ରିଆମାଳ, (ବାଘୁଆବାର୍ତ୍ତା): ଦେବଗଡ-ଅନୁଗୁଳ ଜାତୀୟ ରାଜପଥ ଛତାବର ନିକଟସ୍ଥ ମାଦଳିଆ ନାଳଠାରେ ସେମବାର ଭୋରୁ ମର୍ମନ୍ତୁଦ ଦୁର୍ଘଟଣା ଘଟିଛି । ଶଗଡ଼ ଗାଡ଼ି ଯୋଗେ ବୃଦ୍ଧ ଦମ୍ପତି ମହୁଲ ଗୋଟାଇବାକୁ ଯାଉଥିବା ବେଳେ ଧକ୍କା ଦେଇଥିଲା ଅଜଣା ଗାଡ଼ି । ଦୁର୍ଘଟଣାରେ ନାଉଲିପଡ଼ା ଜାମ୍ବୁବଣିଆ ସାହିର ମାୟା ସାହୁ (୬୮) ଙ୍କ ମୃତ୍ୟୁ ହୋଇଥିବା ବେଳେ ତାଙ୍କ ସ୍ଵାମୀ ପ୍ରସନ୍ନ ସାହୁ ଗୁରୁତର ହୋଇଛନ୍ତି । ଏହି ଦୁର୍ଘଟଣାରେ ଏକ ବଳଦ ମଧ୍ୟ ପ୍ରାଣ ହରାଇଛି । ଦେବଗଡ ଜିଲ୍ଲା ରିଆମାଳ ଥାନା ଅନ୍ତର୍ଗତ ଦେବଗଡ-ଅନୁଗୁଳ ଜାତୀୟ ରାଜପଥରେ ଏଭଳି ଘଟଣା ଘଟିଛି । ସୂଚନା ମୁତାବକ, ଏକ ଶଗଡ଼ ଗାଡ଼ି ଯୋଗେ ମାୟା ସାହୁ ଏବଂ ତାଙ୍କ ସ୍ୱାମୀ ପ୍ରସନ୍ନ ସାହୁ ମହୁଲ ଗୋଟାଇବାକୁ ଯାଉଥିଲେ । ଦେବଗଡ – ଅନୁଗୁଳ ଜାତୀୟ ରାଜପଥ ଛତାବର ନିକଟସ୍ଥ ମାଦଳିଆ ନାଳଠାରେ ଉକ୍ତ ଶଗଡ଼ ଗାଡ଼ିକୁ ଏକ ଅଜଣା ଗାଡ଼ି ଧକ୍କା ଦେଇ ଫେରାର ହୋଇଥିଲା । ଏହି ଦୁର୍ଘଟଣାରେ ଶଗଡ଼ ଗାଡ଼ିଟି ଭାଙ୍ଗି ସମ୍ପୂର୍ଣ୍ଣ ଭାବରେ ନଷ୍ଟ ହୋଇଥିବା ବେଳେ ଏକ ବଳଦର ମୃତ୍ୟୁ ହୋଇଥିଲା । ଶଗଡ଼ ଗାଡ଼ିରେ ଯାଉଥିବା ମାୟା ସାହୁ ଏବଂ ତାଙ୍କ ସ୍ୱାମୀ ଗୁରୁତର ହୋଇଥିଲେ । ଉଭୟଙ୍କୁ ଛତାବର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଅଣାଯାଇଛି। ସେଠାରେ ମାୟାଙ୍କୁ ମୃତ ଘୋଷଣା କରାଯାଇ ଥିବା ବେଳେ ସ୍ଵାମୀଙ୍କ ଚିକିତ୍ସା ଜାରି ରହିଛି । ଘଟଣା ସମ୍ପର୍କରେ ଖବର ପାଇ ରିଆମାଳ ଥାନା ଅଧିକାରୀ ସତ୍ୟବ୍ରତ ରାଉତ ତାଙ୍କ ଟିମ୍ ସହ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ଏଥି ସହିତ ଧକ୍କା ଦେଇଥିବା ଗାଡ଼ି ଧରିବା ପାଇଁ ପୁଲିସ ଛାନଭିନ କରୁଛି ।
ଶଗଡ଼ ଗାଡ଼ିକୁ ଧକ୍କା ଦେଲା ଅଜଣା ଗାଡ଼ି, ସ୍ତ୍ରୀ ମୃତ, ସ୍ୱାମୀ ଗୁରୁତର
