ନୟାଗଡ଼, (ବାଘୁଆବାର୍ତ୍ତା): ଗତକାଲି କଣ୍ଟିଲୋ ପୁଲିସ ଗୋଟିଏ ପିକ୍ଅପ ଭ୍ୟାନରୁ ୧.୭୦ କ୍ୱିଣ୍ଟାଲ ଗଞ୍ଜେଇ ଜବତ କରିଥିବା ବେଳେ ଆଜି ଅବକାରୀ ବିଭାଗ ଏକ କାରରୁ ଗଞ୍ଜେଇ ଜବତ କରିଛି । ନୟାଗଡ଼ ଅବକାରୀ ଅଧିକ୍ଷକ ଜ୍ଞାନରଞ୍ଜନ ପଣ୍ଡା ନୟାଗଡ଼ ଅଭିମୂଖେ ଏଗ କାରରେ ଗଞ୍ଜେଇ ଆସୁଥିବା ବ୍ରହ୍ମପୁର ଅବକାରୀ ଗୁଇନ୍ଦା ସଂସ୍ଥା ଡେପୁଟି ସୁପରିଟେଣ୍ଡେଣ୍ଟ ସ୍ମୃତିକାନ୍ତ ରାଉତଙ୍କଠାରୁ ଖବର ପାଇଥିଲେ । ଏହା ପରେ ଅଧ୍ୟୀକ୍ଷକ ପଣ୍ଡା ଅବକାରୀ ମୋବାଇଲ ଟିମକୁ ନିର୍ଦ୍ଦେଶ ଦେଇଥିଲେ । ନୟାଗଡ଼ ଅବକାରୀ ମୋବାଇଲ ଟିମର ଇନ୍ସପେକ୍ଟର ଦୀପକ କୁମାର ଜେନାଙ୍କ ନେତୃତ୍ୱରେ ସବ୍ ଇନିସପେକ୍ଟର ସୁସାନ୍ତ କୁମାର ମହାପାତ୍ର, କନେଷ୍ଟବଳ ଦେବୀ ପ୍ରସାଦ ପାଣୀ, କୈବଲ୍ୟ ସ୍ୱାଇଁ, ଶୁଭଶ୍ରୀ ପାଣିଗ୍ରାହି ପ୍ରମୁଖ ନୟାଗଡ଼ ଓଡ଼ଗାଁ ରାସ୍ତାର ବଡ଼ପୁଟ ଛକରେ ଗାଡିଟିକୁ ଜଗି ରହିଥିଲେ । ସେଠାରେ ଏକ ଓଡି ୦୨ ବିଭି ୯୪୮୪ ନମ୍ବର ବିଶିଷ୍ଟ ରୋନାଲ୍ଡ କ୍ୱିଡ୍ କାରରୁ ୨୧.୮ କେଜି ଗଞ୍ଜେଇ ଜବତ କରିଛନ୍ତି। ଉକ୍ତ କାରରେ ଗଞ୍ଜେଇ ନେଇ ଯାଏଥିବା ଦୁଇ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି । ସେମାନେ ହେଲେ କଟକ ଜିଲ୍ଲା ବାଙ୍କୀ ଥାନା ନରଗାଙ୍ଗ ଗ୍ରାମର ତ୍ରୈଲୋକ୍ୟନାଥ ପଟ୍ଟନାୟକ ପୁଅ ସୌମେନ୍ଦ୍ର ପଟ୍ଟନାୟକ ଏବଂ କଟକ ଜିଲ୍ଲା ସଦରଥାନା ଅନ୍ତର୍ଗତ ଶ୍ରୀରାମ ଗ୍ରାମର ଅମୁଲ୍ୟ କରଙ୍କ ପୁଅ ଦେବେନ୍ଦ୍ର କର। ଜାମିନ ନାମାଞ୍ଜୁର ହେବାରୁ ସେମାନଙ୍କୁ ଜେଲ ହାଜତକୁ ପଠାଇ ଦିଆଯାଇଛି । ଜବତ ଗଞ୍ଜେଇର ମୁଲ୍ୟ ୨ ଲକ୍ଷରୁ ଉର୍ଦ୍ଧ୍ୱ ହେବ ବୋଲି ଏସଆଇ ସୁସାନ୍ତ କୁମାର ମହାପାତ୍ର ସୁଚନା ଦେଇଛନ୍ତି । ଗଞ୍ଜେଇ କନ୍ଧମାଳରୁ କଟକ ନିଆଯାଉଥିଲା । ଏହି ଗଞ୍ଜେଇ କାରବାରରେ ବ୍ୟବହୃତ ଗାଡ଼ିଟି ନୟାଗଡ଼ ସଦରଥାନା ଅନ୍ତର୍ଗତ ବାଲୁଗାଁ ଖେଡ଼ପଡ଼ା ଗ୍ରାମର ତ୍ରିନାଥ ଗୁରୁଙ୍କ ପୁଅ ପ୍ରଭାତ ଗୁରୁଙ୍କର ବୋଲି ଜଣାପଡ଼ିଛି । ଏହି କାରବାର ପଛରେ ବାଲୁଗାଁ ଲିଙ୍କ ରହିଥିବା ଏବଂ ଏହା ପଛରେ ଜଣେ ବିଜେପି ନେତାଙ୍କ ଭୂମିକା ରହିଥିବା ସନ୍ଦେହ କରାଯାଉଛି । ଗଞ୍ଜେଇ କାରବାରର ମାଷ୍ଟର ମାଇଣ୍ଡକୁ ଧରିବା ପାଇଁ ଅବକାରୀ ବିଭାଗ ଛାନଭିନ ଆରମ୍ଭ କରିଛି । ଗାଡ଼ି ମାଲିକଙ୍କୁ ନୋଟିସ କରାଯାଇ ତଦନ୍ତ ପରିସର ଭୁକ୍ତ କରାଯିବା ସହ କିଏ ମାଷ୍ଟର ମାଇଣ୍ଡ ତାହାର ଖୋଳତାଡ଼ କରାଯିବ ବୋଲି ସୂଚନା ମିଳିଛି ।
