ମାଲକାନଗିରି, (ବାଘୁଆବାର୍ତ୍ତା): ଗତ ଏପ୍ରିଲ ୧୨ରେ ମାଲକାନଗିରି ବ୍ଲକ ରେଙ୍ଗାବନ୍ଧ ଗ୍ରାମ ନିକଟ ଜଙ୍ଗଲରେ ଜଣେ ଯୁବତୀଙ୍କ ଗଳିତ ମୃତଦେହ ଜବତ ଘଟଣାରେ ପୋଲିସ ତଦନ୍ତ କରିଥିଲା। ପରେ ଘଟଣାର ପର୍ଦ୍ଦାଫାଶ କରିବା ସହ ଏଥିରେ ସମ୍ପୃକ୍ତ ଜଣେ ଯୁବକଙ୍କୁ ରବିବାର ଗିରଫ ପରେ କୋର୍ଟ ଚାଲାଣ କରାଯାଇଛି। ସେ ହେଲେ ସୁକ୍ମା ଜିଲା ପାଣ୍ଡୁମ ଗ୍ରାମର ଉମେଶ ନାଗ । ଏ ନେଇ ନଂ୨୧/୨୫ରେ ମାମଲା ରୁଜୁ କରାଯାଇଥିଲା। ମାଲକାନଗିରି ଆରକ୍ଷୀ ଅଧୀକ୍ଷକଙ୍କ କାର୍ଯ୍ୟାଳୟରେ ଆୟାଜିତ ଖବରଦାତା ସମ୍ମିଳନୀରେ ଏସ୍ପି ବିନୋଦ ପାଟିଲ ଦେଇଥିବା ସୂଚନା ଅନୁଯାୟୀ, ଛତିଶଗଡ ଅଞ୍ଚଳର ଜଣେ ଯୁବତୀ ଓ ସୁକ୍ମା ଜିଲା ପାଣ୍ଡୁମ ଗ୍ରାମର ଉମେଶ ନାଗଙ୍କ ମଧ୍ୟରେ ଗତ ଏକବର୍ଷ ଧରି ପ୍ରେମ ସମ୍ପର୍କ ରହିଥିଲା। ଦୁହିଁଙ୍କ ମଧ୍ୟରେ ଶାରୀରିକ ସମ୍ପର୍କ ମଧ୍ୟ ଥିଲା। ଫଳରେ ଯୁବତୀ ଜଣକ ଗର୍ଭବତୀ ହୋଇଥିଲେ। ଯୁବତୀ ଏବଂ ଉମେଶ ୨୦ା୩ା୨୫ରେ ମାଲକାନଗିରି ଜିଲା ମୁଖ୍ୟ ଚିକିତ୍ସାଳୟକୁ ଆସି ଯୁବତୀଙ୍କ ସ୍ବାସ୍ଥ୍ୟ ପରୀକ୍ଷା କରାଇଥିଲେ। ଗର୍ଭବତୀ ଥିବା ଜଣାପଡିବା ପରେ ଗର୍ଭପାତ ପାଇଁ ଡାକ୍ତରଙ୍କୁ ଅନୁରୋଧ କରିଥିଲେ। ଗର୍ଭପାତ କରିବେ ନାହିଁ ବୋଲି ଡାକ୍ତର ମନା କରିଥିଲେ। ଫଳରେ ଉମେଶ ଉପାୟ ନ ପାଇ ରେଙ୍ଗାବନ୍ଧ ଗ୍ରାମ ନିକଟ ଜଙ୍ଗଲରେ ଯୁବତୀଙ୍କୁ ହତ୍ୟା କରିଥିଲେ। ଗତ ୧୨ ତାରିଖରେ ଗଳିତ ମୃତଦେହ ମିଳିଲା ପରେ ପୋଲିସ ଏହାର ତଦନ୍ତ କରିବା ସହ ପଡୋଶୀ ଛତିଶଗଡ ସୁକ୍ମା ପୋଲିସ ସହ ଯୋଗାଯୋଗ କରି ଯୁବତୀଙ୍କ ଠିକଣା ଜାଣି ତାଙ୍କ ଘରକୁ ଯାଇ ପିନ୍ଧିଥିବା ବସ୍ତ୍ର ଓ ଅନ୍ୟାନ୍ୟ ଜିନିଷ ଦେଖାଇଥିଲା। ଯୁବତୀଙ୍କ ପରିବାର ଲୋକେ ସମସ୍ତ ଜିନିଷ ଚିହ୍ନଟ କରିଥିଲେ।
ପ୍ରେମିକାଙ୍କୁ ମାରି ଜଙ୍ଗଲରେ ଫିଙ୍ଗିଦେଲେ ପ୍ରେମିକ
