ନୟାଗଡ଼,(ବାଘୁଆବାର୍ତ୍ତା): ସାହିତ୍ୟ ଓ ସଂସ୍କୃତି ପ୍ରେମୀ ତଥା ଗଛ ମଣିଷ ଭାବେ ପରିଚିତ ସ୍ୱର୍ଗତ ଦୁଃଖିଶ୍ୟାମ ଦାସଙ୍କର ପ୍ରଥମ ଶ୍ରାଦ୍ଧବାର୍ଷିକୀ ସ୍ମୃତି ସମାରୋହ ସ୍ଥାନୀୟ ନୀଳମାଧବ କଲ୍ୟାଣ ମଣ୍ଡପଠାରେ ଅନୁଷ୍ଠିତ ହୋଇଯାଇଛି । ନିର୍ମଳଚନ୍ଦ୍ର ଶୂରଦେଓଙ୍କ ପୌରହିତ୍ୟରେ ବରିଷ୍ଠ ସାମ୍ବାଦିକ ପ୍ରଦୀପ୍ତ କୁମାର ପଟ୍ଟନାୟକ, ଡ. ବିଜୟ କୁମାର ଚୌଧୁରୀ, କୃଷ୍ଣଚନ୍ଦ୍ର ଶତପଥୀ ଓ ସମାଜସେବୀ ପ୍ରମୋଦ କୁମାର ପଟ୍ଟନାୟକ ଯୋଗଦେଇ ସ୍ୱର୍ଗତ ଦାସଙ୍କର ବିଭିନ୍ନ ଗୁଣାବଳୀ ବିଷୟରେ ଆଲୋକପାତ କରିଥିଲେ । ସ୍ୱର୍ଗତ ଦୁଖିଶ୍ୟାମ ଦାସ ଗଛକୁ ଭଲ ପାଉଥିଲେ ଏବଂ ବୃକ୍ଷରୋପଣ ପାଇଁ ଶତତ ଆଗ୍ରହ ଥିଲେ ଏବଂ ଗଛ ମଣିଷ ଭାବେ ପରିଚିତ ଥିଲେ ବୋଲି ଆଲୋଚନା କରାଯାଇଛି । ଅନ୍ୟମାନଙ୍କ ମଧ୍ୟରେ ଶେଖ୍ ଅବଦୁଲ୍ ଖାଲିକ୍, ଇଟାମାଟି ଶିକ୍ଷା ଓ ବୈଷୟିକ ମହାବିଦ୍ୟାଳୟର ଅଧ୍ୟକ୍ଷ ଅଶୋକ ଚନ୍ଦ୍ର ନାୟକ, ପ୍ରଫେସର ହରପ୍ରସାଦ ମହାପାତ୍ର, ଗୋଲକବିହାରୀ ନାୟକ, ଅନାଦିଚରଣ ସାହୁ, ବରିଷ୍ଠ ନାଗରିକ ନିରଞ୍ଜନ ମିଶ୍ର ପ୍ରମୁଖ ସ୍ୱର୍ଗତ ଦାସଙ୍କର ବିଭିନ୍ନ କାର୍ଯ୍ୟାବଳୀ ସମ୍ପର୍କରେ ଆଲୋଚନା କରିଥିଲେ । ଏହି ଅବସରରେ ରାଗେଶ୍ରୀ ନିଳୟମ ତରଫରୁ ଏକ ଭଜନ ସମାରୋହ ଅନୁଷ୍ଠିତ ହୋଇଥିଲା । ଅପରାହ୍ନରେ ସ୍ଥାନୀୟ ପିଡବ୍ଲୁଡି ଅଫିସ୍ ସମ୍ମୁଖରେ ଦୁଖୀଶ୍ୟାମ ଦାସଙ୍କ ସ୍ମୃତିରେ ଏକ ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି ବୃକ୍ଷରୋପଣ କାର୍ଯ୍ୟକ୍ରମକୁ ମା’ ଫାଉଣ୍ଡେସନର ସମ୍ପାଦକ ରଞ୍ଜନରଶ୍ମି ଜେନା ପରିଚାଳନା କରିଥିଲେ ।
