ଖଲ୍ଲିକୋଟ, (ବାଘୁଆବାର୍ତ୍ତା): ଦୁର୍ଦ୍ଦାନ୍ତ ଅପରାଧୀ ରବି ଦାସ ହତ୍ୟା ମାମଲା । ୧୨ ଦିନ ପରେ ପୋଲିସକୁ ମିଳିଲା ସଫଳତା । ରବି ଦାସ ହତ୍ୟା ମାମଲାରେ ସଂପୃକ୍ତି ଥିବା ୩ ଜଣଙ୍କୁ ଗିରଫ କରିଛି ଖଲ୍ଲିକୋଟ ଥାନା ପୋଲିସ । ଗିରଫ ତିନି ଜଣ ମୃତ ରବି ଦାସଙ୍କ ପୁତୁରା ବୋଲି ଜଣାପଡିଛି । ଚଳିତ ମାସ ୫ ତାରିଖରେ ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ହରିପୁର ଗାଁରେ ଦୁର୍ଦ୍ଦାନ୍ତ ଅପରାଧୀ ରବି ଦାସକୁ ହତ୍ୟା କରାଯାଇଥିଲା । ବେଆଇନ ମଦ ବ୍ୟବସାୟ ନେଇ ରବି ଦାସ ଏବଂ ତାଙ୍କ ପୁତୁରାଙ୍କ ମଧ୍ୟରେ ବିବାଦ ଲାଗିରହିଥିଲା । ଏପିରିକି ପୂର୍ବରୁ ରବି ଦାସ ଦୁଇ ପୁତୁରାଙ୍କ ଉପରକୁ ବୋମା ମାଡ଼ କରିଥିଲେ । ଯାହାର ପାଲଟା ଜବାବ ଦେଇଥିଲେ ପୁତୁରା । ମାର୍ଚ୍ଚ ୫ ତାରିଖ ସକାଳୁ ରବି ଦାସଙ୍କୁ ଘର ସାମ୍ନାରେ ହତ୍ୟା କରି ଫେରାର ହୋଇଯାଇଥିଲେ ପୁତୁରା । ଯାହାକୁ ନେଇ ରବିଙ୍କ ସ୍ତ୍ରୀ ଥାନାରେ ଅଭିଯୋଗ କରିଥିଲେ । ପୋଲିସ ଅଭିଯୋଗ ଆଧାରରେ ଛାନ୍ଭିନ୍ ଆରମ୍ଭ କରିଥିଲା । ରବିବାର ଛତ୍ରପୁର ଅଞ୍ଚଳରୁ ୩ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା ପୋଲିସ । ଏହାସହିତ ସେମାନଙ୍କ ନିକଟରୁ ଦୁଇଟି ଖଣ୍ଡା, ୩ଟି ମୋବାଇଲ୍, ଗୋଟିଏ ବୁଲେଟ୍ ଜବତ ମଧ୍ୟ କରିଥିଲା ପୋଲିସ । ଅନ୍ୟ ଜଣେ ଅଭିଯୁକ୍ତ ଫେରାର ଥିବା ପୋଲିସ ପ୍ରେସମିଟ୍ ଜରିଆରେ ସୂଚନା ଦେଇଛି ।
