ସରକାର ବଦଳିଲା, କାମ ଅଟକିଲା

ଖଲ୍ଲିକୋଟ, (ବାଘୁଆବାର୍ତ୍ତା): ନିର୍ବାଚନ ପୂର୍ବରୁ ଭୋଟ୍ ହାତେଇବା ପାଇଁ ହୋଇଥିଲା ଷ୍ଟ୍ରିଟ ଲାଇଟ୍ ଟେଣ୍ଡର, କାର୍ଯ୍ୟ ମଧ୍ୟ ଆରମ୍ଭ ହୋଇଥିଲା । ସରକାର ବଦଳିବା ପରେ ବଦଳିଗଲା ଚିତ୍ର । ଅଧପନ୍ତରିଆ ଭାବେ କାମ ଛାଡି ଛୁ ମାରିଛି ଠିକାଦାର । ଫଳରେ ସନ୍ଧ୍ୟା ହେଲେ ଅନ୍ଧାର ହୋଇଯାଉଛି ଖଲ୍ଲିକୋଟର ରାସ୍ତାଘାଟ । ଆଲୋକିତ ହେବ ଖଲ୍ଲିକୋଟ ବିଜ୍ଞାପିତ ଅଞ୍ଚଳ । ସେଥିପାଇଁ ସାଧାରଣ ନିର୍ବାଚନ ପୂର୍ବରୁ ୨୦୨୩ରେ ରାଜ୍ୟ ସ୍ତରୀୟ ଟେଣ୍ଡର ହୋଇଥିଲା । ଖଲ୍ଲିକୋଟ୍ରେ ୬୧୦ଟି ଷ୍ଟ୍ରିଟ୍ ଲାଇଟ୍ ଲଗାଇବା ଲାଗି ଠିକାଦାର ନିଯୁକ୍ତ ହୋଇଥିଲେ । ନିର୍ବାଚନକୁ ଆଖି ଆଗରେ ରଖି ତରବରିଆ ଭାବେ ୨୫୨ଟି ଲାଇଟ୍ ଲଗାଯାଇଛି । ରାଜ୍ୟ ସରକାର ବଦଳିବା ପରେ ଅଟକି ଯାଇଛି ଆଲୋକୀକରଣ କାମ । ଲାଗିଥିବା ଲାଇଟ୍କୁ ବିଦ୍ୟୁତ୍ ସଂଯୋଗ ହୋଇନାହିଁ । ସେଗୁଡ଼ିକ ନଷ୍ଟ ହେବାକୁ ବସିଲାଣି । କେଉଁଠି ଷ୍ଟ୍ରିଟ୍ ଲାଇଟ ଉପରେ ଲଟାବୁଦା ମାଡିଗଲାଣି ତ ଆଉ କେଉଁଠି ଗଛ ଡାଳ ଆଢୁଆଳରେ ଲୁଚି ଯାଇଛି । ଖଲ୍ଲିକୋଟ୍ ବିଜ୍ଞାପିତ ଅଞ୍ଚଳ ଅନ୍ଧାରରେ ଥିବା ସମୟରେ କୋଟିକୋଟି ଟଙ୍କାର ଟେଣ୍ଡର କାହା ସ୍ୱାର୍ଥରେ ବୋଲ ପ୍ରଶ୍ନ ଉଠିଛି । ସୂଚନା ଅଧିକାର ଆଇନ୍ ବଳରେ ମିଳିଥିବା ତଥ୍ୟ ଖୋଲି ଦେଇଛି, ଷ୍ଟ୍ରିଟ୍ ଲାଇଟ୍ ଟେଣ୍ଡର ସତ । କିଏ କରିଥିଲା କାହା ସ୍ୱାର୍ଥରେ ଟେଣ୍ଡର? ସେ ବାବଦରେ କୌଣସି ତଥ୍ୟ ଗଞ୍ଜାମ ଗ୍ରାମ୍ୟ ଉନ୍ନୟନ ବିଭାଗ କି ଖଲ୍ଲିକୋଟ ଏନ୍ଏସି ପାଖରେ ନାହିଁ । ସେପଟେ ଖୁବ୍ଶୀଘ୍ର ଷ୍ଟ୍ରିଟ୍ ଲାଇଟ ଗୁଡିକ କାର୍ଯ୍ୟକ୍ଷମ ହେବ ବୋଲି କହିଛନ୍ତି ଗଞ୍ଜାମ ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ା । ବିଜ୍ଞାପିତ ଅଞ୍ଚଳରେ ଲୋକେ ଅନ୍ଧାରରେ ଯାତାୟତ କରୁଥିବା ବେଳେ ଆଲୋକୀକରଣ ଆଳରେ କୋଟିକୋଟି ଟଙ୍କା ପାଣିରେ ପଡିଥିବା ଅଭିଯୋଗ ହୋଇଛି ।