ତାଲା ମାରି ସିଲ୍ କଲା ପ୍ରଶାସନ, ପୁରୁଣା ସରକାରୀ ଘରକୁ ଭାଙ୍ଗି ହେବ ନୂଆ ପ୍ରକଳ୍ପ

ଭୁବନେଶ୍ୱର, (ବାଘୁଆବାର୍ତ୍ତା): ଖୁବଶୀଘ୍ର ଭୁବନେଶ୍ୱର ୟୁନିଟ- ୨ ଅଞ୍ଚଳ ପାଇବ ନୂଆରୂପ । ପୁରୁଣା ସରକାରୀ ଘରକୁ ଭାଙ୍ଗି ନୂଆ ପ୍ରକଳ୍ପ କରିବା ପାଇଁ ପ୍ରସ୍ତୁତ ହୋଇଛି ଯୋଜନା । ବର୍ଷବର୍ଷ ଧରି ସରକାରୀ ଘରକୁ ଜବରଦଖଲ କରିଥିବା ଲୋକଙ୍କୁ ବାହାର କରି ନିଜ ଦଖଲକୁ ନେଉଛି ପ୍ରଶାସନ । କେଉଁଠି ଫଳ ଦୋକାନ ତ କେଁଉଠି ବେତ ଦୋକାନ । ଭୁବନେଶ୍ୱର ୟୁନିଟ- ୨ ଅଞ୍ଚଳରେ ଏମିତି ୯୦ଟି ସରକାରୀ ଘରକୁ ଲୋକ ମାଡ଼ି ବସିଥିଲେ । କେଉଁଠି ପରିବାର ସହ ଲୋକ ରହୁଥିଲେ । ଏବେ ଜବରଦଖଲ କରିଥିବା ଲୋକଙ୍କୁ ହଟାଇ ପ୍ରଶାସନ ଏସବୁ ଘରକୁ ନିଜ ଦଖଲକୁ ନେଉଛି । ଫାଟକରେ ତାଲା ପକାଯାଇ ସିଲ୍ କରାଯାଉଛି । ଏସବୁ ଘରେ ରହୁଥିବା ଓ ଦୋକାନ କରିଥିବା ଲୋକ କହୁଛନ୍ତି, ଜବରଦଖଲ ନେଇ ଜାଣିନାହାନ୍ତି । ସେମାନଙ୍କୁ ଘର ଦେଇଥିବା ଲୋକଙ୍କୁ ଟଙ୍କା ଦେଉଥିଲେ । ଭୁବନେଶ୍ବର ୟୁନିଟ- ୨ ଅଞ୍ଚଳରେ ରାଜ୍ୟ ସରକାର କ୍ୟାପିଟାଲ ରି-ଡେଭଲପମେଣ୍ଟ ପ୍ରକଳ୍ପ କରିବାକୁ ଯୋଜନା କରିଛନ୍ତି । ଏଥିପାଇଁ ୪୧୦ଟି ସରକାରୀ ଘର ଭଙ୍ଗାଯିବ । ୧୯୦ଟି ଘର ଖାଲିଥିବା ବେଳେ ୯୦ଟି ଘରେ ବେଆଇନ ଭାବେ ଲୋକ ରହୁଛନ୍ତି ଓ ଦୋକାନ କରିଛନ୍ତି । ଘର ଖାଲି କରିବାକୁ ବାରମ୍ୱାର କୁହାଯାଇଥିଲେ ବି ଲୋକ ବେପାରୁଆ ଭାବେ ରହୁଥିଲେ । ଏବେ ଘର ଖାଲି କରାଯାଉଛି ।