଟେକ୍ ଓଡିଶାରେ ତାର ଟିକା ଉତ୍ପାଦନ ଶିଳ୍ପ ପ୍ରତିଷ୍ଠା କରୁଛି । ତେଣୁ ଓଡ଼ିଶାରେ ନାଇପର ହେଲେ ରାଜ୍ୟରେ ଫାର୍ମା ଶିଳ୍ପ ପାଇଁ ତାଲିମପ୍ରାପ୍ତ ବ୍ୟକ୍ତି ବାହାରି ପାରିବେ ବୋଲି ଯୁକ୍ତି ବାଢିଥିଲେ ଧର୍ମେନ୍ଦ୍ର । ରାଜ୍ୟରେ ଔଷଧ ଓ ଟିକା ସଂକ୍ରାନ୍ତରେ ଗବେଷଣା ବଢ଼ିବା ସହ ଛାତ୍ର ଓ ଗବେଷକଙ୍କ ସଂଖ୍ୟା ବଢିବ ବୋଲି ସେ କହିଥିଲେ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମଧ୍ୟ ଓଡିଶାରେ ନାଇପର୍ ପ୍ରତିଷ୍ଠା ପାଇଁ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଶ୍ରୀ ନଡ଼ାଙ୍କୁ ଅନୁରୋଧ କରିଛନ୍ତି । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ୨୦୧୬ ଏପ୍ରିଲ ୮ରେ ଏ ନେଇ କେନ୍ଦ୍ରକୁ ଚିଠି ଲେଖିଥିଲେ । ଓଡ଼ିଶାରେ ନାଇପର୍ ପ୍ରତିଷ୍ଠା ପାଇଁ ସେ କେନ୍ଦ୍ର ସରକାରଙ୍କୁ ଅନୁରୋଧ କରିଥିଲେ । ଏପରିକି କ୍ୟାମ୍ପସ୍ ପ୍ରତିଷ୍ଠା ପାଇଁ ଜାଗା ଦେବାକୁ ପ୍ରତିଶ୍ରୁତି ଦେଇଥିଲେ । ନୂଆ ଓଡ଼ିଶା ଫାର୍ମାସୀ ନୀତି ମଧ୍ୟ ଆଣିଥିଲେ । ହେଲେ ଏ ପର୍ଯ୍ୟନ୍ତ ନାଇପର ପ୍ରତିଷ୍ଠା ହୋଇପାରିନି । ଅନ୍ୟପକ୍ଷରେ ନାଇପର୍ ପ୍ରତିଷ୍ଠାକୁ ନେଇ ରାଜ୍ୟର ବିଭିନ୍ନ ସ୍ଥାନରୁ ଦାବି ଉଠିଲାଣି । ସମ୍ବଲପୁରରେ ପ୍ରତିଷ୍ଠା ହେଉ ବୋଲି ସ୍ଥାନୀୟ ଜନସାଧାରଣ ଓ ନେତା ଦାବି କରୁଥିବାବେଳେ ବ୍ରହ୍ମପୁରରେ ଏହି ଦାବି ଅଧିକ ଜୋର ଧରିଛି । ‘ଏକତ୍ର ବାଲେଶ୍ୱର’ ପକ୍ଷରୁ ସେଠାରେ ନାଇପର୍ ପ୍ରତିଷ୍ଠା ପାଇଁ ଦାବି କରାଯାଇଛି । ବ୍ରହ୍ମପୁରରେ ଆଇଜର୍, ସମ୍ବଲପୁରରେ ଆଇଆଇଏମ୍ ଓ ଜଟଣୀରେ ନାଇଜର୍ ଥିବାରୁ ବାଲେଶ୍ୱରକୁ ନାଇପର୍ ଦିଆଯାଉ ବୋଲି ‘ଏକତ୍ର ବାଲେଶ୍ୱର’ର ଆବାହକ ସରୋଜ ଦାଶ ଦାବି କରିଛନ୍ତି ।