ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ଧାନ କିଣା ଅନିୟମିତତା ନେଇ ଖଣ୍ଡପଡ଼ା ବ୍ଲକ ତେନ୍ତୁଳିଆପଲ୍ଲୀ ସମବାୟ ସମିତି ସମ୍ପାଦକ ଲକ୍ଷ୍ମଣ କୁମାର ପ୍ରଧାନ, ପିଅନ ଗଦାଧର ସାହୁ ଏବଂ ଡାଟା ଏଣ୍ଟ୍ରି ଅପରେଟ ସୁବ୍ରତ କୁମାର ରାଉଳ ନିଲମ୍ବନ ହୋଇଥିବା ବେଳେ ଆଜି ସୁବ୍ରତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ଏଥିସହିତ ଓଡ଼ଗାଁ ବ୍ଲକର ଦୁଇ ଜଣ ସମବାୟ ସମିତି ସମ୍ପାଦକଙ୍କୁ ଜିଲ୍ଲାପାଳ ଡ. ପୋମା ଟୁଡୁ ନିଲମ୍ବନ କରିଥିବା ସୂଚନା ମିଳିଛି । ଓଡ଼ଗାଁ ବ୍ଲକ ଗୋଲଗାଁ ସମବାୟ ସମିତି ସମ୍ପାଦକ ମାନସ ରଞ୍ଜନ ମିଶ୍ର ଏବଂ କଜ୍ଜଲାଇପଲ୍ଲୀ ସମବାୟ ସମିତି ସମ୍ପାଦକ ରଞ୍ଜନ କୁମାର ସାହୁଙ୍କୁ ନିଲମ୍ବନ କରାଯାଇଥିବା ସମବାୟ ସହକାରୀ ଉପ ନିବନ୍ଧକ ଭାସ୍କର ପାଣିଗ୍ରାହୀ ସୂଚନା ଦେଇଛନ୍ତି । ଜିଲ୍ଲାରେ ଧାନ କିଣା ବିକାରେ ବ୍ୟାପକ ଅନିୟମିତତା ହେଉଥିବା ନେଇ ଅଭିଯୋଗ ହେଇ ଆସୁଛି । ଏତଦ୍ବ୍ୟତିତ ପୂର୍ବରୁ ଗଣିଆ ବ୍ଲକ ଛାମୁଣ୍ଡିଆ ସମବାୟ ସମିତି ପିଅନ ସୁଶାନ୍ତ କୁମାର , କଳସାଖମଣ ସମବାୟ ସମିତି ସମ୍ପାଦକ ରଘୁନାଥ ମହାକୁଡ଼ଙ୍କୁ ଜିଲ୍ଲାପାଳ ନିଲମ୍ବନ କରିଥିବା ସୂଚନା ମିଳିଛି ।
