ଭୁବନେଶ୍ୱର, (ବାଘୁଆବାର୍ତ୍ତା): ପାରା ଜାଭେଲିନ ଫିଙ୍ଗାଳି ସୁଚିତ୍ରା ପରିଡ଼ା ଦିଲ୍ଲୀରେ ଚାଲିଥିବା ବିଶ୍ୱ ଆଥଲେଟିକ୍ସ ଗ୍ରାଁପ୍ରିରେ ସ୍ୱର୍ଣ୍ଣ ପଦକ ହାସଲ କରିଛନ୍ତି । ଗତକାଲି ମହିଳା ୧୦୦ ମିଟରରେ ଜୟନ୍ତୀ ବେହେରା ବ୍ରୋଞ୍ଜ ପଦକ ପାଇଥିଲେ । ଦୁଇ ଦିନରେ ଓଡ଼ିଶାକୁ ୨ଟି ପଦକ ମିଳିଛି। ସୁଚିତ୍ରା ମହିଳା ଏଫ୍-୫୫ ବର୍ଗର ଜାଭେଲିନ ଥ୍ରୋରେ ଭାଗ ନେଇଥିଲେ । ସେ ୧୫.୯୩ ମିଟର ଥ୍ରୋ କରି ସ୍ୱର୍ଣ୍ଣ ପଦକ ଜିତିଥିଲେ । ସେହିପରି କାଜାଖସ୍ତାନର ଭିକ୍ଟୋରିଆ ଭୋରୋବେ (୧୪.୬୪ ମିଟର) ରୌପ୍ୟ ଏବଂ ପୂଜା (୧୩.୮୧ ମିଟର) ବ୍ରୋଞ୍ଜ ପଦକ ପାଇଥିଲେ । ସ୍ୱର୍ଣ୍ଣ ପଦକକୁ ସୁଚିତ୍ରା ନିଜର କୋଚ, ସାଥୀ ଖେଳାଳି ଏବଂ ପ୍ରଶଂସକଙ୍କ ଉଦ୍ଦେଶ୍ୟରେ ସମର୍ପିତ କରିଛନ୍ତି । ଓଡ଼ିଶା ପାରା କ୍ରୀଡ଼ା ସଂଘ ପକ୍ଷରୁ ତାଙ୍କୁ ଅଭିନନ୍ଦନ ଜଣାଯାଇଛି । ଚଳିତ ବର୍ଷ ସେ ଚେନ୍ନାଇରେ ଆୟୋଜିତ ୨୩ତମ ଜାତୀୟ ପାରା ଆଥଲେଟିକ୍ସ ଚାମ୍ପିଅନସିପ୍ରେ ନୂଆ ଜାତୀୟ ରେକର୍ଡ (୧୮.୭୯) ସହ ସ୍ୱର୍ଣ୍ଣ ଜିତିଥିଲେ । ସେ ୨୦୨୪ରେ ଜାତୀୟ ରେକର୍ଡ (୧୬.୯୯) କରିଥିଲେ । ନିଜ ରେକର୍ଡ ସୁଚିତ୍ରା ନିଜେ ଏଥର ଭଙ୍ଗ କରିବାରେ ସଫଳ ହୋଇଥିଲେ । ଗତବର୍ଷ ଜୟନ୍ତୀ ଇଣ୍ଡିଆନ ଓପନ ପାରା ଆଥଲେଟିକ୍ସ ଇଣ୍ଟରନ୍ୟାସନାଲ ଚାମ୍ପିଅନସିପ୍ରେ ଜାଭେଲିନ ଥ୍ରୋରେ ସ୍ୱର୍ଣ୍ଣ ଏବଂ ସଟପୁଟ ଥ୍ରୋରେ ବ୍ରୋଞ୍ଜ ଜିତିଥିଲେ । ୨୦୨୩ରେ ଥାଇଲାଣ୍ଡରେ ଆୟୋଜିତ ୱାର୍ଲ୍ଡ ଏବିଲିଟିସ୍ପୋର୍ଟ୍ସ ଗେମ୍ସରେ ଜାଭେଲିନରେ ସ୍ୱର୍ଣ୍ଣ ଓ ସଟପୁଟରେ ବ୍ରୋଞ୍ଜ ପଦକ ପାଇଥିଲେ । ଜୟନ୍ତୀ ମହିଳା ଟି-୪୭ ବର୍ଗର ୧୦୦ ମିଟରରେ ନିର୍ଦ୍ଧାରିତ ଦୂରତାକୁ ୧୩.୬୨ ସେକେଣ୍ଡ ନେଇ ତୃତୀୟ ସ୍ଥାନ ହାସଲ କରିଥିଲେ । ଏ.ସୋଲୋଭେଭା ୧୨.୫୫ ସେକେଣ୍ଡ ସହ ସ୍ୱର୍ଣ୍ଣ ଏବଂ ଜାନନୀ ୱିକରାମସିଂହା ୧୩.୨୫ ସେକେଣ୍ଡ ସହ ରୌପ୍ୟ ଜିତିଥିଲେ ।
ଜାଭେଲିନ ଥ୍ରୋରେ ସୁଚିତ୍ରା ଜିତିଲେ ସ୍ୱର୍ଣ୍ଣ ପଦକ
