ମହାପ୍ରଭୁଙ୍କ ମହାପ୍ରସାଦକୁ ପୁଣି ଅସମ୍ମାନ, ହୋଟେଲର ଡାଇନିଂରେ ବସି କଲେ ପ୍ରସାଦ ସେବନ

ପୁରୀ, (ବାଘୁଆବାର୍ତ୍ତା): ମହାପ୍ରଭୁଙ୍କ ମହାପ୍ରସାଦକୁ ପୁଣି ଅସମ୍ମାନ। ପୁରୀର ଏକ ତାରକା ହୋଟେଲରେ ଦେଖିବାକୁ ମିଳିଛି ଏଭଳି କିଛି ଦୃଶ୍ୟ ।ଏକ ହୋଟେଲର ଡାଇନିଂ ଟେବୁଲ୍ରେ ବସି କିଛି ପର୍ଯ୍ୟଟକ ମହାପ୍ରସାଦ ସେବନ କରୁଥିବାର ଦେଖିବାକୁ ମିଳିଛି।ଯାହାର ଭିଡ଼ିଓ ସୋସିଆଲ୍ ମିଡିଆରେ ଭାଇରାଲ ହେବାର ଲାଗିଛି । ସେପଟେ ଏହି ଖବର ପ୍ରଘଟ ହେବା ପରେ ଜଗନ୍ନାଥ ପ୍ରେମୀ ଓ ସେବାୟତଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି । ଏହା ମହାପ୍ରସାଦକୁ ସଂପୂର୍ଣ୍ଣ ଅସମ୍ମାନ ବୋଲି ସ୍ପଷ୍ଟ ଜଣାପଡୁଛି । କୋଟି କୋଟି ଜଗନ୍ନାଥ ପ୍ରେମୀଙ୍କ ଭାବାବେଗ ସହିତ ଜଡ଼ିତ ମହାପ୍ରଭୁଙ୍କ ମହାପ୍ରସାଦ ଦୁର୍ମୂଲ୍ୟ ହୋଇଥିବା ବେଳେ ଏଭଳି କାର୍ଯ୍ୟ ଅତ୍ୟନ୍ତ ନିନ୍ଦନୀୟ । ଡାଇନିଂରେ ବସି ଖାଉଥିବା ପର୍ଯ୍ୟଟକ ଓଡ଼ିଆ ଲୋକ ବୋଲି ଜଣାପଡିଛି । ଜଣେ ଓଡ଼ିଆ ହୋଇ କିପରି ଭାବେ ମହାପ୍ରଭୁଙ୍କ ମହାପ୍ରସାଦଙ୍କୁ ଅସମ୍ମାନ କରିଲେ, ତାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏପିରିକି ଜଣେ ବ୍ରାହ୍ମଣ ମହାପ୍ରସାଦ ପରଷୁଥିବାର ଦେଖିବାକୁ ମିଳିଛି । ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦର୍ଶନ କଲେ ଯେତିକି ପୁଣ୍ୟ ମିଳେ, ତାଠୁ ଅଧିକ ମହାପ୍ରସାଦ ସେବନ କଲେ ପୁଣ୍ୟ ମିଳିଥାଏ ବୋଲି ବିଶ୍ୱାସ ରହିଛି। ଓଡ଼ିଆ ଲୋକ ଏଭଳି କାର୍ଯ୍ୟ କରିବା ଏବଂ ଜଣେ ବ୍ରାହ୍ମଣ ମହାପ୍ରସାଦଙ୍କୁ ଏଭଳି ଅସମ୍ମାନ କରିବାକୁ ଜଗନ୍ନାଥ ପ୍ରେମୀ ନିନ୍ଦା କରିଛନ୍ତି।