ଜଳେଶ୍ବରରେ ପୋଲିସ ଉପରକୁ ଆକ୍ରମଣ ଘଟଣା, ୪ ଗିରଫ

ବାଲେଶ୍ୱର, (ବାଘୁଆବାର୍ତ୍ତା): ଜଳେଶ୍ବରରେ ପୋଲିସ ଉପରକୁ ଆକ୍ରମଣ। ଜଳେଶ୍ୱର ଥାନା SI ଓ ମହିଳା କନଷ୍ଟେବଳଙ୍କୁ ଆକ୍ରମଣ କଲେ ବେଆଇନ ଚାନ୍ଦା ଆଦାୟକାରୀ। NH -୬୦ ଶାନ୍ତିଆ ନିକଟରେ ବେଆଇନ ଚାନ୍ଦା ଆଦାୟ ହେଉଥିବା ନେଇ ଅଭିଯୋଗ ହୋଇଥିଲା। ସୂଚନା ଅନୁଯାୟୀ, ଜଣେ ଟ୍ରକ ଡ୍ରାଇଭର ଗାଡ଼ି ରଖି ଚା ପିଇବାକୁ ଯାଇଥିବାବେଳେ କିଛି ଯୁବକ ଟ୍ରକ ହେଲ୍ପର ଓ ଡ୍ରାଇଭରଙ୍କୁ ଘେରି ଦାଦାବଟି ମାଗୁଥିଲେ। ଟଙ୍କା ନଦେବାରୁ ଡ୍ରାଇଭରଙ୍କୁ ନିସ୍ତୁକ ମାଡ଼ ମାରିଥିଲେ । ଏନେଇ ଡ୍ରାଇଭର ଜଣକ ପୋଲିସକୁ ଖବର ଦେବା ପରେ ଘଟଣାସ୍ଥଳରେ ଜଳେଶ୍ବର ଥାନା SI ସୃଷ୍ଟିଧର ବେହେରା ଓ ଜଣେ ମହିଳା କନଷ୍ଟେବଳ ପହଞ୍ଚିଥିଲେ। ସେଠାରେ ଉଭୟଙ୍କୁ ଆକ୍ରମଣ କରିଥିଲେ ବେଆଇନ ଚାନ୍ଦା ଆଦାୟକାରୀ। ଘଟଣାରେ ୪ ଜଣଙ୍କୁ ଗିରଫ କରିଛି ଜଳେଶ୍ବର ପୋଲିସ। ଟ୍ରକ ଡ୍ରାଇଭର ଓ ମହିଳା କନଷ୍ଟେବଳଙ୍କ ଅଭିଯୋଗ ପରେ ଘଟଣାର ଅଧିକ ତଦନ୍ତ କରୁଛି ପୋଲିସ।