ବାଙ୍ଗିରିପୋଷି, (ବାଘୁଆବାର୍ତ୍ତା): ଦୀର୍ଘଦିନ ବ୍ୟବଧାନରେ ପୁଣି ରକ୍ତରଞ୍ଜିତ ହେଲା ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ଦେଇ ଯାଇଥିବା ଜାତୀୟ ରାଜପଥ ୪୯ ର ଦ୍ୱାରଶୁଣି ଘାଟି ରାସ୍ତା । ଏକ ସିରିଜ ଦୁର୍ଘଟଣାରେ ଜଣେ ମୃତ୍ୟୁ ବରଣ କରିଥିବା ବେଳେ ତିନ ଜଣ ଗୁରୁତର ଆହାତ ହୋଇଛନ୍ତି। ସୂଚନା ମୁତାବକ, ଏକ କୋଇଲା ବୋଝେଇ ଟ୍ରକ (ଓଡ଼ି୦୧ଏଲ ୬୪୪୪) ଝାରସୁଗୁଡ଼ାରୁ କୋଇଲା ପରିବହନ କରି କଲିକତା ଅଭିମୁଖେ ଯାଉଥିବା ବେଳେ ବ୍ରେକ ଫେଲ ଯୋଗୁ ପ୍ରଥମେ ଏକ କାର ଓ ବାଇକକୁ ଧକ୍କାଦେଇ ରାସ୍ତା କଡ଼କୁ ସାଇଡ ହୋଇ ଯାଇଥିଲା। ଏହି ଦୁର୍ଘଟଣାରେ ଟ୍ରକ ଚାଳକ ଝାରଖଣ୍ଡ ରାଜ୍ୟ ବିରଭୁମ ଅଞ୍ଚଳର ସାଇଦ ମିଆଁ(୨୪) ଓ ହେଲପର ଖାଡ଼ଗପୁର ଅଞ୍ଚଳର ରାମପଦ ପାଲ(୨୨) ଗୁରୁତର ଆହତ ହୋଇଥିବା ବେଳେ ସାଙ୍ଗରେ ବୁଲିବାକୁ ଆସିଥିବା ଟ୍ରକ ଚାଳକଙ୍କ ଭାଇ ମୋହିତ ମିଆଁ ଦୁର୍ଘଟଣା ଭୟରେ ଟ୍ରକରୁ ଡିଆଁ ମାରିଦେବାରୁ ରାସ୍ତା କୋଡ଼ରେ ଥିବା କଂକ୍ରିଟ ବାଡ଼ରେ ପିଟିହୋଇ ଘଟଣା ସ୍ଥଳରେ ମୃତ୍ୟୁ ବରଣ କରିଥିଲେ। ଅନ୍ୟପକ୍ଷେ ଏହି ଦୁର୍ଘଟଣାରେ ବିଶୋଇ ଅଭିମୁଖେ ଯାଉଥିବା ଚାନ୍ଦୁଆ ଥାନା ଅଞ୍ଚଳର ବାଇକ ଚାଳକ ସନାତନ ସରେନ(୩୦)ମଧ୍ୟ ଗୁରୁତର ଆହତ ହୋଇଥିଲେ। ସମସ୍ତ ଆହତଙ୍କୁ ଜାତୀୟ ରାଜପଥ ଆମ୍ବୁଲାନ୍ସ ଯୋଗେ ବାଙ୍ଗିରିପୋଷି ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ପ୍ରାଥମିକ ଚିକିତ୍ସା ପରେ ପିଆରଏମ ମେଡିକାଲ କଲେଜକୁ ସ୍ଥାନାନ୍ତରଣ କରାଯଇଛି। ଖବର ପାଇ ବାଙ୍ଗିରିପୋଷି ପୋଲିସ ଘଟଣା ସ୍ଥଳରେ ପହଞ୍ଚି ମୃତ ଶରୀରକୁ ଉଦ୍ଧାର କରି ବାଙ୍ଗିରିପୋଷି ଡାକ୍ତରଖାନାକୁ ଆଣି ତଦନ୍ତ ଜାରି ରଖି ଦୁର୍ଘଟଣାଗ୍ରସ୍ଥ ଗାଡିକୁ ଜବତ କରିଛି।
