ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ବେଆଇନ ଭାବେ ଲଘୁ ଖଣିଜ ଦ୍ରବ୍ୟ ଲୁଟ ହେଉଥିବା ବେଳେ ଏବେ ନୂଆ ଫଣ୍ଡା ଆପଣାଇଛି ଖଣି ବିଭାଗ । ଖଣି ମାଫିଆମାନେ ବିଜେପି ଲିଙ୍କରେ ଥିଲେ ସାତଖୁଣ ମାଫ୍ କରାଯାଉଥିବା ଅଭିଯୋଗ ହୋଇଛି । ଜିଲ୍ଲାରେ ଅନେକ ଖଣିର ସାଟେଲାଇଟ୍ ସର୍ଭେ କରାଯାଇଥିବା ବେଳେ କିଛି ଖଣିକୁ ଜରିମାନା କରାଯିବା ଏବଂ ଅନ୍ୟ କିଛି ଖଣିକୁ ଜାଣିଶୁଣି ଘଣ୍ଟା ଘୋଡ଼ା ଯାଉଥିବା ଅଭିଯୋଗ ହେଉଛି । ଜିଲ୍ଲା ଖଣି ଅଧିକାରୀ ଓ ପୁଲିସର ଭୂମିକାକୁ ନେଇ ପ୍ରଶ୍ନ ଉଠାଇଛନ୍ତି ଅନେକ ଲିଜ୍ଧାରୀ । ଦଳ ଚାପାରେ ଖଣି ଅଧିକାରୀ ଚେପା ହୋଇଯାଉଥିବା ଅଭିଯୋଗ ହେଉଛି । ନେତାଙ୍କ ସ୍ମିତ ହାସ୍ୟରେ ବେଆଇନ କାର୍ଯ୍ୟ ପ୍ରତି ଆଖିବୁଜି ଦିଆଯାଉଛି । ସେହିଭଳି ଏକ ଘଟଣା ନୟାଗଡ଼ ଜିଲ୍ଲା ଖଣ୍ଡପଡ଼ା ତହସିଲ ଅଞ୍ଚଳରେ ଦେଖାଯାଇଛି । ଜିଲ୍ଲାର ବିଭିନ୍ନ ଖଣିରେ ଖଣି ଅଧିକାରୀ ଓ ପୁଲିସ ଚଢ଼ାଉ କରି ବାହାବା ସାଉଣ୍ଟୁଥିବା ବେଳେ ଦହିଖାଇ ଖଣି ପ୍ରତି ଆଖିବୁଜି ଦେବାର କାରଣ କ’ଣ ବୋଲି ପ୍ରଶ୍ନ ଉଠିଛି । ନୟାଗଡ଼ ଜିଲ୍ଲା ସିଂଘାପଡ଼ା ପଞ୍ଚାୟତ ବେଡ଼ାଙ୍ଗୀ ମୈାଜାରେ ରହିଥିବା ଏହି ଖଣିରେ ବେଆଇନ ଖନନ ଚାଲୁଛି । ଅନୁମତିଠାରୁ ଶହେ ଗୁଣ ଅଧିକ ଖଣି ଖନନ କରାଯାଇଥିବା ବେଳେ ବେଆଇନ ବ୍ଲାଷ୍ଟିଂ କରାଯାଉଛି । ତହସିଲ ପକ୍ଷରୁ ଏହି ଖଣି ନିଲାମ କରାଯାଇଥିବା ବେଳେ ୨ ହଜାରରୁ ୩ ହଜାର କ୍ୟୁବିକ୍ ମିଟର ଖଣି ଖନନ ପାଇଁ ଅନୁମତି ଦିଆଯାଇଥିଲା । ଏହି ଖଣି ଏବେ ୨ ଲକ୍ଷ କ୍ୟୁବିକ୍ ମିଟର୍ ଖନନ ହୋଇ ସାରିଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଦୀର୍ଘଦିନ ଧରି ଏହି ଖଣି ଚାଲିଥିବା ବେଳେ କାହିଁକି ତହସିଲ, ଖଣି ବିଭାଗ ଓ ପୁଲିସ ନୀରବ ଦ୍ରଷ୍ଟା ସାଜିଛି ବୋଲି ଅଭିଯୋଗ ହୋଇଛି । ବେଆଇନ ବ୍ଲାଷ୍ଟିଂ ଦ୍ୱାରା ସ୍ଥାନୀୟ ଅଞ୍ଚଳରେ ବ୍ୟାପକ ସମସ୍ୟା ସୃଷ୍ଟି ହେଉଥିବା ବେଳେ ସ୍ଥାନୀୟ ବିଧାୟକଙ୍କ ପରୋକ୍ଷ ସମର୍ଥନ ଏହି ଖଣି ମାଫିଆଙ୍କ ପ୍ରତି ରହିଥିବା ଆଲୋଚନା ହେଉଛି । ଖଣି ଅଧିକାରୀ ଉକ୍ତ ଖଣିର ସାଟେଲାଇନ ସର୍ଭେ କରି କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି।
