ରାଉରକେଲା ଜିମ୍ନାଷ୍ଟିକ କେନ୍ଦ୍ର ମୁଖ୍ୟ କୋଚଙ୍କ ନାମରେ ସଙ୍ଗୀନ ଅଭିଯୋଗ

ରାଉରକେଲା, (ବାଘୁଆବାର୍ତ୍ତା): ତୃଣମୂଳସ୍ତରରୁ କ୍ରୀଡ଼ାର ବିକାଶ ନେଇ ରାଜ୍ୟ ସରକାର କ୍ରୀଡ଼ା ଭିତ୍ତିଭୂମିର ନିର୍ମାଣ ଏବଂ ପ୍ରଶିକ୍ଷଣ କେନ୍ଦ୍ରମାନ ପ୍ରତିଷ୍ଠା କରିଛନ୍ତି । କିନ୍ତୁ ତୃଣମୂଳ ସ୍ତରର ପ୍ରଶିକ୍ଷଣ କେନ୍ଦ୍ରରେ କୋଚମାନଙ୍କ ବିଶୃଙ୍ଖଳିତ ଆଚରଣ କୁନି କୁନି ପିଲାମାନଙ୍କୁ କ୍ରୀଡ଼ା ପ୍ରତି ବିମୁଖ କରାଉଛି । ଏମିତି କିଛି ଅଭିଯୋଗ ଆସିଛି ରାଉରକେଲା ବହୁମୁଖୀ ଇନ୍ଡୋର ଷ୍ଟାଡିୟମରେ ଥିବା ଗ୍ରାସ୍ରୁଟ୍ ଜିମ୍ନାଷ୍ଟିକ କେନ୍ଦ୍ରର ମୁଖ୍ୟ କୋଚ୍ ରମେଶ ବେହେରାଙ୍କ ନାମରେ । କେନ୍ଦ୍ରରେ ପ୍ରଶିକ୍ଷଣ ନେଉଥିବା ଜଣେ ଜିମ୍ନାଷ୍ଟଙ୍କ ଅଭିଭାବକ ଏନେଇ ଓଡ଼ିଶା ଜିମ୍ନାଷ୍ଟିକ ସଂଘର ସମ୍ପାଦକ ଅଶୋକ କୁମାର ସାହୁଙ୍କୁ ଲିଖିତ ଅଭିଯୋଗ କରିଛନ୍ତି । ମୁଖ୍ୟ କୋଚ୍ଙ୍କ ବ୍ୟବହାରରେ ପିଲାମାନେ ଅତିଷ୍ଠ ହୋଇ ପଡ଼ିଲେଣି । କେନ୍ଦ୍ର ମଧ୍ୟକୁ ଅଭିଭାବକମାନଙ୍କୁ ପ୍ରବେଶ ଅନୁମତି ନଥିବାବେଳେ ନିଦ୍ଦିଷ୍ଟ ଜଣେ ମହିଳାଙ୍କୁ କିନ୍ତୁ ପ୍ରବେଶ ଅନୁମତି ଦିଆଯାଉଛି । ସେ ବିଭିନ୍ନ କଥାରେ ମୁଣ୍ଡ ପୂରାଉଛନ୍ତି । ଏନେଇ ଅଭିଯୋଗ କରିବା ପରେ ମୁଖ୍ୟ କୋଚ ପିଲାମାନଙ୍କୁ ନିର୍ଯାତନା ଦେଉଛନ୍ତି । ଯେଉଁଥିପାଇଁ ପିଲାମାନେ ଭୟରେ ଅଭ୍ୟାସ କରିବାକୁ ଯାଉ ନାହାନ୍ତି । ଯଦିଓ ଏ ସଂପର୍କରେ ଓଡ଼ିଶାର ମୁଖ୍ୟ କୋଚଙ୍କ ଦୃଷ୍ଟି ଆକର୍ଷଣ କରାଯାଇଥିଲା ମାତ୍ର କିଛି ଫଳ ମିଳି ନାହିଁ । ଏମ୍ଏନ୍ଏସ ସ୍ପୋର୍ଟ୍ସ ଜିମ୍ନାଷ୍ଟିକ କେନ୍ଦ୍ରର ପରିଚାଳନା ଦାୟିତ୍ୱରେ ରହିଛି । ଲିଖିତ ଅଭିଯୋଗ ପରେ ବୁଧବାର ଏମ୍ଏନ୍ଏସର ପ୍ରୋଜେକ୍ଟ ମ୍ୟାନେଜର ରାଉରକେଲା ଗସ୍ତ କରି ଅଭିଭାବକମାନଙ୍କ ସହ ଆଲୋଚନା କରିଛନ୍ତି । ଗୁରୁବାର ଅଭିଯୋଗ ସଂପର୍କରେ ଆଲୋଚନା ହେବ ବୋଲି ଜଣା ପଡ଼ିଛି । ରାଜ୍ୟ ସରକାର କ୍ରୀଡ଼ାର ବିକାଶ ନେଇ ଶହ ଶହ କୋଟି ଟଙ୍କା ଖର୍ଚ୍ଚ କରୁଛନ୍ତି । ମାତ୍ର କିଛି ବିଶୃଙ୍ଖଳିତ ବ୍ୟକ୍ତି ସରକାରଙ୍କ ଉଦ୍ଦେଶ୍ୟକୁ ନିଜର ବ୍ୟକ୍ତିଗତ ସ୍ୱାର୍ଥ ପାଇଁ ବାଟବଣା କରୁଛନ୍ତି । କ୍ରୀଡ଼ା ବିଭାଗ ଏ ଦିଗରେ ଦୃଷ୍ଟି ଦେବା ଉଚିତ । ଅଭିଯୋଗର ତଦନ୍ତ କରି ମୁଖ୍ୟ କୋଚଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ବୋଲି ଅଭିଭାବକମାନେ ଦାବି କରିଛନ୍ତି ।