ଯାଜପୁର, (ବାଘୁଆବାର୍ତ୍ତା): ଯାଜପୁର ଜିଲ୍ଲା ପାଣିକୋଇଲି ଥାନା ତଣ୍ଡରା ଗାଁ ନିକଟ ଖରସ୍ରୋତା ନଦୀରୁ ଯୁବକ ନିଖୋଜ ଘଟଣା । କିଛି ସମୟର ଖୋଜାଖୋଜି ପରେ ମଙ୍ଗଳବାର ସକାଳୁ ମିଳିଲା ଯୁବକଙ୍କ ମୃତଦେହ । ପାଣିକୋଇଲି ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇଛି । ଖବର ଅନୁଯାୟୀ, ସୋମବାର ଅପରାହ୍ନରେ ସ୍ଥାନୀୟ ତଣ୍ଡରା ଗାଁର କୈଳାସ ମଳିକଙ୍କ ପୁଅ ସିଦ୍ଧାନ୍ତ ମଳିକ ନିଜ ବଳଦ ନେଇ ଖରସ୍ରୋତା ନଦୀ ପଠାକୁ ଯାଇଥିଲେ । ଏହି ସମୟରେ ଲୁଗା ସଫା କରିବାକୁ ନଦୀ ଯାଇଥିବା ବେଳେ ହଠାତ୍ ସେ ନିଖୋଜ ହୋଇଯାଇଥିଲେ । ତାଙ୍କୁ କୁମ୍ଭୀର ଟାଣି ନେଇଥିବା ଗ୍ରାମବାସୀ ଓ ପରିବାର ଲୋକେ କହିଥିଲେ । ପରେ ପୋଲିସ ଓ ବନବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଅଗ୍ନିଶମ ବାହିନୀର ସହାୟତାରେ ସର୍ଚ୍ଚ ଅପରେସନ ଆରମ୍ଭ କରିଥିଲେ । ହେଲେ ସଂଧ୍ୟା ହେବାରୁ ଅପରେସନକୁ ବନ୍ଦ କରାଯାଇଥିଲା । ପରେ ସୋମବାର ଦିନ ସକାଳୁ ପୁଣି ଥରେ ଖୋଜାଖୋଜି ଆରମ୍ଭ ହୋଇଥିଲା । ଆଉ ମୃତଦେହ ମିଳିଥିଲା । ତେବେ ଦେହରେ କୌଣସି ଗଭୀର କ୍ଷତ ଚିହ୍ନ ନଥିବାରୁ କୁମ୍ଭୀର ଟାଣି ନେବା କଥାକୁ ଖଣ୍ଡନ କରିଛନ୍ତି ବନବିଭାଗ ଅଧିକାରୀ । ବାକି ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ରିପୋର୍ଟ ଆସିବା ପରେ ମୃତ୍ୟୁର ସଠିକ କାରଣ ଜଣାପଡିବ ବୋଲି ଆଶା କରାଯାଉଛି ।
ନଦୀରୁ ମିଳିଲା ନିଖୋଜ ଯୁବକଙ୍କ ମୃତଦେହ
