ନୟାଗଡ଼,(ବାଘୁଆବାର୍ତ୍ତା) : ବୃତଙ୍ଗ ଜଳସେଚନ ପକଳ୍ପ କାର୍ଯ୍ୟକ୍ଷମ ଦାବିରେ ଆଜି କ୍ରିୟାନୁଷ୍ଠାନ କମିଟି ପ୍ରସ୍ତାବିତ ପ୍ରକଳ୍ପ ସ୍ଥାନ ଗସ୍ତ କରିଛି । ଏଥିସହିତ ଉକ୍ତ ସ୍ଥାନରେ ଏକ ସାମ୍ବାଦିକ ସମ୍ମିଳନୀରେ ପ୍ରକଳ୍ପ କାର୍ଯ୍ୟକାରିତା ଏବଂ ଅବହେଳାକୁ ଦାୟୀ କରିଛି । ଯଥାଶୀଘ୍ର ପ୍ରକଳ୍ପ ନିର୍ମାଣ ପାଇଁ ରାଜ୍ୟ ସରକାର ବ୍ୟବସ୍ଥା କରିବାକୁ ଦାବି କରାଯାଇଛି । କ୍ରିୟାନୁଷ୍ଠାନ କମିଟି ସଭାପତି ମନୋଜ କୁମାର ସାହୁଙ୍କ ଅଧ୍ୟକ୍ଷତାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଉପସଭାପତି ବିନୋଦିନ ମହାନ୍ତି, ସମ୍ପାଦକ ବେଣୁଧର ନାୟକ, ସହସଂପାଦକ ଲକ୍ଷ୍ମୀଧର ରାଉତ ପ୍ରମୂଖ ଉପସ୍ଥିତ ରହି ସୂଚନା ପ୍ରଦାନ କରିଛନ୍ତି । ଦୀର୍ଘ ୫୦ ବର୍ଷରୁ ଉଦ୍ଧ୍ୱର୍ ସମୟ ଧରି ନୟାଗଡ଼ ଜିଲ୍ଲାର ଜୀବନରେଖା କୁହାଯାଉଥିବା ବୃତଙ୍ଗ ଜଳସେଚନ ପ୍ରକଳ୍ପ କାର୍ଯ୍ୟକ୍ଷମ କରିବାରେ ଅବହେଳା କରାଯାଇଛି । ବୃତଙ୍ଗ ନିର୍ମାଣ ଦାବି ଏବେ ଜୋର ଧରିଛି । ଏହି ପ୍ରକଳ୍ପ କାର୍ଯ୍ୟକ୍ଷମ କରିବା ଦାବିରେ କ୍ରିୟାନୁଷ୍ଠାନ କମିଟି ଆସନ୍ତା ୨୪ ତାରିଖରେ ଦଶପଲ୍ଲାଠାରୁ ପଦଯାତ୍ରା ଆରମ୍ଭ କରିବ ବୋଲି ସୂଚନା ଦେଇଛି । ୨୫ ତାରିଖରେ ନୟାଗଡ଼ ଜିଲ୍ଲାପାଳଙ୍କ ଜରିଆରେ ଏକ ଦାବିପତ୍ର ରାଜ୍ୟପାଳଙ୍କୁ ଦେବାର କାର୍ଯ୍ୟକ୍ରମ ରହିଛି । ଏଥିସହିତ ପ୍ରକଳ୍ପ ପାଇଁ ବିସ୍ଥାପିତ ହେବାକୁ ଥିବା ପରିବାରକୁ ଥଇଥାନ କରିବାକୁ କମିଟି ଦାବି କରିଛି । ପ୍ରକଳ୍ପ କ୍ଷେତ୍ରରେ ରଣପୁର, ବୋଲଗଡ଼ ଏବଂ ବେଗୁନିଆ ବ୍ଲକକୁ ସାମିଲ କରିବା ପାଇଁ ଦାବି କରାଯାଇଛି । ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଉମାରାଣୀ ପାଣି, ନାରାୟଣ ସାହୁ, ବୈକୁଣ୍ଠ ନାଥ ପ୍ରଧାନ, ଦେବାଶିଷ ପରମଗୁରୁ, ଦାମୋଦର ପ୍ରଧାନ ପ୍ରମୂଖ ସାମିଲ ହୋଇଥିଲେ ।
