କେରଳ ଭଳି ଓଡ଼ିଶାକୁ ବି ଆଗୁଆ ଆସିବ ମୌସୁମୀ

ଭୁବନେଶ୍ୱର, (ବାଘୁଆବାର୍ତ୍ତା): ସ୍ୱାଭାବିକ ସମୟଠାରୁ ୮ ଦିନ ଆଗୁଆ କେରଳରେ ପହଞ୍ଚିଛି ଦକ୍ଷିଣ-ପଶ୍ଚିମ ମୌସୁମୀ ବାୟୁ । ଏପଟେ ଓଡ଼ିଶାରେ ପ୍ରାକ୍ ମୌସୁମୀ ବର୍ଷା ଜାରି ରହିଛି । ଚାରିଆଡ଼େ ମେଘୁଆ ବାଦଲ, କେଉଁଠି ଝିପିଝିପି, ଆଉ କେଉଁଠି ଅସରାଏ ଲେଖାଏଁ ବର୍ଷା । ଅନୁମାନ କରାଯାଉଛି, କେରଳ ଭଳି ଓଡ଼ିଶାକୁ ମଧ୍ୟ ଆଗୁଆ ଆସିବ ମୌସୁମୀ । ପ୍ରାୟ ଦୁଇ ସପ୍ତାହ ଆଗୁଆ ମୌସୁମୀ ଓଡ଼ିଶା ଛୁଇଁପାରେ, ଏଇ ମାସ ଶେଷ ସୁଦ୍ଧା । ଉତ୍ତର-ପଶ୍ଚିମ ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ଲଘୁଚାପ ହିଁ ମୌସୁମୀକୁ ଟାଣି ଆଣିବ । ଶିକ୍ଷା ଓ ଅନୁସନ୍ଧାନ (ସୋଆ) ପରିଚାଳିତ ପରିବେଶ ଓ ଜଳବାୟୁ କେନ୍ଦ୍ର (ସିଇସି) ନିର୍ଦ୍ଦେଶକ ଡ. ଶରତ ଚନ୍ଦ୍ର ସାହୁଙ୍କ ପୂର୍ବାନୁମାନ ହେଲା, ରାଜ୍ୟରେ ଏବେ ଝିପିଝିପି ବର୍ଷା ଲାଗି ରହିବ । ଆସନ୍ତା ୨୬ କିମ୍ବା ୨୭ରେ ଲଘୁଚାପ ସୃଷ୍ଟି ହୋଇପାରେ । ଏହା ପ୍ରଭାବରେ ୨୭ ତାରିଖ ଅପରାହ୍ନରୁ ବର୍ଷା ତୀବ୍ରତା ବଢ଼ିବ । ଆସନ୍ତା ୩୦ ରାତ୍ରି ପର୍ଯ୍ୟନ୍ତ ବର୍ଷା ଲାଗି ରହିପାରେ । ଆସନ୍ତା ୨୮ ଓ ୨୯ ତାରିଖରେ ଉପକୂଳ ଅଞ୍ଚଳ ସମେତ ଅନ୍ୟ କେତେକ ଜିଲ୍ଲାରେ ଅଧିକ ବର୍ଷା ସମ୍ଭାବନା ଅଛି । ମୟୂରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, ଯାଜପୁର, ଢେଙ୍କାନାଳ, ସୁନ୍ଦରଗଡ଼, ଜଗତସିଂହପୁର, କେନ୍ଦ୍ରାପଡ଼ା, ପୁରୀ ଓ ଖୋର୍ଦ୍ଧା ଜିଲ୍ଲାରେ ବର୍ଷା ଅଧିକ ରହିପାରେ । ଏହି ଲଘୁଚାପଜନିତ ବର୍ଷା ଭିତରେ ରାଜ୍ୟକୁ ମୌସୁମୀ ପ୍ରବେଶ କରିପାରେ, ଆସନ୍ତା ୨୮ କିମ୍ବା ୨୯ ତାରିଖ ବେଳକୁ । ଅର୍ଥାତ୍ ସ୍ୱାଭାବିକ ସମୟ ଜୁନ୍ ୧୨ ତାରିଖଠାରୁ ପ୍ରାୟ ଦୁଇ ସପ୍ତାହ ଆଗୁଆ ଆସିପାରେ । ୨୦୦୯ରେ ୨୫ ମେ’ ଓ ୧୯୯୯ରେ ୨୮ ମେ’ରେ ମୌସୁମୀ ଓଡ଼ିଶା ଛୁଇଁଥିଲା। ଭାରତୀୟ ପାଣିପାଗ ବିଭାଗ (ଆଇଏମ୍ଡି) ଘୋଷଣା କରିଛି, ମୌସୁମୀ ଆଜି କେରଳ ଛୁଇଁଛି । ସ୍ୱାଭାବିକ ସମୟ (ଜୁନ୍ ୧) ଠାରୁ ପ୍ରାୟ ସପ୍ତାହେ ଆଗରୁ । ଗତବର୍ଷ ଆସିଥିଲା ମେ’ ୩୦ ତାରିଖରେ । ଗତ ୧୬ ବର୍ଷ ଭିତରେ ଚଳିତବର୍ଷ ମୌସୁମୀ ଅତି ଶୀଘ୍ର ଆସିଛି । ଏହା ପୂର୍ବରୁ ୨୦୦୯ରେ ୨୩ ମେ’ରେ ମୌସୁମୀ କେରଳ ପହଞ୍ଚିଥିଲା, ଯାହାକି ୯ ଦିନ ଆଗୁଆ ଥିଲା ।ଭୁବନେଶ୍ୱର ପାଣିପାଗ କେନ୍ଦ୍ର ସୂଚନା ଅନୁସାରେ ଉତ୍ତର ଉପକୂଳ ଓଡ଼ିଶା ଉପରେ ଏକ ଘୂର୍ଣ୍ଣିବଳୟ ଅଛି । ଏହା ପ୍ରଭାବରେ ରାଜ୍ୟରେ ବର୍ଷା ଲାଗି ରହିଛି । ଏଭଳି ପାଗ ବର୍ତ୍ତମାନ ଜାରି ରହିବ । ୨୭ରେ ପଶ୍ଚିମ କେନ୍ଦ୍ରୀୟ ଓ ଉତ୍ତର ବଙ୍ଗୋପସାଗରରେ ଏକ ଲଘୁଚାପ ସମ୍ଭାବନା ଅଛି । ଏହା ପ୍ରଭାବରେ ବର୍ଷା ଆହୁରି ବଢ଼ିପାରେ । ପୂର୍ବାନୁମାନ ହେଲା, ରବିବାର (୨୫ ତାରିଖ) ଦକ୍ଷିଣ ଓଡ଼ିଶାର ଅନେକ ସ୍ଥାନ ଓ ଉତ୍ତର ଓଡ଼ିଶାର ଅଳ୍ପ କିଛି ଜାଗାରେ ଘଡ଼ଘଡ଼ି ସହ ବର୍ଷା ସମ୍ଭାବନା ଅଛି । ରାୟଗଡ଼ା, କୋରାପୁଟ, ଗଜପତି, ଗଞ୍ଜାମ, ମୟୂରଭଞ୍ଜ, କେନ୍ଦୁଝରରେ ପ୍ରବଳ ବର୍ଷା, ୩୦-୪୦ କିମି ବେଗରେ ପବନ, ବଜ୍ରପାତ ହୋଇପାରେ । ମାଲକାନଗିରି, ବାଲେଶ୍ୱର, ସୋନପୁର, ଝାରସୁଗୁଡ଼ା, ସମ୍ବଲପୁର, କନ୍ଧମାଳରେ ବି ବଜ୍ରପାତ, ପବନ ଆଶଙ୍କା ଅଛି । ବର୍ତ୍ତମାନ ଏଭଳି କାଳବୈଶାଖୀ ବର୍ଷା ଲାଗି ରହିବ । ୨୮, ୨୯ ଓ ୩୦ରେ ଅନେକ ସ୍ଥାନରେ ମଧ୍ୟମରୁ ପ୍ରବଳ ହୋଇପାରେ । ଭୁବନେଶ୍ୱର ପାଣିପାଗ କେନ୍ଦ୍ର ନିର୍ଦ୍ଦେଶିକା ଡ. ମନୋରମା ମହାନ୍ତି କହିଛନ୍ତି, ଲଘୁଚାପ ସମ୍ଭାବନା ଅଛି । ମାତ୍ର ବାତ୍ୟାର କୌଣସି ସମ୍ଭାବନା ନାହିଁ । ତେଣୁ ଏଭଳି ଗୁଜବରେ ବିଶ୍ୱାସ କରି ଅଯଥାରେ ଆତଙ୍କିତ ହୁଅନ୍ତୁ ନାହିଁ । ରାଜ୍ୟରେ ବର୍ଷା ଯୋଗୁ ତାତି ପୂରା ଛୁ’ ହୋଇଯାଇଛି । ପ୍ରାୟତଃ ତାପମାତ୍ରା ୩୧-୩୩ ଡିଗ୍ରୀ ଭିତରେ ଅଛି । ବାଲେଶ୍ୱର, ଚାନ୍ଦବାଲି, ଜଗତସିଂହପୁର, କେନ୍ଦ୍ରାପଡ଼ା, ସୋନପୁର, ବଲାଙ୍ଗିର, ଝାରସୁଗୁଡ଼ା, ପାରାଦୀପରେ ହାଲୁକା ବର୍ଷା ହୋଇଛି । ବର୍ତ୍ତମାନ ତାତିରୁ ଆଶ୍ୱସ୍ତି ମିଳିଛି । ସୋଆ ସିଇସି ନିର୍ଦ୍ଦେଶକ ଡ. ସାହୁ କହିଛନ୍ତି, ୩୦ ତାରିଖ ଯାଏଁ ଓଡ଼ିଶାରେ ବର୍ଷା ରହିବ । ତା’ପରେ ବର୍ଷା କମିବ । ଏପରିକି ଜୁନ୍ ୨ ତାରିଖ ବେଳକୁ ପୁଣି ଗରମ ବଢ଼ିପାରେ । ଆଇଏମ୍ଡି ଅନୁସାରେ ମୌସୁମୀ ରବିବାର ସୁଦ୍ଧା ତାମିଲନାଡୁ ଓ କର୍ଣ୍ଣାଟକର କେତେକ ଅଞ୍ଚଳ ଛୁଇଁପାରେ । ଜୁନ ୪ ତାରିଖ ସୁଦ୍ଧା ଏହା କେନ୍ଦ୍ରୀୟ ଓ ପୂର୍ବ ଭାରତରେ ପ୍ରବେଶ କରିବା ସମ୍ଭାବନା ଅଛି । ଗତ ଏପ୍ରିଲରେ ଆଇଏମଡି ଆକଳନ କରିଥିଲା, ଏଥର ମୌସୁମୀ ଋତୁରେ ଏଲ୍-ନିନୋର କୌଣସି ସମ୍ଭାବନା ନାହିଁ । ଚଳିତବର୍ଷ ସ୍ୱାଭାବିକ ଠାରୁ ଅଧିକ ବର୍ଷା ହେବ । ଗତ ୧୫୦ ବର୍ଷ ଭିତରେ କେରଳରେ ମୌସୁମୀ ପହଞ୍ଚିବାର ତାରିଖ ଭିନ୍ନ ଭିନ୍ନ ରହିଆସିଛି । ୧୯୧୮ରେ ମୌସୁମୀ ମେ ୧୧ ତାରିଖରେ କେରଳ ପହଞ୍ଚିଥିଲା, ଯାହାକି ସର୍ବକାଳୀନ ରେକର୍ଡ । ସେହିପରି ୧୯୭୨ରେ ଜୁନ ୧୮ ତାରିଖରେ କେରଳ ଛୁଇଁଥିଲା ମୌସୁମୀ, ଯାହାକି ସବୁଠାରୁ ବିଳମ୍ବିତ ତାରିଖ ।