ବ୍ରହ୍ମପୁର, (ବାଘୁଆବାର୍ତ୍ତା): ବିନିଯୋଗ ଅର୍ଥର ଦୁଇ ଗୁଣ ଫେରସ୍ତ କରିବା ପ୍ରତିଶ୍ରୁତି ଦେଇ ୪ କୋଟି ଟଙ୍କା ଚଳୁ କରିଦେଇଛନ୍ତି ଜଣେ ଅନ୍ଲାଇନ୍ ଟ୍ରେଡର । ଟଙ୍କା ଫେରସ୍ତ ନ କରିବାରୁ ଟ୍ରେଡର ବ୍ରହ୍ମପୁର ପାତ୍ରପେଟା ସାହିର ସେଖ୍ ସୁଲେମାନ୍ ଅଲ୍ଲୀ(୩୪) ଙ୍କୁ ଅପହରଣ କରି ଜମା ଟଙ୍କା ମାଗିଲେ ଜମାକାରୀ । ଅପହୃତ ଟ୍ରେଡରଙ୍କୁ ଉଦ୍ଧାର କରିବା ସହ ଏହି ମାମଲାରେ ପୁଲିସ ୩ ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ବ୍ରହ୍ମପୁର ଟାଉନ୍ ଥାନା ପୁଲିସ ବ୍ରହ୍ମପୁର ହର୍ଷ ବିହାରର ଶେଖ୍ ଅଲ୍ତାଫ ଓରଫ ଅଲତାଫ(୩୨), ଖ୍ୱାଜା ସାହିର ମହମ୍ମଦ ସତାର୍ ଓରଫ୍ ଇମ୍ରାନ୍ (୩୯) ଓ ଗୋଲିଲା ସାହିର ସୟଦ୍ ନୁର୍ ମହମ୍ମଦ ଖାଦ୍ରି ଓରଫ୍ ଜାଫର(୩୦) । ସେମାନଙ୍କ ଠାରୁ ମୋବାଇଲ୍ ଫୋନ୍ ଜବତ ହୋଇଛି । ସେପଟେ ଟଙ୍କା ଠକେଇ ଓ ଆକ୍ରମଣ ଦୁଇଟି ମାମଲାରେ ଅପହୃତ ସେଖ୍ ସୁଲେମାନ ଅଲ୍ଲୀ, ଆକ୍ରମଣ ମାମଲାରେ ଖ୍ୱାଜା ସାହିର ୟୁନୁସ୍ ଖାନ୍ (୪୦) ଓ ସଲିମ୍ ଖାନ୍ (୩୭), ମନସୁର ବେଗ୍(୪୧), ସୟଦ ଏହସାନ୍(୩୩), ଶେଖ ଅଜିମ୍(୩୩)ଙ୍କୁ ମଧ୍ୟ ଗିରଫ କରି କୋର୍ଟ ଚାଲାଣ କରିଛି ପୁଲିସ । ବ୍ରହ୍ମପୁର ଏସ୍ପି ଡା.ସର୍ବଣା ବିବେକ ଏମ୍ଙ୍କ ସୂଚନା ପ୍ରକାରେ, ଗତ ୨୩ ତାରିଖ ସନ୍ଧ୍ୟା ୬ଟା ୩୦ରେ ଅଭିଯୁକ୍ତ ଓ ସେମାନଙ୍କ କିଛି ସହଯୋଗୀ ସୁଲେମାନଙ୍କ ଘରକୁ ପଶି ଯାଇଥିଲେ । ସେମାନଙ୍କଠାରୁ ନେଇଥିବା ଟଙ୍କା ଫେରସ୍ତ ନକଲେ ହତ୍ୟା କରିବାକୁ ଧମକ ଦେଇଥିଲେ । ତାଙ୍କୁ ଗୋଟିଏ ବାଇକ୍ରେ ମିଲିଟାରୀ ଲେନ୍କୁ ନେଇଥିଲେ । ସେଠାରୁ କାର୍ରେ ତାଙ୍କୁ ଦିଗପହଣ୍ଡି ନେଇଥିଲେ । ଦିଗପହଣ୍ଡିରେ ସୁଲେମାନଙ୍କୁ ରଖି ସେ ନେଇଥିବା ୪ କୋଟି ଟଙ୍କା ଫେରସ୍ତ କରିବାକୁ କହିଥିଲେ । ଟଙ୍କା ନଫେରାଇଲେ ହତ୍ୟା କରିବେ ବୋଲି ଧମକ ଦେଇଥିଲେ । ଏହି ସମୟରେ ଟାଉନ୍ ଥାନା ପୁଲିସ ସୂଚନା ପାଇ ସୁଲେମାନ୍ଙ୍କୁ ଦିଗପହଣ୍ଡିରୁ ଉଦ୍ଧାର କରିଥିଲା । ଏସ୍ପିଙ୍କ ସୂଚନା ପ୍ରକାରେ, ସୁଲେମାନ୍ ୧୫୦ ଜଣଙ୍କଠାରୁ ୪ କୋଟିରୁ ଉଦ୍ଧ୍ୱର୍ ଟଙ୍କା ନେଇଛନ୍ତି । ଦୁଇଗୁଣ ଟଙ୍କା ଫେରସ୍ତ କରିବାକୁ ସେ ପ୍ରତିଶ୍ରୁତି ଦେଇଥିଲେ । ସେ ଜଣେ ଅନ୍ଲାଇନ୍ ଟ୍ରେଡର ହୋଇଥିବା ତଦନ୍ତରେ ଜଣାପଡ଼ିଛି । ଲୋକଙ୍କ ମୂଳ ଟଙ୍କା କିମ୍ବା ଲାଭାଂଶ ନ ଫେରାଇବାରୁ ଅଭିଯୁକ୍ତମାନେ ସୁଲେମାନଙ୍କୁ ଅପହରଣ କରିଥିଲେ । ତାରିଖରେ ସୁଲେମାନ ଉଦ୍ଧାର ହେବା ପରେ ଜମାକାରୀଙ୍କ ଟଙ୍କା ଫେରସ୍ତ କରିବାକୁ ପ୍ରତିଶ୍ରୁତି ଦେଇଥିଲେ । ଗତ ୨୮ତାରିଖ ଅପରାହ୍ନ ୨ଟାରେ କିଛି ଜମାକାରୀଙ୍କୁ ଟଙ୍କା ଫେରାଇବାକୁ ଘରକୁ ଡାକିଥିଲେ ସୁଲେମାନ । ବହୁ ଜମାକାରୀ ସେଠାରେ ଭିଡ଼ କରିଥିଲେ ଏବଂ ଗଣ୍ଡଗୋଳ ହୋଇଥିଲା । ଖଣ୍ଡା, କାତି, ଠେଙ୍ଗା ଓ ପଥରରେ ଆକ୍ରମଣ ଏବଂ ପ୍ରତିଆକ୍ରମଣ ହୋଇଥିଲା । ଏଥିରେ ୟୁନୁସ୍ ଖାନ୍ (୪୦) ଓ ସାୟଦ ଏସାନ୍ ଆହତ ହୋଇଥିଲେ । ସମସ୍ତ ଘଟଣାକୁ ନେଇ ତିନିଟି ମାମଲା ରୁଜୁ ହୋଇଥିବା ବେଳେ ୯ଜଣଙ୍କୁ କୋର୍ଟ ଚାଲାଣ କରାଯାଇଛି । ଏହି ଘଟଣାର ଅଧିକ ତଦନ୍ତ ଜାରି ରହିଥିବା ଏସ୍ପି ଏକ ପ୍ରେସ୍ ବିବୃତିରେ ସୂଚନା ଦେଇଛନ୍ତି ।
