ବଲାଙ୍ଗିର, (ବାଘୁଆବାର୍ତ୍ତା): ‘ଆକର୍ଷଣୀୟ ଅଫର ଅଛି, ମୋବାଇଲ ସିମ୍ ରଖନ୍ତୁ । ଏକ ମାସ ପାଇଁ ମାଗଣା ଅସୀମିତ ଡାଟା ଏବଂ କଲ ସେବା ପାଆନ୍ତୁ । କେବଳ ଆଧାର ନମ୍ବର ସହ ବାୟୋମେଟ୍ରିକ ଦିଅନ୍ତୁ ଏବଂ ସିମ୍ ଘରକୁ ନେଇଯାଆନ୍ତୁ ।’ ଗାଁ ଗାଁରେ ଏଭଳି ବିଜ୍ଞାପନ ଦେଖି ଲୋକେ ମାଗଣା ସେବା କଥା ଶୁଣି ସବୁ ତଥ୍ୟ ଦେଇ ସିମ୍ ନେଇଥିଲେ । ହେଲେ ଏହା କୌଣସି କମ୍ପାନି ତରଫରୁ ନୁହେଁ, ବରଂ ସାଇବର ଠକଙ୍କ ଏକ ଗ୍ରୁପ ତଥ୍ୟ ଚୋରି କରୁଥିବା ସ୍ପଷ୍ଟ ହୋଇଛି । ଏକ ସଂଗଠିତ ରାକେଟ୍ ଲୋକଙ୍କୁ ଭୂତାଇ ଶହ ଶହ ପ୍ରି-ଆକ୍ଟିଭେଟେଡ୍ ସିମ୍ ଦେଶବିଦେଶର ସାଇବର ଠକଙ୍କୁ ବିକ୍ରି କରୁଥିଲା । ଯେଉଁଥିରୁ ସାଇବର, ସେୟାର ମାର୍କେଟ ଏବଂ ପାର୍ସଲ ଭଳି ଠକେଇ କରାଯାଉଥିଲା । କେନ୍ଦ୍ର ଗୃହ ବିଭାଗର ଭାରତୀୟ ସାଇବର ଅପରାଧ ସମନ୍ୱୟ କେନ୍ଦ୍ର (ଆଇଫୋର୍ସି)କୁ ଦକ୍ଷିଣ ଏସୀୟ ଦେଶ କାମ୍ବୋଡ଼ିଆରୁ ଅଭିଯୋଗ ମିଳିବା ପରେ ସେହି ସୂଚନା ଆଧାରରେ ତଦନ୍ତ ହୋଇଥିଲା । ଏଥିରେ ବଲାଙ୍ଗିର ଜିଲ୍ଲାର ଲିଙ୍କ୍ ଥିବା ସ୍ପଷ୍ଟ ହୋଇଥିଲା । ତଦନ୍ତ ଆଧାରରେ ପୁଲିସ୍ ବଲାଙ୍ଗିରର ଆକାଶ ମିଶ୍ର, ବାଲେଶ୍ୱର ଜିଲ୍ଲା ବାଲିଆପାଳ ଖଗଡ଼ାପାଳର ସାଗର କୁମାର ସାହୁ ଏବଂ ମୟୂରଭଞ୍ଜ ଜିଲ୍ଲା ବାରିପଦାର ରାଜକୁମାର ଦତ୍ତଙ୍କୁ ଗିରଫ କରିଛି । କିଛିମାସ ତଳେ ଭାରତୀୟ ସାଇବର ଅପରାଧ ସମନ୍ୱୟ କେନ୍ଦ୍ରଠାରୁ ସାଇବର ଠକେଇ ନେଇ ଚାଞ୍ଚଲ୍ୟକର ତଥ୍ୟ ମିଳିଥିଲା । ଦୂରସଞ୍ଚାର ବିଭାଗ ସହ ମିଳିତ ଯାଞ୍ଚ ପରେ କାମ୍ବୋଡିଆରେ କେତେକ ସନ୍ଦିଗ୍ଧ ସିମ୍କାର୍ଡ ନମ୍ବରକୁ ଟ୍ରାକ୍ କରାଯାଇଥିଲା । ଯେଉଁ ସିମକାର୍ଡ ନମ୍ବରଗୁଡ଼ିକ ବିରୋଧରେ ଅନେକ ଠକେଇ ଅଭିଯୋଗ ପଞ୍ଜିକୃତ ରହିଥିଲା । ଉକ୍ତ ସିମ୍ଗୁଡ଼ିକର ପିଓଏସ୍ (ପଏଣ୍ଟ ଅଫ୍ ସେଲ୍) ଓଡ଼ିଶାର ବିଭିନ୍ନ ସ୍ଥାନରେ ଚିହ୍ନଟ ହେଇଥିଲା । ବଲାଙ୍ଗିର ବ୍ରାହ୍ମଣପଡ଼ାର ମୋବାଇଲ ସିମକାର୍ଡ ବିକ୍ରେତା ଆକାଶ ମିଶ୍ରଙ୍କ ଆଇଡିରୁ ୨୨୪ଟି ସିମ୍ ଆକ୍ଟିଭ କରାଯାଇଥିଲା । ତଦନ୍ତ ବେଳେ ୧୦୨ଟି ଆକ୍ଟିଭ ଥିବା ଜଣାପଡ଼ିଥିଲା। ପୁଲିସ୍ ସିମ୍ଗୁଡ଼ିକର ପ୍ରମାଣପତ୍ର ଆଧାରରେ କେତେକ ସିମ୍କାର୍ଡ ବ୍ୟବହାର କରୁଥିବା ବ୍ୟକ୍ତିଙ୍କୁ ପଚରାଉଚରା କରିଥିଲା । ସେମାନେ କହିଥିଲେ, ୨୦୨୩ ମସିହାରେ କେତେକ ସିମକାର୍ଡ ଏଜେଣ୍ଟ ଗାଁକୁ ଆସି କ୍ୟାମ୍ପ କରିଥିଲେ । ମାସକ ପାଇଁ ଅସୀମିତ ଡାଟା ଏବଂ ଫୋନ୍ କଲ୍ ସେବା ପ୍ରଦାନ କରିବାକୁ କହି ଆଧାରକାର୍ଡ ଏବଂ ବାୟୋମେଟ୍ରିକ୍ ଚିହ୍ନ ନେଇଥିଲେ । ଏଜେଣ୍ଟମାନେ ସେହି ବାୟୋମେଟ୍ରିକ ଡାଟା ଏବଂ ଆଧାର ତଥ୍ୟକୁ ବାରମ୍ବାର ବ୍ୟବହାର କରି ଜଣକ ନାଁରେ ଏକାଧିକ ସିମ୍ ଜାରି କରୁଥିଲେ । ଆଧାରକାର୍ଡଧାରୀଙ୍କ ଅଜାଣତରେ ସେହି ପ୍ରି-ଆକ୍ଟିଭେଟେଡ୍ ସିମଗୁଡ଼ିକୁ ତାଙ୍କ ସିଣ୍ଡିକେଟ୍ରେ ଦାଖଲ କରୁଥିଲେ । ଏଭଳି ସାଇବର ଠକେଇର ପ୍ରମାଣ ପାଇ ପୁଲିସ ମାମଲା ରୁଜୁ କରି ଆକାଶ, ସାଗର ଏବଂ ରାଜକୁମାରଙ୍କୁ ଗତ ୧୧ ତାରିଖରେ ଗିରଫ କରିଛି ।
ସିମ୍ ବିକ୍ରିରୁ ଆନ୍ତର୍ଜାତିକ ସାଇବର ଅପରାଧ ରାକେଟ୍ ଲିଙ୍କ୍, ୩ ଅଭିଯୁକ୍ତ ଗିରଫ
